Descifran unha mensaxe oculta na sentenza do xuízo do Código Da Vinci
Un avogado descifrou unha mensaxe que o xuíz británico Peter Smith ocultou no texto da sentenza do xuízo por plaxio que tivo lugar sobre a novela O código da Vinci, de Dan Brown. No documento, de 71 páxinas, no que a comezos deste mes se rexeitou a demanda por plaxio presentada por dous escritores contra Brown, o xuíz Smith colocou unha serie de letras en cursiva.
Estas letras, colocadas unha detrás da outra, compoñían o texto “Smithy Code”, o código Smithy, seguido doutros carácteres sen significado aparente.
O avogado Dan Tench foi o primeiro en descifrar a frase completa, que era “Jackie Fisher, quen es? Dreadnought (drĕd’nôt’)”, e que fai referencia a Lord John, alcumado Jackie Fisher, un dos grandes almirantes británicos, que estivo ao mando da mariña británica a comezos do século pasado e introduciu un tipo de grande acoirazado, o primeiro deles chamado Dreadnought.
A noticia de que na sentenza había unha mensaxe codificada levou a xente de todo o mundo a tentar descifrala. Pero a Tench só lle levou unhas horas. O maxistrado empregou un código baseado na secuencia Fibonacci, sucesión matemática que tamén se emprega no bestseller de Dan Brown. Cada número desta progresión é o total da suma dos dous anteriores.

Un alcalde holandés prohíbe que as ovellas leven publicidade
O concello da localidade holandesa de Skarsterlan vai impoñer multas de 1.000 euros aos gandeiros que arrenden os seus animais para incluír publicidade neles. Esta estraña ordenanza débese ao programa “aluga unha ovella”, que xurdiu para burlar outra norma local que prohíbe os anuncios nas beiras das estradas, como explicou o voceiro municipal Yde Wierda.
Pero o promotor do programa “aluga unha ovella”, Jozef Mazereeuw, acusou o alcalde de imparcial cos animais, xa que outras especies, como os cabalos, non teñen ningún tipo de restrición publicitaria. Mazereeuw asegurou que hai que mirar as ovellas como futbolistas, que tamén levan anuncios nas súas camisetas.
Dende o luns, doce ovellas de Skarsterlan levan un cartel que pon “Grazas, alcalde”.

Un restaurante italiano foi multado por maltratar as lagostas
O restaurante La Conchiglia D’Oro (a cuncha de ouro) foi multado con 688 euros por expoñer cinco langostas vivas en xeo para atraer aos clientes, no que supón un paso mais na aplicación da lei contra a crueldade cara aos animais.
Un xulgado da cidade nororiental de Vicenza declarou que o xeito de expoñer os animais é un abuso cruel aos crustáceos por sometelos a unha morte lenta por atafegamento.
O xerente do restaurante, Giuseppe Scalesia, asegurou que apelarán a decisión xudicial.
O caso foi denunciado por Gianpaolo Cecchetto, ex-activista ambienal, que foi cear cos seus fillos pequenos ao restaurante en maio do 2002.
Cecchetto asegurou que os nenos quedaron abraiados co expositor, polo que se puxo en contacto inmediatamenta coa organización nacional de protección aos animais, ENPA, que se fixo cargo do xuízo.
Italia ten unha das leis de dereitos dos animais máis duras do mundo. En Turín pódese multar con 500 euros aos donos de cans que non os saquen pasear un mínimo de tres veces ao día.

Retiran do aeroporto de Oslo un perfume con envase en forma de granada de man
As autoridades do aeeroporto da capital norueguesa retiraron das tendas todas as unidades de Flowerbomb, un perfume que ten un envase con forma de granada de man. Segundo o voceiro do aeroporto, Jo Kobro, “dixémoslle á compañía responsable dos comerciops que non queremos esa clase de produto dentro do aeroporto”.
A normativa actual prohíbe a venda de produtos con forma de armas, polo que os responsables do aeroporto pensan que o perfume pode ser empregado para asustar aos pasaxeiros.
A decisión produciuse despois de que unha pasaxeira norueguesa que levaba na súa equipaxe de man unha botella de Flowerbomb fora detida polos servizos de seguridade do aeroporto francés de Beauveis. Dáse a casualidade de que o perfume é da casa, tamén francesa, L’Oreal. Mathieu Spies, responsable da firma de cosmética, amosou a súa sorpresa, dado que o produto leva dous anos á venda e nunca se producira unha situación semellante.

Un home queda atrapado na cheminea da súa casa, pola que tentou entrar espido
A policía de Hayward, en California, entrou nunha casa e atopou un home espido atrancado na cheminea. Nun principio pensaron que se trataba dun ladrón, pero en realidade era o propietario da vivenda.
Michael Urbano, de 23 anos, chegou á casa o sábado á mañá e decatouse de que non tiña as chaves, polo que non se lle ocorreu unha idea mellor ca entrar pola cheminea. Dedicidu espirse porque pensou que a roupa rozaría co muro e o frearía, e que a pel escorregaría con máis facilidade contra o cemento.
Pero a súa aventura rematou mal cando o cable de televisión que empregou na súa baixada rompeu, e, ao caer, quedou atrapado.
Ata que chegou a policía.

Deportes. Analistas da empresa UBS aseguran que Italia gañará o mundial de fútbol e España caerá en cuartos
Os analistas de UBS Wealth Management Research fixeron unha simulación semellante ás que usan para elaborar predicións económicas e financeiras, pero aplicada a quen gañará o mundial de Alemaña.
Neste estudo tivéronse en conta moitas variables, que lles permitiron chegar á conclusión de que non será Brasil quen gañe o mundial deste ano. Os analistas da banca suíza cren que os pentacampións chegarán á fina, pero serán derrotados por Italia.
Andreas Hoefert, un dos autores do traballo, prefire non fiarse da clasificación oficial da FIFA nin das casas de apostas, que tiran moito por Inglaterra.
O modelo de simulación prognosticou correctamente todos os gañadores dos oitavos de final dos últimos cinco mundiais, nos que as maiores sorpresas foron a clasificación de Corea contra Italia e de Senegal contra Suecia no 2002 e de Rumanía contra Arxentina no 94.
Os acertos chegaron ao 65% no caso dos gañadores dos cuartos de final, pois fallaron na derrota de Alemaña fronte a Bulgaria no 94 e a eliminación de Brasil contra Francia no 86.
Hoefert explica que o paso dos equipos dos cuartos de final á semifinal é o prognóstico máis difícil, aínda que neste mundial o que parece máis claro será o triúnfo de Brasil contra España.

Deteñen un falso médico que ofrecía palpacións mamarias gratis
Un home de 76 anos que se facía pasar por médico e ofrecía exames mamarios gratis a domicilio foi detido este xoves na Florida por presunta agresión sexual a dúas mulleres.
Philip Winikoff entrou este mércores nun complexo de apartamentos da cidade de Laurerdale Lakes provisto dun maletín médico, segundo informou Hugh Graf, voceiro da policía do condado de Broward.
O falso doutor chamou á porta dunha vivenda, onde convenceu a unha muller de 36 anos de que lle ía facer unha exploración de seos gratuíta, polo que o deixou pasar. Unha vez no apartamento, Philip Winikoff, despois de palpar os peitos da muller, levou a man aos seus xenitais e botouse enriba dela. A muller desfíxose del e chamou á policía, pero o corpo de seguridade chegou tarde, cando falso doutor xa escapara.
A seguinte vítima foi outra muller, de 33 anos, que vivía na mesma urbanización e que sufriu a mesma experiencia ca a súa veciña.
Finalmente, o xoves, o agresor foi detido no mesmo bloque de vivendas. Philip Winikoff non é médico, senón que traballa nun concesionario de vehículos.

Un inventor de Xaén deseña unha funda para o calzado que repele a lama
Manuel Pareja, empresario téxtil de Porcuna, na provincia de Xaén, inventou unhas fundas para cubrir o calzado e impedir que se manchen coa lama. A creación, chamada Pattones, consiste nun tecido de deseño especial que xa foi premiado no festival internacional de inventores de Xenebra.
O inventor leva tres anos mellorando a idea, para o que deseñou máis de corenta modelos distintos. Agora xa conseguiu o definitivo, que prevé sacar ao mercado europeo.
As fundas de calzado permiten o movemento en condicións climáticas adversas e por todo tipo de terreos enlamados. Manuel Pareja, despois de ter obtido o recoñecemento mundial en Suíza, comezou a vender os seus Pattones por España, Centroeuropa e Rusia. As perspectivas son moi boas, especialmente cando os clientes comproban a eficacia extraordinaria e sorprendente do tecido á hora de repeler a lama.

