Trece taxistas chineses obrigan unha muller a dar a luz na rúa por unha superstición.
Unha muller tivo que parir na rúa despois de que a botaran do taxi no que viaxaba e de que outros doce taxistas fixeran o mesmo, pois segundo a superstición chinesa, derramar sangue nun coche dá un ano de mala sorte, informou o xornal China Daily.
Os feitos aconteceron en Chonqing, no suroeste da China, cando Wang Taohua se dirixía ao hospital despois de romper augas. A pesar de que o seu home, Huan Wencheng, tentou conseguir outro taxi, mesmo pagando de máis, ningún dos choferes aceptou levala ata o seu destino. No medio da atafegante calor, varios viandantes montaron un paritorio improvisado, e unha anciá fixo de matrona. Aínda que o hospital se atopaba a 200 metros de distancia, a ambulancia tardou dúas horas en chegar.

Un home mata o seu irmán confundíndoo cunha cabra.
O estraño suceso ocorreu en Isseluku, ao sur de Nixeria. Un home, cuxa identidade non se facilitou, sospeitoso de ter asasinado o seu irmán cunha machada, asegurou que el en realidade atacara unha cabra, que despois se converteu no cadáver do seu parente.
En Nixeria ás veces os sospeitosos de asasinato aseguran que foron os espíritos os que os induciron a cometer os crimes, nun país onde moita xente cre na maxia negra. No ano 2001, oito persoas foron queimadas vivas despois de que un membro do grupo fora acusado de facer desaparecer por arte de maxia o pene dun espectador.

Non cambiamos de tema. Un home pide que lle retiren o pene que lle transplantaran.
Un chinés de 44 anos que fora receptor do primeiro transplante de pene pediu que llo volvesen retirar un mes despois da operación, porque tanto el como a súa muller se enfrontaran a un profundo problema psicolóxico co novo órgano.
O membro do home fora destruído nun accidente, que o deixara cun toco de só un centímetro, o que lle impedía urinar e manter relacións sexuais, segundo informou o xornal británico The Guardian.
Médicos do hospital xeral de Guangzhou pasaran 15 horas conectando un pene de 10 centímetros doado por un mozo de 22 anos ao home que sufrira o accidente. A pesar de que a operación foi un éxito e non houbo rexeitamento físico do órgano, os problemas psicolóxicos sufridos polo receptor e a súa muller, obrigaron a amputarlle de novo o pene.

Unha muller italiana ofrece sexo a cambio dun traballo fixo
Conseguir un emprego é cada vez máis difícil. Unha muller italiana de 30 anos, Sara Ferreti, abriu un blog na internet no que se ofrece para unha noite de sexo a cambio dun contrato de traballo fixo e un soldo de 1.200 euros mensuais. Na bitácora, denominada, saradisperata, a muller asegura que a acción é o derradeiro cravo ardendo ao que se pode agarrar para se programar un futuro, uns fillos e unha casa. Segundo informou o xornal La Repubblica, Sara non busca a fama, e apunta a posibilidade de que se trate dun fraude publicitario máis dos que circulan pola rede, aínda que descarta esta posibilidade. O diario persoal non ten publicidade e emprega unha plataforma gratuíta de publicación de blogs.

Fabrican a marmelada máis cara do mundo, a 1.630 euros o frasco.
A marca británica de confeituras F. Duerr & Sons vai celebrar o seu 125 aniversario fabricando a marmelada de laranxa máis cara do mundo, segundo informou The Daily Telegraph.
Cada frasco terá un prezo de 1.100 libras, 1.630 euros, e conterá un produto de alta calidade. As laranxas, procedentes de Sevilla, estarán mesturadas con whisky Dalmore 62 da casa Whyte & Mackay que costa 47.400 euros a botella, champán Pol Roger Cuvée Sir Winston Churchil e pan de ouro de 24 quilates.
Segundo os cálculos do xornal, untar unha torrada con esa marmelada custará 113 euros.
Nun principio, a intención dos fabricantes fora facer un quilo de marmelada para poñelo a poxa na internet e conseguir fondos para unha organización benéfica de Manchester. Pero o presidente da compañía quedou tan impresionado polo seu sabor que pensou en poñela á venda.

O cantante Marc Anthony asegura que Rocío Dúrcal lle mandou unha canción dende o alén
Segundo informou a cadea MTV, Marc Anthony asegura que Rocío Dúrcal se lle apareceu en soños e lle pediu que escoitara unha canción que fixera para a súa muller, a cantante e actriz Jennifer López.
Anthony asegurou que o estraño soño se produciu dúas semanas despois do pasamento da cantante española. Segundo a súa versión, o compositor ergueuse e gravou a súa voz no contestador tarareando a canción da que Dúrcal lle dixo ata o título, «Qué hiciste».
J. Lo estivo varios meses pensando que podía facer con aquela canción ata que se decidiu a incluíla no seu último disco en español, «Cómo ama una mujer».

Os informáticos prefiren vestir vaqueiros negros e camisetas de grupos heavys como Megadeth.
Segundo un estudo levado a cabo pola empresa de hosting Internedia.net, a indumentaria favorita dos informáticos son camisetas de grupos heavy e pantalóns vaqueiros negros.
A conclusión do traballo di que os profesionais que traballan no sector das tecnoloxías da información, tanto técnicos, como programadores e encargados de dar apoio, son dúas veces máis propensos a empregar camisetas de grupos de heavy metal ca os empregados noutras áreas do mercado.
Ademais, os vaqueiros negros son unha parte indispensable da súa vestimenta, e, por se fora pouco, teñen un 32% menos de posibilidades de se cambiaren de roupa todos os días.
Outros elementos identificadores desta profesión son o cabelo longo recollido, linternas Maglite, navallas Leatherman, reloxos caros e pinzas nos cintos para levar o móbil.
O grupo que aparece con máis frecuencia nas camisolas é o que están a escoitar, Megadeth.