Unha anciá gaña dez millóns de dólares nunha máquina comecartos
Unha muller estadounidense de 84 anos gañou esta semana 10 millóns de dólares, uns 8 millóns de euros, nunha máquina comecartos de cinco centavos nun casino de Atlantic City, no estado de New Jersey. Foi o premio máis grande dado nos Estados Unidos por unha máquina de cinco centavos e tamén o meirande da historia de Atlantic City, coñecida polos seus casinos.
Josephine Crawford apostaba os seus últimos tres dólares no casino Harrah’s, ao que fora coa súa neta, cando viu como aparecían cinco águias na pantalla da máquina. Crawford asegurou que aínda non o cre.
A voceira do casino, Alyce Parker, dixo que a muller xa recibiu catro ofertas de matrimonio despois de gañar o premio. Crawford, camareira xubilada, explicou que acode aos casinos dende hai décadas e que ata agora o máximo que gañara foran 2.500 dólares, 2.000 euros.
De feito, a súa neta tentou convencela de que deixase de xogar, pois xa gastara 20 dólares a noite na que acabou sendo millonaria.

Os internautas propóñenlle a Tom Cruise receitas para cociñar placenta
Todo comezou cunhas desafortunadas declaracións do actor estadounidense á revista GQ. Nela asegurou, en referencia ao nacemento da súa filla Suri: «vou comer a placenta. Penso que será bo, moi nutritivo. Comerei o cordón e a placenta alí mesmo».
Por máis que Cruise ten repetido que todo foi unha broma, o certo é que a maior casa de apostas por Internet, Sports Interaction, xa ten colgadas todo tipo de suxestións gastronómicas, baixo o apartado «Misión placenta».
De momento, a proposta máis popular é comela crúa, aínda que á prancha séguelle de preto con apostas de tres contra un. Outras opcións son a tortilla ou a lasaña, aínda que algúns internautas propoñen un refrito de cebolas e allo e, os máis sofisticados, con fabas e un bo Chianti. Tamén hai suxestións ‘fast food’, con patacas fritas e un refresco.
O vicepresidente do portal, Anthony Munnely, dixo: «non coñezo a Cruise pero estou seguro de que nunca sentaría ao seu carón nun autobús».
A filla de Tom Cruise e Katie Holmes naceu este martes, nun parto silencioso, como marcan os canons da igrexa da ciencioloxía á que pertencen. Isto non significa que ela non emitise ningún son, senón que os que estiveron calados foron os que a rodeaban. Ademais, segundo a prensa sensacionalista británica e estadounidense, o nacemento produciuse, contra os desexos do actor de 43 anos, fóra da súa casa e con medicamentos contra a dor.
Tampouco se sabe se no momento do parto estiveron presentes os fillos que Cruise adoptou coa súa anterior muller, Nicole Kidman, o que provocou unha forte discusión entre os dous ex, pois a australiá non era partidaria desta excentricidade.
E tamén hai polémica no nome da meniña, que se chamará Suri. Segundo os seus pais, é un nome hebreo e significa «princesa», pero os que saben hebreo de verdade, os israelís, din que non é correcto: que «princesa» se debería dicir «Sara» ou «Sari», pero nunca «Suri», que significa en hebreo moderno «ministro do goberno».

Celébranse en Moscova as terceiras olimpiadas para porcos
Doce porquiños procedentes de sete países participaron esta semana nos terceiros xogos olímpicos porcinos, que se celebraron na capital rusa, Moscova. Os animais participaron en tres modalidades deportivas: atletismo, natación e fútbol.
Centos de rusos congregáronse no centro de exhibicións moscovita para asistir aos xogos, nos que moitos apostaron polos seus cochos favoritos. Entre o público atopábase o politico ultranacionalista Vladimir Zhirinovsky, que apostou 100 rublos polo porco corredor Borka. «Sempre me gustaron os porcos, toda a vida. Tiven catro ou cinco cando era neno».
Os favoritos nas apostas foron os porquiños Mykola, de Ucrania; Nelson, de Sudáfrica e o ruso Kostik Russisch Schwein.
A innovación deste ano foi a competición de natación, cos marráns tratando chegar ata a meta nunha pequena piscina. Pero parece que os participantes preferiron bater uns contra outros en lugar de chegar ata o outro lado. Ata se deu o caso dun dos deportistas que quedou cunha pata atrapada na corda que separa as rúas da piscina.
En canto ao atletismo, os adestradores teñen que correr detrás dos porcos para asegurarse de que tampouco se saen das pistas.
No fútbol, os cochos teñen que empurrar cos seus fociños un balón de fútbol enzoufado en aceite de peixe cun sabor moi agradable cando menos para os porcos e que marquen gol cando a pelota entre na portería. Os deportistas van vestidos con cadanseu babeiro numerado.
O vicepresidente da federación de criadores de porcos deportistas, Alexei Sharshkov, asegurou que os adestramentos comezan cando os animais teñen un mes de vida, e que, tanto se gañan como se perden, o seu destino non será o consumo humano. «¿Quen querería comer un competir coñecido mundialmente?». Os porquiños dedicaranse a criar novas xeracións de deportistas.

Descobren o esqueleto dunha muller diante dun televisor
O esqueleto dunha muller inglesa foi descuberto na súa casa de londres diante dun televisor prendido e, segundo os expertos, máis de dous anos despois da súa morte.
Segundo o Daily Telegraph, Joyce Vincent, de 40 anos, estaba rodeada de agasallos de Nadal. A televisión e a calefacción da casa estaban aínda postas cando a atoparon.
O cadáver estaba tan descomposto que o único xeito de identificar á falecida foi mediante os seus expedientes dentais.
A policía británica cre que morreu por causas naturais a comezos do ano 2003. En xaneiro do 2006, axentes da asociación de alugueiros entraron na súa casa de Wood Green, ao leste de Londres, e atoparon o cadáver deitado boca arriba no salón.
Esperaban cobrar os miles de libras de atrasos de arrendamento que se acumularan. Segundo un voceiro da investigación, Joyce Vincent estaba aloxada nun refuxio para mulleres, fuxindo dun problema de violencia doméstica. Aínda así, descártase que a causa da súa morte fose un crime.
Puido ter sido o programa de televisión que estaba a ver, ou unha fita de vídeo na que aparecía unha muller peiteándose e logo un pozo e cousas así raras.
Polo tanto, hoxe, día do libro, recomendamos ver menos a televisión e ler máis.

A mona Chita celebra o seu 74 aniversario recibindo un premio á súa carreira cinematográfica
A mona Chita, que non vive en Barcelona, senón en Palm Springs, California, recibiu esta semana, coincidindo co seu 74 cumpreanos, o primeiro trofeo que se lle entrega en recoñecemento á súa carreira. Trátase dun galardón outorgado polo festival internacional de cine de comedia de Peñíscola, que lle levou o cómico español Flipy.
Chita, que non é mona, senón mono, vive nunha residencia creada no ano 1992 polo seu coidador, Dan Westfall, para acoller primates sen fogar que se dedicaron ao mundo do espectáculo. A inseparable amiga ou amigo de Tarzán estivo acompañada na súa festa de aniversario por moitos amigos, vellas glorias das Vegas e o seu neto Jeeter, de 17 anos, e tamén chimpancé.
Chita recibiu cun sorriso o trofeo, unha escultura en forma de foguete coa que se puxo a xogar inmediatamente.
O chimpancé, considerado o máis vello do mundo, non puido viaxar a Peñíscola por problemas de saúde, que lle obrigaron a deixar o tabaco e un vaso de whisky que adoitaba tomar diariamente. Ademais, Chita é diabético, polo que na súa festa de cumpreanos só se bebeu Coca-Cola light e torta sen azucre.
Chita é ademais afeccionado á pintura. Os seus cadros entréganselles ás persoas que colaboran economicamente no mantemento da residencia de monos.

Seguimos falando de animais. Tres elefantas baten un récord ao comeren 490 quilos de froita en 40 minutos
Susy, Jenny e Bully son tres mansas elefantas de 4 toneladas de peso cada unha, bateron esta semana un récord Guinnes despois de comer en tan só 40 minutos case media tonelada de froita e verdura. Foi un almorzo mediterráneo servido nunha mesa de banquete de vodas.
José María González, director do Circo Mundial no que traballan os tres paquidermos e que se atopa estes días en Málaga, onde se bateu a marca, asegurou que non fora unha tarefa doada, aínda que as elefantas son moi comedoras.
A lupanda, que se celebrou á entrada do circo, estivo composta por 490 quilos de peras, melóns, sandías, pexegos, mazás, plátanos, leitugas e coliflores.
Deste xeito superaron o anterior récord, cifrado en 475 quilos de froita e que se acadara no circo Ringling Bros de Boston.
As tres elefantas estiveron ataviadas con babeiros brancos para non se mancharen. A súa proeza foi presenciada por case medio cento de nenos e curiosos.
A máis larpeira, Susy, que ten 28 anos e orixe asiática, escolleu dende o comezo as pezas que máis lle gustan. Non lle andou moi por detrás Jenny, tamén asiática e de 31 anos. Pero a maior, Bully, de 32 anos e raza africana, fartouse antes de rematar o tempo e púxose a xogar cos alimentos sobrantes.
Só falta comunicarlle o logro ao Libro Guinness, que deberá presenciar por medio de inspectores o desenvolvemento dun novo almorzo dentro duns meses.

Informámolos agora doutra noticia relacionada coa comida, aínda que menos agradable. Un artista chileno fai albóndegas coa súa propia graxa
O provocador artista chileno-danés Marco Evaristti montou unha instalación nunha galería de Aalborg na que vende dez albóndegas feitas coa súa propia graxa e envasadas coa súa foto. O prezo deste produto é de 4.390 dólares a unidade.
Evaristti aproveitou a graxa que lle sobrou dunha operación de liposucción para preparar unhas albóndegas que comeu nun ‘happening’, mentres que envasou o resto, que bautizou como «Polpette al grasso di Marco». Con elas montou unha instalación con tubos de neón que se pode visitar en Aalborg.
As albóndegas, acompañadas dunha etiqueta que pon «cómeme, son arte», súmanse a unha longa lista de proxectos controvertidos levados a cabo por este artista, nado en Chile no ano 1963 e que vive en Dinamarca dende 1985.
Hai uns anos montou unha instalación na que os visitantes podían matar peixes apertando o botón dunhas licuadoras nas que estaban metidos. Esta obra expúxose no museo de arte contemporánea de Santiago de Chile.
Evaristti declarou á televisión pública Danmarks Radio: «Canto máis cambiamos o noso corpo, máis nos afastamos de Deus. Aspiramos ao home ideal, pero non temos a cultura de preservar a imaxe divina de nós mesmos».

Agora viaxamos ata Australia, un país no que tamén pasan cousas curiosas. Unha avoa gaña por erro dous millóns de dólares na lotaría
Unha muller australiá, de 79 anos de idade, gañou esta semana 1,4 millóns de euros á lotaría despois de se trabucar na combinación de números que levaba cubrindo dende había anos.
Esta afortunada anciá, residente en Sydney, mercou, como cada semana, o seu boleto, onde tiña que cubrir catro liñas de números, pero en vez de usar a combinación de sempre, repetiu unha das liñas, que resultou ser a combinación gañadora no sorteo da lotaría de Nova Gales do Sur.
Así, a muller obtivo un premio de 2.333.333 dólares australiáns (1.402.268 euros), mentres que o resto dos gañadores se tiveron que conformar coa metade, xa que ninguén máis cubriu dúas veces a mesma combinación.
A avoa aínda non pode crer que tivera tanta sorte, e afirmou que os números eran os que cubría sempre, porque son datas de cumpreanos de familiares. Á orixinal pregunta de que vai facer cos cartos respondeu que unha parte a vai empregar nunhas vacacións coa súa familia fóra de Australia. Esperamos que non vaia aos Ánxeles nun voo de Oceanic Airlines, e que a combinación gañadora non fose 4, 8, 15, 16, 23 e 42.

Pero nós non marchamos de Australia, onde unha muller estivo a piques de probar a gastronomía francesa sen querelo
Os feitos aconteceron este martes, cando Julie Lumber se dispoñía a preparar unha ensalada envasada que mercara nun supermercado de Brisbane. No medio dos ingredientes habituais desta preparación apareceu unha pequena ra de 5 centímetros que caeu no prato ao abrir o paquete.
A señora Lumber asegurou que non soporta a cociña francesa, coas súas ancas de ra e os seus caracois e que non tiña intención de comer o anfibio, polo que devolveu a ensalada ao supermercado, onde lle devolveron o diñeiro, porque non estaba satisfeita. Antes diso, sacoulle unha foto á ra.
De todos os xeitos, nós pensamos que a ra apareceu accidentalmente no medio da verdura e que non se trataba dunha nova modalidade de ensalada francesa, como esta señora australiá deu a entender.

E a nosa viaxe polo mundo lévanos agora ata Colombia, escenario das dúas próximas noticias. Pescadores artesanais capturan un camarón xigante dun quilo de peso
Pescadores colombianos capturaron un camarón de 33 centímetros de lonxitude nas augas do mar Caribe, na costa da localidade de Punta Canoas, preto de Cartagena de Indias. O crustáceo pesa un quilo e poderíase tratar do máis grande e pesado da súa especie do mundo.
O pescador Gabriel Pontón declarou á emisora RCN que na súa vida vira algo igual e que, dende a súa captura, o gardan vivo nun frasco para o seu estudo e exhibición aos curiosos.
Os camaróns, segundo Pontón, adoitan medir sete centímetros e non pasan de 50 gramos de peso.

Seguimos na costa norte de Colombia, onde a alcaldesa de Santo Tomás, Onésima Cure, decretou que durante o xoves e venres santo as tabernas, bares e discotecas do municipio só puidesen poñer música clásica
A alcaldesa, non sabemos de que partido político, asegurou que con esta medida se amosará o respecto pola fe católica que profesa a comunidade, pertencente ao departamento de Atlántico. Onésima Cure tamén decretou unha lei seca durante estes días de fervor relixioso. É dicir, tampouco se poderá servir alcol.
A medida deixou de estar vixente hoxe mesmo, domingo de Pascua de Resurrección.

Deportes. Sancionado con 3.000 euros por fumar un porro durante un partido de fútbol
Un seareiro do Córdoba foi sancionado cunha multe de 3.001 euros despois de ser sorprendido pola Policía Nacional cando fumaba un porro durante o partido que enfrontou o 12 de xuño do 2005 ao conxunto local co Real Valladolid, e que rematou co descenso dos cordobeses.
A sanción económica leva aparellada, ademais, a prohibición de acceder a recintos deportivos durante cinco meses, segundo a resolución ditada pola Subdelegación do Goberno en Córdoba, como informa a axencia Efe.
A Policía Nacional fixo constar na súa denuncia que o agora sancionado, de inciais B.R.C., tratou de tirar ao chan o cigarro de haxix cando se viu sorprendido polos axentes.
Malia isto, a sanción de 3.001 euros é a menor das que se poden impoñer por falta grave á lei do deporte de 1990, que prohíbe a introdución e venda, consumo e tenza de toda clase de bebidas alcólicas e de substancias estupefacientes, psicotrópicas, estimulantes ou produtos análogos nas instalacións nas que se celebren competicións deportivas.

Como estamos a un paso da Semana Santa, comezamos falándolles do descubrimento do evanxeo segundo Xudas Iscariote
Xudas Iscariote pasou á Historia como o traidor por antonomasia, o discípulo que vendeu o seu mestre cun bico por trinta moedas de prata e que despois se aforcou levado pola desesperación. Isto é o que contan os evanxeos de Mateo, Lucas, Xoán e Marcos. Pero un manuscrito copto de hai 1.700 anos narra unha historia diferente. Segundo este texto, coñecido como o evanxeo de Xudas e que se fixo público este xoves, o apóstolo tería sido o amigo máis íntimo de Xesús e que o entregou ás autoridades porque el llo pediu.
Segundo Rodolphe Kasser, profesor experto en copto, retirado da universidade de Xenebra e un dos tradutores do manuscrito, dise nel que Xesús preferiu que un amigo o liberase do corpo humano e que por iso lle pediu a Xudas que o vendese e o traizoase. Sería unha traizón de cara ao público, pero non entre Xesús e Xudas. É a primeira vez que se atopa un documento antigo que defende esta idea, que xa se especulara no eido da teoloxía en diversas ocasións.
O texto comeza dicindo: «o relato secreto da revelación que Xesús lle participou a Xudas Iscariote durante unha semana, tres días antes da Pascua». Máis adiante, Xesús dille a Xudas: «ti superaralos a todos, porque ti vas sacrificar o corpo no que vivo. Serás maldito polas outras xeracións, e mandarás sobre elas». Tamén se conta unha visión que ten Xudas, na que se ve lapidado polos doce discípulos. Este evanxeo apócrifo remata coa entrega de Xesús por algúns cartos e xa non chega a facer referencia á crucifixión nin á resurrección.
O evanxeo de Xudas estivo oculto ata os anos 70 do século pasado, cando se atopou un códice de papiro nun deserto exipcio, preto de El Minya. No ano 1978 mercouno un anticuario do Cairo, que tentou vendelo nos Estados Unidos, sen éxito. Despois estivo depositado ata o ano 2000 nunha caixa de seguridade en Nova York, ata que o mercou a anticuaria suíza Frieda Nussberger-Tchacos, que llo doou un ano máis tarde á fundación mecenas da arte antiga de Basilea, que xunto ao instituto Waitt para descubrimentos históricos e a National Geographic Society puxeron en marcha o proxecto de tradución que agora saíu á luz.
Este códice inclúe, ademais do Evanxeo de Xudas, a primeira Apocalipse de Santiago, a carta de Pedro a Felipe e un fragmento do libro de Alóxenes. Ten 26 páxinas, data do ano 300 e é unha tradución ao copto dun orixinal grego do ano 180. Descoñécese cal foi o seu autor.

Volvemos a Exipto. A tartaruga máis vella do mundo morre aos 270 anos no zoo do Cairo
Unha tartaruga xigante, considerada a máis vella do mundo, morreu esta semana aos 270 anos de idade no zoolóxico da capital exipcia, segundo informou o xornal Al Ajbar. O sapoconcho morreu de vello. A súa avanzada idade convertérao nun animal incapacitado, segundo dixo o director da administración central do zoo, Talaat Sidrak.
O réptil foi un agasallo que lle fixo ao zoolóxico o rei Faruk, o último monarca da dinastía exipcia, afeccionado á caza e á colección de animais exóticos.
Dúas semanas antes da morte desta tartaruga finou outro exemplar da súa especie, de nome Adyaita, no zoo de Calcuta, na India. Tiña cando menos 250 anos.