O príncipe William de Inglaterra foi a unha festa vestido de moza Bond en bikini
William, o máis vello dos fillos de Carlos de Inglaterra, causou sensación nunha festa de disfraces cando apareceu caracterizado como moza Bond, vestido cun bikini. Á festa, que se celebrou en Sandhurst, tamén asistiu a súa moza, Kate Middleton, disfrazada do axente 007, con smóking e unha pistola de xoguete.
Algúns asistentes á festa declararon ao xornal popular The Sun que a parella estivo moi simpática e o príncipe pasou toda a noite cos xestos típicos dunha moza Bond mentres Kate lle daba a réplica ao estilo 007.
A William fáltanlle dous meses para se licenciar na academia militar, na que está a seguir un adestramento moi duro.
O seu irmán Harry creou moita polémica nos últimos meses no Reino Unido por se ter disfrazado de nazi e ter levado unha camiseta do Che Guevara.

Unha anciá tenta roubar un banco cunha pistola de plástico
Unha muller de 79 anos foi detida por tentar roubar un banco en Chicago cunha pistola de plástico. A señora dirixiuse o martes a unha sucursal do Bank of America vestindo un impermeable negro e unha viseira que poñía «princesa».
Dentro da oficina, a muller pediulle ao caixeiro que se achegase a ela porque non podía falar moi alto, que viña do dentista. E logo murmurou: «déame 30.000 dólares», amosándolle un revólver que levaba nunha bolsa de plástico.
Pero o caixeiro decatouse de que era unha arma de xoguete, polo que premeu o botón de alarma silenciosa.
A anciá, que marchara do banco a pé e sen os cartos, non se resistiu cando foi detida nunha tenda próxima. Despois quedou en liberdade baixo fianza de 4.500 dólares. A súa filla fíxose cargo dela.
Se se recoñece culpable, a muller pódese enfrontar a unha pena de ata 20 anos de cadea.

Unha muller pasou 26 anos pechada na casa por medo a enfermar
Unha muller italiana pechouse na súa casa cando tiña 30 anos. Agora ten 56. Vive na localidade adriática de Macerata, 200 quilómetros ao sur de Roma. Paradoxalmente, atopárona nun moi mal estado de saúde: pesaba só 30 quilos e tiña unha melena de máis de dous metros de longo.
A muller, que se chama Carmela, estivo a metade da súa vida coas xanelas precintadas, sen ningún contacto co exterior. Só se comunicaba por teléfono, pois non se quería contaxiar polo aire, nin darlle a man a ninguén. Segundo explica o xornal La Repubblica, Carmela pasaba o tempo escoitando a radio e vendo a televisión. Un irmán deixáballe na porta da casa alimentos esterilizados que lle permitían sobrevivir.
Pero a súa vida de reclusión rematou debido a que lle pasou o que non tentara evitar: enfermou. Cando os carabineiros, os bombeiros e os médicos entraron na casa, tiveron que poñer máscaras debido a que o aire alí dentro era irrespirable. As autoridades xudiciais ordenaron o ingreso da muller nun hospital.

A modelo británica Kate Moss sae á rúa cun bolso que costa 4,50 euros
A supermodelo británica cambiou por un día os complementos de luxo por un bolso moito máis económico, de só 4,50 euros. Por se isto fora pouco, Kate Moss esquecera retirar a etiqueta co prezo cando saíu á rúa.
A modelo adoita levar bolsos valorados en 600 euros, de deseñadores como Mark Jacobs, pero esta vez foi retratada cun bastante máis económico á saída dunha festa que daba unha tenda de lencería en Londres.
Moss, de 32 anos, levaba uns pantalóns e camisa negros, combinados cun bolso de tea co fondo branco e motivos florais arredor dun rostro feminino, da popular cadea de produtos de beleza e saúde Superdrug.
A tenda xa se está a preparar para recibir unha avalancha de pedidos de xente que quere imitar á idolatrada modelo.
Pero todo parece ter unha explicación: ao mercar este produto, Kate Moss, que gaña millóns en campañas publicitarias, contribuíu a unha causa solidaria na que participa a cadea Superdrug: recadar fondos co motivo do trixésimo aniversario do Prince’s Trust, organización benéfica creada por Carlos de Inglaterra para apoiar a novos artistas.

O exército dos Estados Unidos pensa crear un parque temático como Disneylandia
O exército norteamericano está a estudar a posibilidade de crear un parque temático dedicado ás actividades militares. Unha promotora privada propúxolle crear unhas instalacións que incluirían viaxes nun helicóptero de ataque Cobra e bares nos que habería un pavillón da primeira división.
Un masivo complexo hoteleiro e de ocio próximo ao museo nacional do exército podería atraer a máis dun millón de turistas ao ano, pero as autoridades do condado de Fairfax, onde estaría situado, rexeitan o aumento do tráfico que isto supoñería.
A empresa Universal City Property Management III, de Orlando, Florida, foi a autora da idea, que xa enviou o ano pasado. A promoción inclúe lemas como «podes comandar o máis moderno tanque M-1, sentir a adrenalina dun salto en paracaídas, pilotar un helicóptero de ataque Cobra ou defender o teu bombardeiro B-17 como artilleiro dorsal», informou o Washington Post.
Aínda que o condado de Fairfax non ten autoridade sobre as instalacións, propiedade federal, o seu supervisor, Dana Kauffman, explicou que non teñen ningún interese en transformar o museo nun Disney en pé de guerra.
A iniciativa coincide co espírito reclutador do exército estadounidense, que xa lanzou hai un ano o videoxogo America’s Army, co que tenta atraer a mocidade ao servizo militar. Os institutos do país son visitados regularmente por reclutadores, que informan e mesmo perseguen aos posibles candidatos.