Un rapaz de 14 anos provoca unha espectacular persecución polas rúas da Coruña
O adolescente, que xa tiña antecedentes por motivos semellantes, conducía un Audi A3 sen seguro, emprestado por un maior de idade, sen permiso de conducir, e que ía de copiloto.
Un rapaz de 14 anos fixo sufrir á policía local da Coruña, que tardou media hora en atrapalo, despois da súa fuxida ao volante dun Audi A3.
A persecución comezou na rotonda que concentra a circulación cara ao polígono da Grela e a saída a Arteixo. O rapaz viu o coche policial e pisou a fondo o acelerador, coouse no carril da esquerda e pouco despois atravesou os outros dous por medio dos coches. Entre tanto, un vehículo patrulla perseguíao coas luces e as sirenas postas.
Os axentes e os coruñeses en xeral contemplaron abraiados as perigosas manobras postas en práctica polo menor, como os adiantamentos nos cambios de rasante da rúa Newton ou o uso do aparcadoiro dun centro comercial para cambiar de sentido.
A policía local non puido deter o vehículo nin sequera na avenida de Fisterra, onde parou nun semáforo, pero as sirenas das patrullas fixeron que outros coches se apartasen, o que o rapaz aproveitou para fuxir unha vez máis. Logo, en Bens, atopouse coa estrada cortada, polo que deu marcha atrás, meteuse por un paso estreito e quedou atrancado. Tentou dar marcha atrás outra vez, pero topou contra un vehículo policial, o que supuxo a fin da súa aventura.
Os axentes entregaron o rapaz ao seu pai, que o foi recoller. Pero o copiloto si foi detido, por ser maior de idade, baixo a imputación de non ter impedido a fuxida. Tamén terá que explicar por qué colleu prestado un coche, propiedade dun amigo seu, se non ten carné e aínda está a sacalo.
O dono do coche, que tampouco ten carné nin seguro, será multado como o copiloto. Eles dous e mais o pequeno emulador de Fernando Alonso son amigos do barrio.

Bicarse a abrazarse en público en Malasia pode supoñer un ano de cadea
Unha parella malaia, formada por Ooie Kean Thong e Siow Ai Wei, foi levada perante os tibunais por supostamente bicarse e abrazarse nun lugar público, un parque situado a carón das Torres Petronas de Kuala Lumpur, que foi o edificio máis alto do mundo entre os anos 1998 e 2003. A condena que lles pode caer pode ser de ata un ano de prisión.
O avogado da parella advertiu aos turistas que viaxen ao país asiático que non dean mostras visibles da súa paixón se non queren correr a mesma sorte, aínda que o alcalde da capital malaia, Roslin Hassan, aseguroulle á BBC que os estranxeiros só recibirán unha amoestación por bicarse en público, aínda que collerse das mans si é aceptable.
Volvendo ao caso da parella malaia, o tribunal supremo de Malasia considera que é correcto procesar á parella por ese suposto delito, e o xuízo sairá adiante.
Os acusados aseguran que non se estaban a bicar. A rapaza, Siow ai Wei, alega que estaba a tocar o violín mentres que o seu mozo lle lía unha carta.

O defensor da igualdade sexual en Suecia pídelle á selección de fútbol que se retire do mundial se se abren máis burdeis en Alemaña
O defensor do pobo para a igualdade de Suecia, Claes Borgstrom, pediu este luns nunha emisora de radio que o seu país se retir do mundial para amosar a súa repulsa á apertura de novos estrablecementos de prostitución en Alemaña para atender a demanda de visitantes. O presidente da asociación sueca de fútbol, Lars-Ake Lagrell, xa desbotou esta posibilidade, asegurando que esa medida decepcionaría á nación e tamén eliminaría o equipo do mundial do 2010, que se vai celebrar en Sudáfrica.
Os barrios vermellos das 12 cidades anfitrionas do mundial de fútbol de Alemaña estanse a preparar para a chegada dun millón de visitantes estranxeiros entre o 9 de xuño e o 9 de xullo, motivo polo cal o defensor da igualdade sueco asegurou que sería unha boa oportunidade para que os homes amosen o seu aborrecemento ao tráfico de seres humanos.
En Alemaña exercen a prostitución legalmente unhas 400.000 mulleres, o que contrasta coa política de Suecia, onde está penado este oficio, con consecuencias moi graves para os usuarios, non para as traballadoras, que se consideran vítimas.
As noticias de que se van abrir prostíbulos xigantes e refuxios do sexo en Alemaña espertaron a alarma de varios políticos suecos.
O presidente da asociación de fútbol de Suecia prometeu que ningún xogador do seu país vai empregar os servizos de prostitutas na copa do mundo, pero que tampouco fará campaña contra a prostitución.
A raíz da polémica xurdida, un grupo de prostitutas ofreceulle a Lagrell unha visita guiada ao burdel. O presidente da asociación sueca de fútbol rexeitou o convite.

E ficamos en Suecia. O multimillonario fundador de Ikea está orgulloso da súa austeridade
O fundador da cadea de tendas de mobiliario IKEA, o sueco Ingvar Kamprad, o cuarto home máis rico do mundo, conduce un coche que ten quince anos e sempre voa en clase turista, segundo el, para inspirarlles aos seus 90.000 empregados de todo o mundo a virtude da sobriedade.
Kamprad, que cumpriu a semana pasada 80 anos, explicou os seus hábitos durante unha insólita entrevista de televisión en Suíza, onde vive dende hai tres décadas.
A revista Forbes calculou a súa fortuna en 28.000 millóns de dólares, en euros, 23.000, só por detrás do co-fundador de Microsoft Bill Gates, o investidor norteamericano Warren Buffett e o magnate mexicano Carlos Slim.
«A xente di que son cutre e que non me importa se eles o son. Pero síntome moi orgulloso de seguir as normas da nosa empresa», dixo Kamprad á emisora de televisión francófona TSR. Tamén confirmou que segue a conducir o seu vello Volvo. Dixo: «É case novo, só ten quince anos, ou por aí».
O xornalista tamén fixo unha broma coa orde que teñen os empregados de Ikea de escribir polas dúas caras dos folios. O señor Kamprad dixo: «Todo o que gañamos precisámolo como reserva. Aínda temos que desenvolver máis Ikea, e precisamos miles de millóns para introducirnos na China ou Rusia».
Ikea é o maior vendedor de mobles do mundo, con 202 tendas en 32 países.

Iker Jiménez recoñece ter sido vítima dunha fraude
O coñecido experto en temas paranormais Iker Jiménez admitiu na súa páxina web que a fotografía das pantasmas de Navalperal, na que aparecían tres nenas collidas da man, é falsa. O engano descubriuno grazas á axuda dunha pintora gaditana, Carmen Lupión, especialista en traballos de fotografía antiga, que advertiu ao programa televisivo que conduce o xornalista da falsidade da foto.
Segundo a información difundida na web de Iker Jiménez, a imaxe das nenas é «unha toma moi antiga, moi difícil de atopar, posiblemente dunha web austríaca», polo que conclúe que a foto é unha manipulación e unha monumental broma que lles saíu pola culata.
Jiménez confesa que creu na familia que lle achegou as imaxes, e que confiou neles pola colaboración prestada ás investigacións desenvolvidas polo seu equipo.
En concreto, refírese a Nacho, o autor das fotografías, a quen define, de confirmarse a fraude, como «un dos mellores actores que atopei na vida», e critica que fose quen de facer unha montaxe daquelas nenas apócrifas sobre a tumba dun familiar.

Fracasa a macroorxía convocada na praia de Sopelana (Biscaia)
Nin o concello de Sopelana nin a deputación biscaíña, nin a dirección de costas puideron impedir que se celebrase a festa sexual, convocada por internet para a madrugada do venres ao sábado.
Só se enviou ata o areal un coche da policía local, que se limitou a evitar os estacionamentos irregulares.
Aínda que non se tomaron medidas para prohibir a orxía, por non seren as praias de competencia municipal, a convocatoria acabou fracasando por si soa. Ata o lugar só se achegaron grupos reducidos, a maioría de sexo masculino e menores que pretendían ver o espectáculo.
A macroorxía, convocada para as nove e media da noite do venres na praia de Sopelana, na provincia de Biscaia, para complementar o macrobotellón de Bilbao foi un fracaso estrepitoso, pois só se achegaron ata o lugar pequenos grupos de miróns.
A timidez e a presenza de cámaras de televisión á espera dunha xugosa reportaxe para magazines de late night evitaron que a festa repetise o éxito doutra convocada hai unhas semanas en Grecia á que acudiran máis de 3.000 persoas.
De feito, o lema da convocatoria de Bilbao, que tamén tivo o seu reflexo en Málaga e en Vigo, era «Vas deixar que cho conten? Os gregos, que dende sempre foron unha civilización moi avanzada e sabia, montaron unha boa. Entón xurdiu a idea: van saír os gregos pola tele e nós non?».
Despois do fracaso non se descarta unha nova convocatoria.

Un ex-preso denuncia que quedou estéril polo exceso de orgasmos no cárcere
Un antigo convito da cadea de Czarne, en Polonia, vaille pedir ao estado unha indemnización porque, durante o tempo de condena, tivo demasiados orgasmos, segundo informou a axencia PAP. Segundo a denuncia do home, durante vinte anos estivo a fabricar lousas de formigón cunha máquina que producía grandes vibracións e que tiña que suxeitar co abdome para poder controlala.
Este señor afirma que as vibracións lle producían unha exaculación cada trinta ou corenta minutos, o que lle acabou provocando a esterilidade.
O alcaide da prisión, Franciszek Tarasewicz, dixo que tratará con absoluta seriedade a demanda, que lle sorprendeu moitísimo. A súa petición de indemnización podería ser xustificada se resultan certas as súas queixas, pois suponse que a condena lle provocou unha grave perda de facultades.

O policía de Village People podería ir ao cárcere (non sabemos se a ese mesmo cárcere) por posesión de armas e drogas
Victor Willis, coautor de cancións como In the Navy ou a que estamos a escoitar, YMCA, enfróntase á petición de cinco anos de cadea por posesión de armas e de drogas e por ter fuxido da Xustiza.
Este intérprete, que aparecía disfrazado de policía, fora detido o ano pasado por posesión de cocaína, para desaparecer pouco despois de que se ditara unha sentenza de 16 meses de cadea.
Ao final, as autoridades de California detivérono o domingo pasado. Pola súa fuxida, a xustiza de San Francisco poderíao condear a catro anos de prisión, máis oito meses por novos cargos de posesión de drogas, que se lle detectaron no momento da súa detención.
O grupo Village People son un referente mundial da música disco dos anos 70, e o seu tema YMCA converteuse, ademais, nun himno gay.

Sálvalle a vida á súa cadela facéndolle o boca a boca
Unha inglesa de 37 anos, May Buchanan, salvoulle a vida á súa cadela terrier, Daisy, de oito anos, por terlle feito o boca a boca cando a súa mascota se esganou cun cacho de carne. A cadela collera este pedazo do prato dos huskies que comparten a casa con ela.
May Buchanan dixo que cortaba pezas grandes para os huskies e pequenas para os terrier, «pero Daisy é tan degoirada que lles roubou un dos cachos de maior tamaño».
A dona da cadela viuna atragoada, loitando por respirar, polo que chamou rapidamente ao veterinario, quen lle aconsellou o seguinte: sacarlle a carne da gorxa á mascota, que lle mordeu, botoulle aire facéndolle o boca a boca e fíxolle unha masaxe cardíaca. Despois, o seu home levou a cadela á clínica veterinaria.

Detido un home que finxiu o seu secuestro para ir a un prostíbulo
A Garda Civil de Córdoba detivo un home de 28 anos por simular que fora secuestrado despois de que presuntamente gastase nun club de alterne os 2.100 euros que lle dera a súa moza para pagar a factura dun aparello de aire acondicionado. Os feitos aconteceron a fin de semana pasada, cando os axentes acudiron a inspeccionar un automóbil Mercedes aparcado preto da autovía A-4.
Os gardas civís comprobaron que o vehículo estaba baleiro, pero pouco despois escoitaron ruídos estraños no maleteiro, onde atoparon o mozo atado de pes e mans. O home, veciño de Córdoba, contoulles que fora secuestrado 36 horas antes na capital, e que o obrigaran a conducir ata o extrarradio e logo botáronlle un esprai que lle fixo perder o coñecemento.
Porén, no recoñecemento médico non se lle detectaron feridas considerables e atopábase en bo estado de saúde, polo que foi levado de volta ao seu fogar, onde a familia xa presentara unha denuncia pola súa desaparición.
Ao día seguinte, a suposta vítima denunciou perante os axentes que lle roubaran 2.100 euros que levaba no coche. Os axentes sospeitaron e acabaron descubrindo que o mozo simulara o secuestro.
Ao final, parece ser que o individuo recibira da súa moza os 2.100 euros para pagar a factura dun aparello de aire acondicionado, pero preferiu gastalos no club de alterne Glamour.
Ao día seguinte foi descuberto por un dos traballadores do establecemento nunha das habitacións en estado de embriaguez e con síntomas de ter consumido estupefacientes, xa que había restos de droga na mesiña de noite.

Absolven un home dun roubo porque estaba vendo o Deportivo
Un home natural de Lugo pero residente na Coruña foi absolto de dous delitos de roubo que se produciron os días 6 e 9 de decembro do 2001 (foi rápido o xuízo) nunha empresa de venda de ferramentas de xardinería, situada na avenida das Mariñas, na parroquia de Nós. Salvouno a súa afección ao fútbol e concretamente ao Dépor.
A sentenza do xulgado do penal número 3 da Coruña considera que os feitos se produciron ás catro e cuarto da tarde do 6 de decembro, cando alguén roubou dúas desbrozadoras da empresa afectada e tres días despois levouse outra máquina máis, cun valor total de 1.000 euros de todo o material roubado.
O xuíz declara que non se pode demostrar a culpabilidade do acusado, a pesar de que un denunciante recoñeceu a súa cara nuns vídeos de seguridade, pois hai testemuñas que confirman que nesas datas estaba a ver ao Deportivo.

Tense dito que os ingleses son un pouco raros, pero dous estudos publicados esta semana véñeno de confirmar.
A metade dos británicos non usan roupa interior e un de cada dez dos que a usan non a cambian en tres días.
O estudo da marca de deterxentes Surcare asegura que a metade dos habitantes do Reino Unido non usan roupa interior. Esta circunstancia dáse maiormente cando saen pola noite.
Pero os que si usan roupa interior non son bos clientes da empresa autora do informe. Un de cada dez confesa que leva a mesma muda máis de tres días seguidos, un de cada vinte recoñece ter reciclado os calzóns dándolles a volta e, o máis arrepiante, un 4% dos homes usa a mesma vestimenta íntima toda a semana.
Con esta situación, non é de estrañar que aconteza o que se desprende dun estudo da oficina postal británica.
Máis dun terzo das persoas que falan por teléfono no Reino Unido fano espidos.
O nudismo telefónico é practicado con maior frecuencia por homes ca por mulleres, segundo a enquisa que publicou este xoves a oficina postal da Gran Bretaña. Segundo este inquérito, o 40% dos homes falan por teléfono espidos, fronte ao 27% das mulleres. Non se especifica se o fan mediante videochamada ou a través da telefonía tradicional.

Seguimos con temas relacionados coa roupa interior, e é que parece ser que Fidel Castro quéimaa por medio a que o asasinen.
Explicamos o misterio. Un ex-gardacostas do presidente cubano, Delfín Fernández, revelou algúns aspectos ocultos e intimidades de Fidel Castro no xornal The Miami Herald, como a súa afección ao xamón ibérico ou a súa obsesión por queimar a roupa interior usada. Parece ser que o ditador cubano, que fará 80 anos o 13 de agosto, manda queimar esas prendas por medo a que se produza algún compló para asasinalo con produtos químicos empregados no lavado.
Fernández asegurou que unha vez foi a España só para que mercara 2.500 dólares de bo pata negra para Fidel. Tamén dixo que o mandatario cubano acumula expedientes sobre empresarios e investidores estranxeiros que visitan Cuba, e máis se proceden de España.
O gardacostas, de 44 anos de idade, quedou en España no ano 1990 durante unha viaxe a Europa, onde traballou para famosos como Antonio Banderas, David Beckham, Ana Obregón ou Esther Cañadas. Se publica algo sobre eles, farémosllelo saber.

Yoko Ono oponse a que fagan espiritismo con John Lennon
A viúva do beatle John Lennon, Yoko Ono, considera de mal gusto o proxecto dunha televisión estadounidense de contactar co seu defunto marido a través dun médium, e do que xa lles demos conta a semana pasada neste mesmo espazo.
Segundo o xornal The Independent, que cita como fonte a Elliot Mintz, amigo íntimo do músico e voceiro de Ono, a viúva de Lennon negouse a participar na experiencia.
O voceiro di que Lennon foi un excelente comunicador do corazón, a mente e o espírito y que aínda lles fala directamente aos que escoitan as súas gravacións. Ese é o medio que escolleu para falar con todos nós, e por iso unha sesión para a televisión de pago non é do seu estilo.
Polo contrario, Paul Sarta, produtor do programa In Demand, explica que só tenta facer seriamente algo que moitos millóns de espectadores de todo o mundo cren posible.
No espazo, un grupo de mediums reuniranse media hora nunha mesa despois de ter visitado lugares emblemáticos na vida de Lennon, como o edificio de apartamentos Dakota, en Manhattan, onde foi asasinado no ano 1980 por Mark David Chapman. Os espiritistas estarán rodeados de cámaras de infravermellos para captar a presenza do espectro do beatle. O mesmo experimento fíxose hai tres anos con Ladi Di, e daquela aseguraran que a princesa de Gales pasa moito tempo no outro mundo coa madre Teresa de Calcuta e vixiando aos seus fillos.