Imaxes pornográficas cóanse na apertura de curso da Academia de Policía Local de Madrid
Unha escena de sexo foi o primeiro que puideron ver os 120 aspirantes a sarxento, en lugar dun vídeo sobre actividades da academia.
Ás dez da mañá, o auditorio quedou a escuras e ensilencio, mentres baixaba do escenario unha gran pantalla. Primeiro apareceron os escudos oficiais e, inmediatamente, as imaxes porno. As gargalladas do público foron aumentando a medida que a persoa que manexaba o ordenador tentaba paralas. Cada vez xurdían máis fiestras con páxinas pornográficas. Pero, ao final, a situación corrixiuse e púidose proxectar o vídeo correcto.
Estase a investigar como puideron chegar esas imaxes ao ordenador, pero non se puido saber se se debeu a un fallo técnico ou a unha acción premeditada de alguén, dado que o aparello non está adscrito a ningún funcionario.
As fontes oficiais quixeron deixar claro que esas imaxes non formaban parte do vídeo oficial de actividades da academia.

Unha ministra británica recomenda non cear de pé porque engorda
Tony Blair, primeiro ministro do Reino Unido, nomeou a Caroline Flint como a primeira ministra do fitness da historia, e que xa está a estudar medidas para fomentar os bos hábitos alimenticios.
Segundo as estatísticas, no ano 2010 haberá na Gran Bretaña 12 millóns de obesos. Un dos datos máis alarmantes é que no 60% dos fogares non hai unha mesa para xantar e cear en familia, o que leva a que moitas persoas inxiran calorías de xeito desmedido.
A situación é máis grave aínda en Escocia, onde o sal, o azucre e o alcohol teñen unha presenza excesiva na dieta diaria. Ademais, o plato nacional escocés parece ser unhas barriñas de chocolate fritidas con manteiga. Os adolescentes de Escocia son os que beben máis refrescos con azucre do mundo, despois dos israelís, e hai barrios de Glasgow onde as expectativas de vida se sitúan en niveis do terceiro mundo.

Inauguran na Arxentina un cemiterio especialmente ideado para seareiros do Boca Juniors
Os fanáticos do club arxentino poderán levar as cores azul e dourada ata o alén. O camposanto para os seareiros do Boca Juniors está situado nun sector do cemiterio Parque Iraola, en Berazategui, ten capacidade para 3.000 parcelas e está adornado con flores nas que predominan as cores do club: o azul e o amarelo, ademais dun grande escudo do equipo.
Segundo o dirixente Orlando Salvestrini, este é un xeito de canalizar a necesidade dos afeccionados. Deste xeito, cumpren co himno das bancadas no que cantan «nin a morte nos vai separar, dende o ceo voute alentar». Mesmo, algunhas zonas do cemiterio terán céspede procedente da Bombonera.
Esta é outra máis das moitas iniciativas postas en marcha polo Boca, como unha cadea de televisión, tarxetas de crédito, unha empresa de taxis ou diversos produtos de márketing.

Pelexan en Londres o ex-futbolista Paul Gascoigne e o cantante Liam Gallagher, de Oasis
Segundo contou o xornal sensacionalista británico Daily Star, Gallagher e Gascoigne coincidiron hai uns días no exclusivo club Groucho, de Londres. Alí comezaron a falar amigablemente, pois os dous son coñecidos.
Sen que se saiba exactamente por que, segundo unha testemuña, os dous comezaron a discutir, os ánimos acendéronse e acabaron pelexando. Segundo outra persoa supostamente presente no lugar dos feitos, houbo puñadas, e, ao final da liorta, Liam Gallagher tentou calmar a Gazza zurrichándoo co extintor de incendios. Segundo esta testemuña, os feitos acabaron resultando divertidos.

Deteñen un atracador que roubou 40 euros e fuxiu nunha bicicleta
Os Mossos d’Esquadra detiveron un veciño de Granollers de 41 anos que o xoves asaltou un banco de Canovelles, de onde roubou 40 euros e logo fuxiu montado nunha bicicleta.
O atraco produciuse arredor das dez menos vinte da mañá, cando un home con actitude sospeitosa entrou na entidade e tentou poñer unha media de lycra na cabeza. Como non o conseguiu, púxose nervioso e ameazou os empregados cun obxecto que tiña agachado no peto. Un dos traballadores accedeu a derlle unha caixa de moedas ao asaltante, que levou uns corenta euros e fuxiu nunha bicicleta.
Pouco despois, a policía autonómica catalá localizou na rúa Diagonal un home circulando en bici e que se correspondía coa descrición do asaltante.
Tentou fuxir dos axentes pola beirarrúa, pero ao final foi detido. Levaba dúas medias de lycra, unha navalla e moedas gardadas nos petos.
Venden na internet un sándwich adentado por Britney Spears
520 dólares, algo máis de 400 euros, foi o prezo acadado por un bocadillo mordido pola célebre cantante Britney Spears, nunha poxa que se celebrou a semana pasada no portal eBay. O comprador de tan desexado sándwich foi a casa de apostas Golden Palace, que xa mercara outros obxectos de Britney.
O camareiro dun restaurante no que comeron Spears e Kevin Federline recolleu as sobras dun sándwich dela e dun cachorro do seu home. Antes de botalos ao lixo decidiu sacalas a poxa en eBay.
O comprador dese bocadillo xa adquirira anteriormente cuspe e urina da estrela do pop. O voceiro de Golden Palace chegou a facer unha brincadeira coa posibilidade de chegar a clonar a Britney moi pronto.