Un chinés de 105 anos busca moza por internet
O centenario Gong Duoruo pide que a candidata teña, como moito, a metade da súa idade, é dicir, 53. A súa historia causa sensación na China, onde mesmo o xornal oficial China Daily publicou fotos do ancián chateando na computadora e cuns cascos postos. Os xornalistas locais están a axudar a Gong a participar nun servizo de contactos on-line a través de vídeo conferencia. Parece que a cousa xa está a dar bos resultados. Unha enfermeira de apelido Zhang e residente en Xian, de 50 anos, amosouse interesada en coñecer a Gong, conmovida polos seus esforzos e a súa visión optimista da vida.

Seis pacientes ingleses sofren estraños efectos secundarios despois de se someteren a un experimento clínico
Seis homes novos e sans sometéronse voluntariamente, previo pagamento de 3.500 euros, ás probas clínicas dun novo fármaco no hospital de Norwick Park, en Harrow, Inglaterra. O medicamento, da empresa alemá TeGenero AG, co nome chave TGN-1412, estaba deseñado para o tratamento da leucemia e de inflamacións crónicas como a artrite reumatoide. Aínda que a compañía encargada das probas, a estadounidense Parexel International Corp., asegurou que se tomaran todas as medidas de seguridade precisas, o certo é que os seis pacientes comezaron a sufrir graves e estraños efectos unha hora despois de teren recibido o fármaco por inxección bucal.
Segundo BBC News 24, un dos pacientes presentaba un aspecto irrecoñecible para a súa moza. A súa cabeza e pescozo estaban inchados e sufría problemas respiratorios. «É un home grande, pero a súa cabeza está enorme, desproporcionada, parece o home elefante», dixo a parella dun dos afectados. «Os seus amigos non se atreven a mirarlle á cara, pero eu estou ao seu carón dicíndolle que ten que rexenerar as súas células».
Segundo o hospital, os dous pacientes que sufriron secuelas máis graves e que se atopaban en estado crítico tiveron un fallo de funcionamento da meirande parte dos seus órganos.
Scotland Yard e a axencia reguladora da saúde e da medicina traballan para saber se se cometeu algún erro ou delito nas probas ou na fabricación do medicamento.

Roubaban ósos e vendíanos como restos de militares norteamericanos no Vietnam
A policía vietnamita desartellou unha banda de dez persoas que se dedicaba a roubar ósos nos cemiterios e vendérllelos aos seus paisanos como restos de militares norteamericanos da guerra do Vietnam. Le Trung Tinh, xefe da policía da provincia de Khanh Hoa, descubriu que o grupo de timadores chegou a cobrar ata 1.900 dólares polos esqueletes. Os incautos compradores eran vietnamitas que crían que estes ósos lles valerían de pasaportes cara aos Estados Unidos. Pero a embaixada estadounidense avisou de que o país non ofrece ningún tipo de recompensa por recuperar os restos dos máis de 2.000 militares que seguen desaparecidos no Vietnam.

O colíder do grupo británico Oasis, Noel Gallagher, parece non ser moi partidario de que as mulleres gobernen. Así, durante a súa xira por Chile, soubo que unha muller gañou hai pouco as eleccións no país afirmou, en referencia aos chilenos «que Deus os axude». A reacción tampouco foi moi de estrañar tendo en conta a experiencia que tiveron no Reino Unido con Margaret Thatcher nos anos 80. Descoñecemos se Oasis fará proximamente unha xira por Alemaña, e que dirán de Angela Merkel.

De seguro que os irmáns Gallagher soñaron moitas veces co que lle aconteceu a unha muller norueguesa.
Haldis Gundersen, residente na cidade de Kristiansund, quedou coa boca aberta cando, despois de abrir a billa do seu apartamento se atopou que en vez de saír auga brotou cervexa.
«Abrín a billa para lavar uns coitelos e saíu cervexa», aínda que a bebida tiña un sabor algo raro e carecía de gas.
En Noruega o prezo da cervexa é un dos máis caros do mundo, pois no país escandinavo unha pinta custa arredor de oito euros.
Naturalmente, todo ten unha explicación, como di Miro Pereira. O traballador dun bar situado dous pisos máis abaixo do fogar de Haldis Gundersen trabucouse un sábado pola noite ao conectarun novo barril de cervexa coa tubería de auga do piso da muller. Entre tanto, no bar estívose servindo auga en lugar da bebida alcohólica.

As cartas dun David Beckham adolescente cotízanse a 1.500 euros
A casa de poxas Bonhams vendeu o pasado luns dúas cartas escritas polo futbolista do Real Madrid e capitán da selección inglesa de fútbol David Beckham cando tiña 16 anos, ademais dun debuxo feito por el mesmo, polo módico prezo de 1.500 euros.
Beckham escribiu as cartas no ano 1991, moito antes de coñecer a Victoria, cando acababa de fichar polo Manchester United. O receptor das letras era o seu amigo Lee, a quen lle contaba que o seu primeiro soldo era de 175 euros semanais, lixeiramente inferior ao que cobra na actualidade, que é o mesmo engadíndolle tres ceros ao final.
David tamén conta nesas cartas que o feito de ser futbolista é unha atracción irresistible para as rapazas. Beckham dicía: «estiven xogando no equipo A, en vez do B, e é fantástico. Foime moi ben co fútbol e coas mozas, porque, como somos do United, todas queren saír connosco».

Un grupo de espiritistas espera contactar con John Lennon nun programa de televisión
O espazo, producido por Starcast Productions, emitirase o vindeiro venres polo sistema de pago por visión e custará oito euros.
O equipo de videntes tentará contactar co espírito do beatle John Lennon, que foi asasinado hai 25 anos, e contará cun importante despregue de medios. Os espiritistas estarán no edificio Dakota, en Nova York, onde dispararon contra Lennon, e tamén terá presenza na India. Dende alí tentarán que lles envíe cancións dende o alén para facerlles arranxos no aquén. Tamén van dispoñer de cámaras de infravermellos para captar a presenza incorpórea do beatle.
De todos os xeitos, as perspectivas non son moi boas. Hai tres anos, a mesma produtora tentou contactar con Lady Di no programa ‘O espírito de Diana’, ao que a finada princesa de Gales non se presentou. O espazo tivo unha audiencia de medio millón de espectadores.

Descobren un ladrón xaponés pola caligrafía da súa carta de desculpa
A cadea de televisión xaponesa NHK informou da detención dun ladrón despois de que a policía recoñecese a súa letra nunha carta que lle enviou á súa vítima desculpándose polos actos. O ladrón entrou á forza na casa dunha muller de 78 anos na cidade de Misato, ao oeste do Xapón, e rouboulle o equivalente a 100 euros despois de ameazala cun coitelo.
Pero o individuo arrepentiuse do que fixera e escribiulle á vítima unha carta na que lle pedía perdón e lle devolvía os cartos.
A policía logrou recoñecer o autor do escrito polo xeito de escribir e «outras cousas» que non quixo precisar, polo que finalmente detivo ao ladrón, un traballador da construción de 51 anos, veciño da vítima.
O home confesou despois do arresto que estaba abafado polas débedas.

Pide o divorcio por non aguantar o cheiro do seu home
Un tribunal do Cairo, en Exipto, recibiu a petición de divorcio dunha muller que aseguraba que o cheiro do seu home, pouco afeccionado á hixiene, estaba a facer insoportable o seu matrimonio.
Levaban oito anos casados e tiñan tres fillos, pero, a pesar do que pensaba todo o mundo, a súa vida era un inferno. A pesar das queixas constantes da muller, o home non estaba polo labor de empregar a auga e o xabrón.
Aínda que o tribunal tentou nun principio que o matrimonio se reconciliase, a solicitante reiterou que non quería seguir vivindo co seu home porque non podía soportar a súa peste.
Ao final, concedéronlle o divorcio ante a incomparecencia do home para darlle unha última oportunidade ao matrimonio. A causa do divorcio foi «incompatibilidade de olores».

Agora falamos de todo o contrario: as mulleres atractivas recenden ben
Un estudo do instituto Ludwig-Boltzmann de Etoloxía Urbana de Viena, que dirixe o doutor Karl Gremmer, chegou á conclusión de que as mulleres atractivas teñen un aroma sexy, como consecuencia dun sistema de comunicación olfativa.
Segundo o biólogo austríaco, as feromonas inflúen no olor corporal e asemade teñen relación co atractivo físico. Tamén son moi importantes á hora de atopar parella, dado que os homes son especialmente sensibles a estas mensaxes olorosas. O recendo é máis intenso, segundo este estudo, nos días de ovulación das mulleres.
Tamén se desprende deste traballo o feito de que cada persoa ten un olor distinto e que os membros da mesma familia non cheiran igual, o que serviría para evitar que haxa relacións de consanguinidade.
Así que xa saben, para ligar hai que seguir este consello de Aerolíneas Federales.

Un hondureño inventa un combustible a base de aceite de restaurantes de comida rápida
Víctor Menchaca, hondureño de 57 anos, é o inventor dunha nova modalidade de biodiésel que emprega como combustible para o seu camión cisterna. Unha mestura dun 80% de aceite sobrante de fritir patacas e polo nos restaurantes de McDonald’s e Kentucky Fried Chicken e un 20% de alcohol, que á súa vez combina con queroseno, permítelle afrontar os altos custos do combustible e, ao tempo, preservar o medio ambiente. Menchaca dedícase a repartir auga a familias que carecen de subministro cun camión cisterna que emprega este innovador combustible. Ademais, dise que deixa un agradable recendo a patacas fritas por onde pasa.