E algo máis lle custou a un bilbaíno unha cea para dous: 3.300 euros
Un empresario biscaíño, Íñigo Llerena, pagou 3.300 euros por unha cea no restaurante de Ferrán Adrià, El Bulli, por ser o que máis cartos ofreceu nunha poxa benéfica organizada polo club de golf La Quinta de Marbella, e na que participaron outros empresarios, banqueiros e aristócratas.
Llerena poderá gozar de 33 pratos, entre os que se inclúen lingua de gato de ananás ao anís estrelado, brioche ao vapor de mozzarella ao perfume de rosas, ventresca de xarda en escabeche de polo con cebola e caviar de vinagre ou gin-tónic de cogombro.
Os 3.300 euros que pagou supoñen dez veces máis do prezo habitual do menú degustación do restaurador catalán. O destino do diñeiro será axudar a investigar no tratamento da epidermiolose bullosa, enfermidade coñecida tamén como síndrome da pel de bolboreta.
Aínda así, esta cifra queda moi lonxe dos 620.000 dólares que pagou no mes de xullo Yongpin Duan, investidor californiano de 45 anos, por cear con Warren Buffett.

Deteñen en Croacia seis mozas españolas por desvergoñados contactos sexuais
Seis turistas españolas foron detidas o luns no porto croata de Split e, con toda probabilidade, terán que pagar unha multa por ter practicado o que a policía considera «contactos sexuais desvergoñados». Segundo un voceiro do corpo, Ninoslav Auria, as mozas «bañábanse espidas, bicándose e tocándose por todo o corpo, provocando reaccións de protesta dos outros bañistas».
O conflito estalou cando dous homes, de 63 e 41 anos, bateron en dúas das mulleres, no cu e na perna, e lle deron unha labazada a outra. Estes dous homes tamén serán procesados.
A prensa croata fíxose eco da nova con titulares como «Seis españolas detidas por se tocaren espidas na praia», «Lesbo show en Split» e «Orxía de españolas espidas na praia».
Segundo a prensa do estado adriático, testemuñas dos feitos aseguran que o espectáculo durou case unha hora e media. Eran seis mulleres de entre 27 e 33 anos e aspecto punk, que ademais ían acompañadas de catro cans que andaban ceibes pola praia.
No xornal Slobodna Dalmacija, de Split, as mulleres defendéronse asegurando que foran atacadas porque só querían espantar un home que se masturbaba na praia xunto a ellas.

No 2008 despegará o primeiro avión nudista
Varias organizacións naturistas internacionais fretarán no ano 2008 o primeiro avión nudista, que será empregado para trasladar ao Brasil os participantes europeos e os viaxeiros que o desexen ao Congreso Mundial da Federación Internacional. É probable que o voo despegue do madrileño aeroporto de Barajas, para o que xa se está a negociar con varias compañías aéreas.
Así se anunciou no decurso do congreso internacional que se está a celebrar dende o xoves en Cartagena, Murcia.
O voo será o primeiro no que os pasaxeiros poderán ir espidos. Só terán a obriga de levar o cinto de seguridade.

Culpan de fraude a propietaria dunha empresa de sondaxes. Ao parecer, mandáballes aos seus empregados que falaran con cans e gatos.
Tracy Costin, propietaria da empresa DataUSA Inc., que fixo enquisas para as campañas electorais de George W. Bush, o senador Joe Lieberman e outros candidatos, declarouse culpable de amañar os resultados dos traballos. De feito, ás veces recomendáballes aos seus empregados a falar con cans, gatos e mesmo gatocáns, para facer as enquisas, segundo a sentenza federal.
Por este delito, podería pasar ata cinco anos na cadea e pagar unha multa de ata 250.000 dólares. A sentenza coñecerase o 30 de novembro, pero Costin chegou a un acordo para declararse culpable e devolverlles a uns clientes 82.732 dólares polas sondaxes feitas entre xuño do 2002 e maio do 2004.
Actualmente, a empresa coñécese polo nome de Viewpoint USA.
O ditamen federal di que Costin ordeoulles aos enquisadores a fabricar os resultados, para o que podían falar con cans e gatos. O FBI calcula que a metade da información subministrada pola empresa á campaña de Bush era falsa.
Cando a empresa estaba atrasada nos prazos, falsificaba os resultados, cambiando o sexo ou a afiliación política dos entrevistados para cubrir as cotas marcadas. Outras veces, as respostas eran directamente inventadas.

Unha presentadora da CNN deixa o micro aberto cando marcha ao cuarto de baño… durante un discurso de George Bush
Os telespectadores estadounidenses saben agora que a presentadora da CNN Kyra Phillips adora ao seu home e pensa que a súa cuñada quere controlalo todo, porque xa o contou en directo dende un servizo por erro, mentres a canle emitía un discurso de George Bush. O presidente falaba dende Nova Orleáns coincidindo co primeiro aniversario do furacán Katrina, cando por riba da súa voz comezouse a escoitar a de Philips, chea de eco.
A tradución vén sendo: «A meirande parte dos homes son uns porcos. Pero eu teño moita sorte, porque o meu é guapo e cariñoso, sen ego, sabes? Un ser humano apaixonado, compasivo e estupendo. Os homes así son difíciles de atopar, pero existen».
Despois engadiu: «Os irmáns teñen que ser protectores, menos o meu, que o teño que protexer eu. Está casado, ten tres fillos, pero a súa muller quere controlalo todo».
Logo, Kyra foi advertida por unha compañeira de que deixara o micrófono aberto.
A CNN emitiu posteriormente un comunicado no que explicou que tivera problemas co son durante o discurso, polo que se desculpou diante dos televidentes e do presidente.