Crean un parque temático sobre Xesús Cristo
O parque temático relixioso Terra Santa atópase en Bos Aires, na Arxentina. Alí reconstrúese cada fin de semana a Xerusalén de hai dous mil anos nun espectáculo que os seus creadores definen como «único no mundo». Este parque está dedicado á vida de Xesús e á relixión cristiá, aínda que tamén aparecen unha sinagoga e unha mesquita, por iso do politicamente correcto.
As persoas que se acheguen ata o parque Terra Santa, que non ten moito que ver con Terra Mítica, poden asistir ao nacemento de Xesús nun pesebre de tamaño natural e vivir a Noiteboa con San Xosé, a Virxe María, a mula, o boi e os reis magos. Tamén poden percorrer as rúas de Xerusalén no Vía Crucis, contemplar en vivo a resurrección de Cristo ou a derradeira cea. O parque arxentino, inaugurado no ano 1999, xa recibiu dous millóns de visitantes.
Aparentemente, non hai nada no parque que non poidamos ver por aquí no Nadal ou durante a Semana Santa.

Gaña un coche e entradas para o mundial de fútbol tras pasar nove días nunha montaña rusa
Un profesor de karate mexicano de 33 anos gañou este xoves un automóbil e pases para o mundial de fútbol de Alemaña despois de vencer un concurso convocado pola cadea Televisa, titulado «vertixe na montaña». A persoa que aguantase máis tempo subido nunha montaña rusa sería a afortunada. Na atracción, de algo máis dun quilómetro de lonxitude e cunha velocidade de 72 quilómetros por hora, participaron numerosas persoas, aínda que só tres chegaron ata o final. O profesor de karate que ao final gañou, un tatuador de 23 anos e unha estudante da mesma idade.
A organización decidiu endurecer as normas do concurso, dado que estas tres persoas parecían invencibles, así que prohibiulles baixar nin sequera para ir ao baño.
Finalmente, gañador, despois de 9 días e 1.333 voltas, foi obsequiado cos agardados agasallos e que confesou que se atopaba fisicamente moi ben.

Deteñen un bombeiro que baixou os pantalóns diante dunha ovella
Un bombeiro de Arizona foi detido despois de ser sorprendido nun alpendre cos pantalóns baixados diante ou, máis ben, detrás dunha ovella roubada. O veciño autor da denuncia, o gandeiro Alan Goats, afirmou que a súa filla o avisou de que acababa de ver un home roubando unha ovella. Despois de seguilo ata o alpendre, o denunciante atopou o bombeiro dentro do alpendre na situación que describiu perante a policía. Todo isto aconteceu o sábado pasado na localidade de Mesa, preto da capital de Arizona, Phoenix.
O bombeiro, de 52 anos, foi detido na súa casa horas despois acusado de violación da propiedade privada e desorde pública. Permanecerá arrestado en canto non se complete a investigación.

Sharon Stone asegura que cambiaría bicos pola paz en Palestina
Esta inconfesable canción do ferrolán Jesús Vázquez dános pé á derradeira noticia desta semana. A famosa actriz Sharon Stone, de visita en Israel convidada polo Centro Peres para a Paz, asegurou que está disposta a bicar a todo o mundo se cun bico dela se pode conseguir que remate o conflito palestino-israelí. Como proba disto, deulle un bico na meixela ao primeiro ministro Simón Peres, que estaba cabo dela durante a rolda de prensa que deu en Tel Aviv. O primeiro ministro israelí quedou agradablemente sorprendido polo xesto da súa convidada.
Stone fixo estas manifestacións coincidinco co día internacional da muller, que se celebrou o pasado mércores.

Unha muller agochou o cadáver do seu home no conxelador durante tres anos
Unha muller de 35 anos foi condenada a un ano de prisión condicional por ter agochado durante tres anos nun arcón conxelador da súa casa o cadáver do seu home. A sentenza non acusa a muller de asasinato, que non puido ser probado, senón só de profanación do cadáver.
Todo comezou o 30 de xuño do ano 2001, cando a vítima, Gonçalo Pereira Araújo, de 35 anos, volvía á súa casa en Jolda, no estremo norte de Portugal, despois dunha xolda por mor das festas patronais. Dende aquela, ninguén o volveu ver. A súa muller denunciou a súa desaparición perante a policía o 6 de xullo.
En xaneiro do 2002, ela deixou a casa para ir vivir con outro home e a compañía eléctrica cortou a luz. Máis de dous anos despois, alertado polo cheiro insoportable que procedía da vivenda, o irmán do desaparecido entrou e atopou o corpo. A muller foi acusada do asasinato do seu home, pero non se puido demostrar a súa culpabilidade. Ela botoulle a culpa a un amigo do seu marido co que el rifara.

A revista Playboy pagaralle os estudos a unha modelo expulsada do instituto
A edición polaca da revista Playboy anunciou este xoves que axudará economicamente a unha rapaza de 19 anos que foi expulsada do seu instituto despois de ter posado espida para a publicación.
Sylwia Preiss apareceu na portada do número de marzo de Playboy Polonia. Puco despois, mandoulle unha mensaxe á redacción na que comunicaba que a acababan de botar do centro de estudos, a tres meses de comezar os exames.
A revista decidiu que correrá cos gastos dunha escola privada para que Sylwia poida continuar cos seus estudos.
A modelo explicou no xornal Gazeta Wyborcza que o director da súa escola a acusou de terse comportado inmoralmente e sen ética, por ter posado para Playboy, nun país de profunda fe católica como Polonia, onde aínda non se leva a relixión pastafari.
O editor da revista, Marcin Meller, dixo que lle sorprendera a expulsión, dado que Sylwia é unha persoa adulta.

A muller máis vella do Brasil fixo este martes 126 anos
Maria Olívia da Silva cumpriu este martes 126 anos, segundo informou o xornal O Estado de São Paulo. A celebración fíxose con torta e uns refrescos, que degustaron os seus numerosos familiares.
Maria Olívia está recoñecida como a muller máis vella do Brasil no libro RankBrasil, algo así como o Guinness dese país, e os documentos indican que naceu o 28 de febreiro do 1880 no interior de São Paulo, 8 anos antes da abolición da escravitude no Brasil.
A anterior muller máis lonxeva do Brasil fora Ana Martinha, que morreu no ano 2004 con 123 primaveras.
Maria Olívia vive no concello de Astorga, no estado de Paraná, nunha modesta casa de madeira.
As paredes do seu fogar están recubertas de recortes de revistas e xornais de todo o mundo que contan a súa fazaña.
Maria Olivia tivo 10 filos propios, máis catro adoptados e calcúlase que debe ter preto de 400 netos, bisnetos e tataranetos. O seu único fillo vivo é Aparecido Honório Silva, de 59 anos, o último que adoptou.

Laura Bush apréndelles aos nenos indios a contar ata 5 no ‘Barrio Sésamo’
Cando se estree este ano a versión india do programa ‘Barrio Sésamo’ os rapaciños deste país recentemente visitado polo presidente e a primeira dama estadounidenses poderán aprender a contar ata cinco grazas a Laura Bush.
A señora Bush centrou a súa axenda do xoves en actividades relacionadas coa infancia, entre as que se atopaba visitar o estudo no que se grava o ‘Barrio Sésamo’, alí chamado «Galli Galli Sim Sim». Nunha escena, Laura Bush saludou o público en hindí e despois axudou á nena Chamki, un dos personaxes principais, a contar ata cinco en inglés. Chamki presentouna dicindo «Esta é a miña nova amiga, a señora Bush».
Mentres George asinaba un histórico acordo que bendice a proliferación nuclear civil na India, a súa muller, algo máis dotada intelectualmente, saudaba ao personaxe Aanchoo, algo así como Espinete versión Galli Galli Sim Sim, asegurando que lle gustaba moito o peiteado do peludo boneco.
Desgrazadamente, desta vez o matrimonio Bush non tivo tempo de visitar o Taj Mahal. O primeiro ministro indio, Manmohan Singh, confiou en que George Bush sexa máis galante nunha vindeira ocasión.

Un estudante do INEF de Lleida denuncia a publicación en Internet de vídeos íntimos seus
Un estudante da Universidade leridá presentou unha denuncia perante os Mossos d’Esquadra ao comprobar que circulan pola internet 13 vídeos con imaxes de relacións sexuais del coa súa moza. O rapaz, que estuda cuarto do Institut Nacional d’Educació Física de Catalunya, explicou na súa denuncia que perdeu un lapis de memoria cos atrevidos vídeos coa súa parella, que estuda en Barcelona, na sala de informática do centro e que logo viu como aparecían na internet todas as secuencias. Os vídeos, gravados de xeito caseiro pola parella, conteñen relacións sexuais deles en diferentes lugares da casa e mesmo conducindo un vehículo pola estrada, o que non recomenda a Dirección Xeral de Tráfico, aínda que de momento non está tipificado como falta, que saibamos.
As imaxes foron gravadas, ao parecer, por eles mesmos de común acordo cunha cámara de vídeo doméstico e logo descargáronas no ordenador e nun lapis de memoria. O mozo levaba habitualmente o obxecto ata o seu centro de estudos, en cuxa sala de informática o esqueceu. As gravacións pódense atopar en redes de intercambio de arquivos baixo o nome «vídeos inef».