Os marines estadounidenses obrigaron a Sadam Hussein a ver a súa caricatura en South Park
Matt Stone, creador de South Park, desvelou na web Hollywood.com que os soldados norteamericanos obrigaron ao ex-ditador iraquí a ver a versión cinematográfica da serie, estreada no ano 1999 e na que o diaño se aliaba con Sadam para dominar o planeta e torturar os seus habitantes.
Stone, que foi tamén o encargado de darlle voz a Hussein no filme, confiou en que lle gustase moito ao ex-ditador ver unha obra que foi prohibida en Iraq precisamente porque o retrataba como homosexual e sadomasoquista.
A película, titulada South Park: máis grande, máis longa e sen cortes, estivo nominada ao Óscar á mellor canción. Os seus creadores, Matt Stone e Trey Parker, acudiran á gala ataviados cos vestidos que levaran anteriormente Jennifer López e Cameron Díaz.

Expertos británicos aseguran que beber té é mellor que beber auga
A Revista Europea de Nutrición Clínica publica un traballo no que se asegura que o té non deshidrata e ademais prevén contra enfermidades coronarias e algúns tipos de cancro. Segundo a investigación, os flavonoides que conteñen as follas de té contribúen a previr o desgaste das células. A nutricionista Carrie Ruxton e os seus compañeiros do King’s College de Londres, financiados pola asociación do té, chegaron á conclusión de que beber entre tres e catro cuncas ao día reduce as probabilidades de sufrir un ataque cardíaco. Outros dos seus beneficios serían protexer contra a placa dental e fortalecer os ósos.
Segundo Ruxton, beber té é mellor que beber auga. A auga recupera os fluídos corporais, mentres que o té, ademais, contén antioxidantes.
Aínda así, hai estudos que suxiren que o té pode reducir a capacidade de absorber o ferro, polo que non é aconsellable para as persoas con anemia.
Nos últimos anos, o consumo de té está a diminuír entre as novas xeracións británicas, que optan polas bebidas refrescantes.
A investigación recomenda tomar entre un litro e medio e dous de líquidos ao día, entre os que se podería incluír o té.

Unha muller chinesa provoca un accidente ao permitir que o seu can conduza
A axencia oficial China News informou este luns dun estraño suceso. A señora Li, habitante de Hohhot, na Mongolia Interior, tentándolle ensinar a conducir ao seu can, deixoulle o volante, o que rematou cun choque contra outro coche.
A muller defendeuse asegurando que o seu can é moi intelixente e que estaba afeito a mirala cando conduce e a xogar co volante.
O sábado ao mediodía, decidiu deixarlle conducir, aínda que ela seguiu usando o acelerador e o freo.
Pero a experiencia durou pouco, pois o automóbil chocou contra outro, sen causar feridos, afortunadamente. A nota da propia axencia chinesa tacha á muller de «absurda». Agora terase que facer cargo dos gastos de arranxo do outro coche afectado.

Deteñen un falso policía ao parar un axente auténtico
Shabod Hosseini, de 22 anos, que se facía pasar por policía, foi detido en California despois de tentar parar un automobilista que resultou ser un auténtico axente de paisano.
Un policía conducía o luns o seu coche por unha autoestrada ao norte dos Ánxeles (os dos Estados Unidos) cando un vehículo como os da policía, cunha luz sobre o panel, se puxo detrás del. Como pensou que era un compañeiro, saíu da estrada e parou.
Entón, a persoa que o seguía baixou e amosoulle unha insignia dorada, pedíndolle que conducira máis amodo no futuro, segundo contou John Balian, voceiro da policía de Glendale.
Entón, o auténtico axente pediulle que lle amosara outra vez a placa e o carné de profesional. O mozo volveu ao coche e fuxiu, pero o policía auténtico xa collera o seu número de matrícula. Hosseini foi detido o martes á mañá na súa casa. Segundo o código penal californiano, podería ser condenado a un ano de cadea e a pagar unha multa de 2.000 dólares.

Expoñen en Nova York unha escultura da primeira caca da filla de Tom Cruise
A pesar do celo co que Tom Cruise e Katie Holmes gardan a intimidade da súa filla Suri, nada o 18 de abril, por fin se poderá coñecer algo dela: a súa caca.
O escultor Daniel Edwards é o autor dunha obra de bronce que inmortaliza a primeira deposición sólida do bebé, e que será exhibida na galería Capla Kesting de Brooklyn. Edwars tamén é autor da polémica escultura a tamaño real de Britney Spears dando a luz sobre unha alfombra de pel de oso, e que se amosou na mesma sala de arte.
Segundo o director da galería, David Kesting, un molde de bronce da primeira caca dun bebé pode ser un recordo significativo para a familia, aínda que de momento non se puido localizar ningún voceiro do matrimonio para que comentase a obra.
A escultura venderase en eBay o mes que vén, e os ingresos destinaranse a axudar aos nenos necesitados. Aínda que esperan obter ata 30.000 dólares pola obra, onte xa se ofrecían 5.100.

Deportes: Lassi Etelätano vence o campionato mundial de lanzamento de móbil
O pasado sábado celebrouse en Finlandia unha nova edición do campionato mundial de lanzamento de móbiles, na localidade de Savolinna. O vencedor na categoría masculina foi o local Lassi Etelätano, que conseguiu guindar un modelo de Nokia a 89 metros de distancia. A gañadora feminina foi Eija Laakso, que bateu a marca mundial, con 50,83 metros.
A competición non só consiste en lanzar o móbil o máis lonxe posible, senón que tamén hai unha categoría de estilo libre, na que se premia a orixinalidade dos deportistas, quer pola súa vestimenta, quer polo xeito de facer os lances.
Os organizadores salientan que este deporte permite aplacar o estrés xerado por estes modernos aparellos.

Un veciño de Cáceres denuncia a Volta Ciclista por exceso de velocidade
Un home presentou unha denuncia na comisaría de policía de Cáceres pola alta velocidade coa que o pelotón da Volta Ciclista a España cruzou as rúas da cidade durante a final da cuarta etapa.
O denunciante expresou, asemade, o seu malestar polo corte de tráfico na avenida de Primo de Rivera (si, aínda se chama así), onde os rapaces gozaron durante o día dun parque infantil.
Os axentes que o atenderon cursaron a denuncia mentres escoitaban as explicacións do home, que estivo unha hora tramitando a queixa.

Comezamos, aínda que non é o habitual neste informativo, pola nosa terra. Retiran da venda unhas zapatillas que producen náuseas
Inspectores do Insituto Galego de Consumo están a buscar polas tendas unhas determinadas zapatillas de casa, de tela escura, sola plástica e forro interior amarelo que, ao parecer, poden causar nos seus usuarios dores de cabeza, mareos, náuseas e vómitos.
A Dirección Xeral de Consumo da comunidade de Madrid deu a alarma despois de recibir a reclamación dunha muller que sufrira estes síntomas despois de poñer ese calzado, que mercara nunha tenda de todo a cen.
O Centro de Investigación e Control de Calidade de Madrid descubriu que o produto contiña compoñentes químicos orgánicos volátiles capaces de producir malestar xeral e náuseas ao inhalalos.
As zapatillas ademais incumpren a normativa europea sobre etiquetado, polo que foron retiradas do mercado. A rede de alerta estendeuse a todas as comunidades autónomas. No caso de Galicia, aínda non se detectou ningún par nas tendas, pero existe a posibilidade de que se vendan nalgún tipo de feira ambulante.

Imos ata a China, fonte inesgotable de información. Ábrese un centro de viciados na internet en Xangai.
A cidade chinesa de Xangai abriu o seu primeiro centro de tratamento a adolescentes adictos á internet, que lles ofrece consello, libros e ordenadores. Pode acoller catro menores durante unha noite e pretende encher o espazo entre pais e fillos, segundo informou o xornal Shanghai Daily. O director de asistencia social do centro, Wang Hui, asegura que ningún dos rapaces é obrigado a ir ao centro, e que percorren cibercafés durante a noite para levar aos que aceptan libremente ingresar.
O goberno chinés está a lexislar para reducir o uso abusivo de xogos online en cibercafés, mediante fortes multas aos que lles permiten entrar aos menores.

Na China tamén hai estraños costumes. En Pequín queren prohibir os strip-tease nos funerais.
Parece que no rural chinés está implantado o costume de organizar strip-teases para animar os funerais, pero o hábito está ameazado de desaparecer, despois da detención de cinco persoas acusadas de organizar este tipo de espectáculos, segundo informou a axencia Xinhua.
O pasado luns, a televisión estatal emitiu unha reportaxe na que se criticaron as actuacións obscenas de dúas compañías de strippers nun funeral na provincia de Jiangsu. Nel participaron unhas 200 persoas, entre elas varios nenos. O costume de amenizar os funerais con estes actos xustifícase na crenza de que o finado será máis honrado canta máis xente acuda, e o espectáculo é un xeito máis de atraer público.
O rebumbio foi tal que xa se está a estudar a posibilidade de prohibir estas actuacións e mesmo se fixo público un número de teléfono de denuncia con recompensas para os delatores.

Detectan mensaxes satánicas en temas de RBD, o grupo da serie Rebelde
Varias páxinas web publicaron esta semana que o televisivo grupo musical mexicano RBD lanza mensaxes satánicas nas súas cancións se estas se escoitan ao revés. Frases como «Ven y abrázame, demonio», no tema Rebelde, que estamos a escoitar, ou «El malo me lleva», no titulado Sálvame pódense aprezar, segundo o club de fans chileno.
Nunha entrevista publicada pola axencia Notimex, a vicepresidenta desta asociación, Francisca Fabio, foi a que descubriu estas mensaxes, aínda que afirma que non cre que os rapaces sexan satánicos e que é posible que as cancións estean amañadas na internet. Pero todo apunta a que sexa un engano.
A discográfica EMI Music nega todo e deféndese argumentando que o disco xa se editou hai dous anos.
O coordinador dos clubes de fans oficiais de RBD no mundo, Joel Irigoyen, asegurou que este tipo de situacións se dan cando os artistas se fan famosos. O propio Irigoyen negou, ademais, que estea rexistrada ningunha Francisca Fabio como vicepresidenta do club de fans de Chile.

Un violinista toca música de Mozart, Bach e Beethoven para que as vides dean mellor viño
Un destacado violinista foi contratado pola empresa vitivinícola máis antiga de Alemaña, situada en Wurzburgo, para que, coa súa música, mellore a calidade das súas uvas e viños. Segundo o seu presidente, Michael Janson, se a música é boa para os seres humanos, tamén o é para as plantas.
Dende hai dous meses, chova ou dea o sol, o violinista Florian Meierott vai tocando polas vides, situadas na ladeira dunha montaña, interpretando concertos de Mozart, Bach, Beethoven ou Elgar.
Meierott asegura que moita xente fala coas plantas para que medren mellor, e el toca. Segundo el, o concerto para violín en la maior de Mozart ou algo de Bach teñen un efecto positivo sobre o viño, aínda que de momento non hai ningún estudo científico que o demostre.
As primeiras 10.000 botellas dunha edición especial da variedade sylvanes, coa imaxe do violinista na etiqueta, sairán á venda a comezos do 2007. E seguramente, non serán moi baratas.