Condoleezza Rice ensinará a facer ximnasia na televisión
A secretaria de Estado dos Estados Unidos, Condoleezza Rice, compartirá os seus trucos de ximnasia nun programa matinal da canle NBC. Cunha vestimenta moi diferente da que nos ten acostumados, Rice aparecerá nas pantallas facendo pesas e pedaleando nunha bicicleta estática.
A reportaxe gravouse a pasada fin de semana no ximnasio do Departamento de Estado, en Washington, e emitiuse o mércores, xoves e venres no programa NBC4 Today.
Adam Ereli, voceiro do Departamento de Estado, dixo que querían facer unha noticia sobre a súa rutina deportiva e iso foi o que amosaron. Rice é unha secretaria de Estado «activa» que encabeza unha diplomacia «muscular e áxil».
Rice ten o costume de erguerse todos os días antes de saír o sol, como miles de galegos, para facer unha completa táboa de exercicios de entre 45 minutos e unha hora de duración.

Un produtor escocés destilará un whisky de 92 graos
A destilería independente escocesa Bruichladdich, unha das oito da pequena illa de Islay, destilará o luns 12 barrís de whisky de 92 graos de alcohol, baseándose nunha receita do século XVII. Para facer público tal acontecemento, conectará cámaras web para que todo o mundo o poida seguir en directo, a non ser que a destilería estoupe durante o proceso.
Os whiskys escoceses e outros puros de malta adoitan ter entre 40 ou 50 graos de alcohol, o que indica a porcentaxe desta substancia no volume total da bebida.
Pero este whisky destilarase catro veces en lugar de dúas e poñerase á venda dentro dunha década.
Segundo a receita tradicional, do ano 1695, este whisky afecta a todos os membros e dúas culleradas son unha dose suficiente. Se un home bebe máis, deixaría de respirar.
E con esta nova despedimos por hoxe este espazo informativo. O vindeiro domingo, máis. Feliz semana, e non beban moito whisky.

Prohíben unha exposición de camisetas provocadoras en Polonia
Unha universidade polaca prohibiu unha exposición de camisetas por entender que as mensaxes que tiñan estampadas resultaban demasiado provocadoras. Textos como “eu non chorei cando morreu o Papa” ou “teño sida” poderían ter ofendido os sentimentos e crenzas de moitas persoas, segundo afirmou Wieslaw Kamiski, rector da universidade UMCS, ao sureste da cidade de Lublin.
A exposición amosaba personalidades polacas vestidas con camisolas con temas xeralmente considerados tabú para a igrexa católica, como “son gay”, “son xudeo”, “son árabe”, “mastúrbome” ou “teño a regra”.
Segundo o bispo de Lublin, Jozef Zycinski, “para escribir ‘teño sida’ ou ‘abortei’ nunha camiseta, esa persoa tería que estar desprovista de todos os sentimentos humanos”.
As camisolas foran deseñadas para un festival de cine organizado pola federación internacional de Helsinki polos dereitos humanos en Polonia, que foi cancelado en sinal de protesta pola censura da exposición.
O director da federación organizadora, Marek Antoni Nowicki dixo que o obxectivo da mostra era tentar crear debate sobre a liberdade de expresión en Polonia.

O uso da palabra “merda” carréxalles multas ás televisións nos Estados Unidos
Dende a toma de posesión de Kevin Martin como presidente da comisión federal de comunicacións dos Estados Unidos, FCC, aumentou o esforzo por controlar o que se considera indecente nos medios de comunicación norteamericanos.
A FCC inclúe o uso da palabra “merda” entre as infraccións contra a decencia que poden supoñer importantes multas en metálico.
A primeira vítima desta medida foi a pseudofamosa Nicole Ritchie, que empregou a palabra ‘shit’, denominación vulgar inglesa para os excrementos, na súa aparición en directo na gala de entrega dos premios musicais Billboard, que se emitiu pola cadea Fox no ano 2003. A inminente sanción administrativa que lle agarda á canle fai prever que proximamente haxa moitas máis, pois varias televisións están a agardar un ditame por infraccións semellantes.
Esta cruzada pola decencia que está a levar a cabo a FCC fíxose máis patente o pasado mes de marzo, cando Kevin Martin tomou posesión como presidente do organismo co respaldo da Administración Bush.
Espérase que a FCC ratifique a sanción á CBS cunha multa de medio millón de dólares polo escándalo sen precedentes que causou hai dous anos a cantante Janet Jackson cando se lle viu un peito no descanso da Superbowl.

Desartellada en Nova York unha banda que roubaba partes de cadáveres para revendelas para transplantes
As autoridades de Nova York procesaron esta semana catro individuos acusados do delito de roubar partes de máis de mil cadáveres para vendelas con destino a transplantes médicos lexítimos. Entre as vítimas da trama, que actuaba baixo a cobertura da compañía BioMedical Tissue Services, atópase o corresponsal da BBC Alistair Cooke, que morreu hai dous anos en Manhattan.
O líder da banda é o dentista Michal Mastromarino, que se reconverteu ao negocio de colleitar pezas humanas tras perder a súa licenza por neglixencia profesional. Axudábanlle os “cortadores” Lee Crucetta e Christopher Aldorasi e o embalsamador Joseph Nicelli. O grupo, con contactos con varias funerarias, accedía á materia prima a cambio dunha comisión de mil dólares (841 euros) por cadáver.
A empresa criminal, coa axuda de permisos falsificados, chegou a obter varios millóns de dólares vendendo partes humanas a clientes dos Estados Unidos, Canadá e Europa que descoñecían a procedencia dos xeonllos, ósos de toda clase, pel, tendóns, implantes dentais e válvulas cardíacas.
Os fiscais descubriron que os criminais enchían os ocos dos cadáveres con luvas, mantelos e outros utensilios para recrear o seu volume durante os velorios. Ademais, substituían os ósos con tuberías de PVC.
O descubrimento dunha sala de operacións secreta nunha funeraria de Brooklyn serviu como pista para destapar a trama.
A Administración Federal de Alimentos e Medicamentos, FDA, ordeou a retirada dos órganos subministrados por esta banda, xa que non cumpren os requirimentos sanitarios. Tamén lles recomendou ás persoas que recibiron transplantes que se sometan a análises para descartar o contaxio de enfermidades como a sida, hepatite ou sífile.

Atopan un zapato milenario baixo o xeo canadense
Un mocasín de coiro de 1.400 anos de antigüidade foi descuberto no territorio do Yukon, ao noroeste do Canadá, o que supón o calzado máis antigo atopado nese país.
O calzado achouno no ano 2003 un grupo de buscadores que rastrexaban unha zona onde se produciu o derretemento de xeos de hai 9.000 anos por mor do quecemento global. Primeiro pensaron que era a bolsa dun cazador, polo que o mantiveron conxelado ata hai pouco, cando os arqueólogos o limparon e recompuxeron.
O zapato será unha peza moi valiosa para coñecer a vida cotiá do seu propietario, pois é de uso diario, segundo a conservadora patrimonial de Yukon, Valery Monahan, que traballou 240 horas limpando e recompoñendo a peza.
Estaba cuberta de excrementos e de balor, parecía ter sido amañada dúas veces e tiña novas costuras e un remendo na sola.
Na zona xa se atoparon no ano 97 as primeiras ferramentas e bosta de caribú. Dende aquela apareceron máis de 180 utensilios e armas, algúns de máis de 8.000 anos de antigüidade.

Liza Minnelli vende a súa casa coa súa madrasta dentro
A cantante e actriz estadounidense Liza Minnelli puxo á venda a mansión do seu pai por tres millóns e medio de dólares, case tres millóns de euros, pero coa súa madrasta de 98 anos dentro. A casa era de Vincente Minnelli, pai da actriz, que morreu no ano 1986 aos 83 anos deixándolla á súa filla, pero cunha condición: que a súa viúva, Lee, permanecese nela o resto da súa vida.
E así será. Quen merque a casa recibirá conxunta e inseparablemente á señora Minnelli.

Deportes: descualificada por confundir o son dun móbil co da saída
A deportista sueca Sara Fischer foi eliminada este xoves por saír antes de tempo na segunda manga de clasificación do eslalon xigante paralelo de snowboard nos xogos olímpicos de Turín, por confundir o timbre dun teléfono móbil co sinal de saída.
A esquiadora sueca, de 25 anos, dixo: “mentres soaban os ‘bips’ de saída, soou o teléfono dun oficial e saín crendo que era o último bip. Pero a porta seguiu pechada e caín. Erguinme inmediatamente e seguín. Non debera de telo feito”.
Sara Fischer amosou a súa tristiura porque levaba catro anos agardando esa carreira, pero asegurou que como estudante de medicina ten visto xente en situacións moito máis tráxicas, polo que non se vai queixar.
A deportista fixera o 14º mellor tempo de 30 corredoras na primeira manga e tiña opcións de chegar á final.