Investigadores británicos aseguran que as vacas teñen distintos acentos
As últimas teorías dos especialistas na linguaxe da Universidade de Londres aseguran que as vacas, ao igual ca os seres humanos, teñen distintos acentos segundo a rexión na que vivan. Os expertos comezaron a investigar despois de que varios gandeiros lles falaran das diferenzas que atopaban no bruar dos animais segundo o lugar de procedencia.
O profesor John Wells asegurou que este fenómeno tamén se dá nas aves.
Os gandeiros do condado de Somerset son os que notaron este fenómeno, debido ao estreito vencello que teñen cos seus animais. Lloyd Green, granxeiro de Glastonbury, afirmou: «Eu paso moito tempo coas miñas vacas e, definitivamente, brúan co acento de aquí. Cando falei con colegas doutras zonas, dixéronme que notaran o mesmo ca min». Non sabemos se esta variedade de acentos, como a que existe cos humanos ingleses, é extrapolable ao resto da Terra.

Os estudos Paramount despiden a Tom Cruise fartos polo seu mal comportamento
Segundo The Wall Street Journal, o despedimento débese ao comportamento recente do actor, tanto pola súa defensa da Ciencioloxía, relixión á que pertence, como pola súa efusividade amorosa. O presidente da Paramount, Summer Redstone, asegurou que, por moito que o queiran a nivel persoal, sería erróneo renovarlle o contrato, pois a súa conduta non é aceptable para a empresa.
Tom Cruise, de 44 anos, protagonizou para os estudos norteamericanos éxitos como Misión Imposible, Top Gun ou Días de Trono, con grandes éxitos de recadación, o que o levaron ao primeiro posto do cine segundo a revista Forbes. Aínda así, non acadou ningún Óscar. A popularidade de Cruise baixou este ano nun 35% por culpa do seu comportamento público, segundo unha enquisa do xornal USA Today. O actor estase a comportar dun xeito estraño dende que casou con Katie Holmes.

Multan a traballadores chineses por iren ao baño
Unha fábrica de electrodomésticos da provincia de Cantón imponlles multas de 5 yuans (50 céntimos de euro) aos seus traballadores por iren ao baño en horario laboral. Segundo o xornal China Daily, a medida posta en marcha pola empresa provocou a furia dos empregados. Agora, os traballadores só poden usar os baños nas horas de descanso, agás emerxencias.
Ademais, os xefes de taller deberán aboar unha multa de 2 yuan por cada un dos empregados que deixe o posto. Segundo a compañía, deste xeito evítase que se distraian nas horas de traballo.
As autoridades laborais chinesas abriron unha investigación, pero no xigante asiático son habituais as xornadas de máis de 12 horas, sen seguridade social, vacacións nin condicións de seguridade e hixiene no traballo.

Unha mestra italiana déixalles unha herdanza de 25.000 euros aos seus alumnos
Unha mestra, que morreu aos 84 anos, deixoulles 25.000 euros de herdanza aos seus alumnos de primeiro curso do ano 1971 nunha localidade da rexión de Abruzzo, segundo informou o xornal La Repubblica.
Os antigos alumnos decidiron crear unha fundación benéfica para xestionar o destino deste diñeiro.
Iria Pierantoni nunca casou, e deixoulles os cartos coa condición de que non o empreguen individualmente e sigan unidos a través dos anos nos momentos de dificultade e en obras benéficas conxuntas.
Os antigos estudantes foron contactados por unha sobriña da mestra, que tamén forma parte do grupo favorecido. Só un quedou sen localizar.

Prohíben a venda de cans e gatos como mascotas na Meca
As autoridades da cidade saudí da Meca, a máis sagrada para os musulmáns, decidiron prohibir a venda dos cans e dos gatos como animais de compañía, segundo informou o xornal Arab News.
A Comisión para a Promoción da Virtude e a Prevención do Vicio fixo esta petición despois de notar que moitos mozos saían á rúa a pasear os seus cans, violando deste xeito as tradicións do reino.
O Islam considera impuros os cans, polo que moitas familias tradicionais musulmás non teñen estes animais na casa. No entanto, os textos sagrados non fan ningunha referencia aos gatos.
En Arabia Saudí interprétase de xeito estrito a lei islámica, e a policía relixiosa encárgase de facela cumprir. A cidade de Yeda, no mar Vermello, tamén decretou a mesma prohibición de ter mascota.

Coidado coa volta das vacacións. Un madrileño volve á casa e atópase con 157 multas do parquímetro.
Amador Campa, representante dos comerciantes do barrio de Fuencarral e activista contra os parquímetros, atopouse cunha sorpresa moi desagradable á volta das vacacións. En dez días, a súa caixa de correo estaba ateigada con 157 multas que supoñen unha débeda de 14.000 euros co concello. Ademais, o goberno municipal só permite que se recorran dez multas diariamente, polo que terá que acudir á oficina de reclamacións durante, polo menos, 16 días hábiles.
Amador Campa decidiu denunciar o concello polo que considera un abuso de poder, e advertiu de que cando todo o mundo regrese das vacacións e atope as multas, se vai armar unha boa. Moitos dos avisos carecen de xustificante e mesmo datan de cando aínda non había parquímetros.
Segundo o sancionado, o concello está a aproveitar o período de vacacións para deixar as cartas impunemente. A plataforma contra a regulación do estacionamento volverase reunir en setembro.
Amador Campa, que se encadeou no mes de xuño co seu compañeiro Jesús Otero a xeito de protesta, foi acusado daquela de romper parquímetros, aínda que as denuncias foron arquivadas por falta de probas.

Un cura de Burgos deixa a misa porque, segundo el, os fieis levantaron rumores infundados sobre el.
Alberto Barrilero Ortiz, párroco de Peñacoba, Burgos, saíu a pasada fin de semana da igrexa no medio da misa despois de acusar aos fregueses de levantar falsos rumores contra a súa persoa. Dende aquela, négase a oficiar máis actos relixiosos na localidade.
No momento de chegar á homilía, Barrilero detectou caras hostís entre o público, polo que se negou a seguir coa misa.
Unha vez fóra, os veciños pedíronlle explicacións sobre o seu comportamento, ao que o sacerdote contestou que algúns fregueses estaban a propagar o rumor de que el mantiña relacións sexuais cunha veciña, á que vai visitar porque está doente.
Alberto Barrilero Ortiz leva ano e medio ocupándose da parroquia burgalesa, ademais dos concellos de Hortezuelos, Hinojar de Cervera e Espinosa de Cervera.
O cura xa solicitou o seu traslado ao concello de Cilleruelo de Bezana, que se fará efectivo nun mes.

Inventan unha nova modalidade de roubo en Alemaña: con excrementos.
Un grupo de ladróns roubáronlle a un individuo alemán 7.500 euros empregando un novidoso método: botáronlle excrementos nas costas e logo ofrecéronselle para limpalo, aproveitando a ocasión para roubarlle os cartos sen que se dese de conta.
O home acababa de retirar 8.000 euros no banco para as vacacións, momento no que foi golpeado no pescozo co que describiu como feces humanas, segundo informou a policía da cidade de Gießen.
Xusto despois apareceron dúas voluminosas mulleres, que lle dixeron que viran a alguén facer as súas necesidades dende arriba, e comezaron a limpar as costas do home con papel de cociña. Logo uníuselles un terceiro individuo, que tamén ía armado co mesmo tipo de papel.
Cando o home marchou e quitou os pantalóns para limpalos, decatouse de que os amables viandantes lle roubaran 7.500 euros do peto de atrás.

Morre envelenado despois de beber unha apócema contra a mala sorte.
Un peruano de 55 anos, Luis Tello Camacho,morreu esta semana despois de beber unha suposta beberaxe para afastar a mala sorte. Os feitos aconteceron na periferia de Lima durante unha sesión espiritista.
A vítima contratara os servizos dun curandeiro de Huancabamba, famosa polos seus bruxos, para efectuar o ritual na súa casa.
Tello, acompañado do seu medio irmán e da súa cuñada, beberon a apócema, preparada a base de herbas descoñecidas polo chamán Florencio Suárez Zurita.
Cando a bebida comezou a facer efecto, os tres comezaron a sufrir convulsións e cólicos estomacais, polo que foron enviados a un centro médico, segundo informou a emisora Radio Programas del Perú.
Tello morreu polo camiño, mentres que o matrimonio se atopa hospitalizado. A policía peruana detivo ao curandeiro para determinar cal foi a súa responsabilidade na morte do seu cliente.

Un home trata de fritir os cinco gatiños do seu anfitrión
Os feitos aconteceron na cidade de Buffalo, no estado de Nova York. Un home que fora convidado a xantar á casa dun amigo tratou de fritir os cinco gatiños do seu anfitrión, segundo informou o xornal The Buffalo News o luns.
O home aproveitou un descoido do seu amigo para botar os seus cinco gatiños na tixola na que se estaban a fritir dúas costelas de porco. Os animais, que tiñan entre cinco e seis semanas, sufriron queimaduras leves, das que se están a recuperar nun centro de acollida a animais.
Pola súa banda, o home que tentou fritilos está á espera de recibir cargos por crueldade contra os animais.
Un funcionario municipal de control de animais, Charles Loubert, dixo: «é quizais un dos peores casos de crueldade animal que teño visto nos meus 26 anos de traballo. Non hai razón para facerlle iso a un gatiño indefenso».

E seguimos falando de comer, pero neste caso, o alimento preferido dos gatos. Récord no festival da sardiña de Portimão: come 50 en 15 minutos.
Un visitante do festival da sardiña, que se celebra anualmente na localidade de Portimão, no Algarve portugués, bateu este ano a marca de maior comedor de sardiñas asadas, pois inxeriu cincuenta destes peixes en tan só un cuarto de hora, segundo anunciou este martes a cámara municipal.
O home, do que non se facilitou o nome, conseguiu superar o récord do ano anterior, que fora fixado en 49 sardiñas en 15 minutos.
O festival gastronómico celébrase do 4 ao 13 de agosto, e este ano recibiu a visita de 74.500 amantes deste peixe, un 35% máis ca na edición anterior.

Unha pantasma dificulta a rodaxe do novo filme de James Bond
Técnicos, empregados de produción e actores do que será próximo filme de James Bond, Casino Royale, negáronse a filmar dentro dun avión no que din que hai pantasmas.
Varias escenas tíñanse que rodar dentro dun jumbo comisado no aeródromo de Dunsfold. Pero varios membros do equipo están convencidos de que dentro está a pantasma dunha muller que morreu dun ataque ao corazón durante un voo, segundo informou o xornal The Sun.
O voceiro do aeródromo, David McAllister, non quixo discutir sobre a reacción do equipo de produción, e dixo que estaba en coñecemento de que ese avión está encantado.
A nova versión de Casino Royale estará protagonizada desta volta polo actor británico Daniel Craig.

Un neno de 4 anos dirixía unha banda de delincuentes infantís
A policía da cidade polaca de Cracovia desmantelou unha banda infantil que se dedicaba a roubar a outros nenos. O seu líder era o máis pequeno de todos, tiña catro anos, segundo informou a emisora TOK FM.
Os feitos aconteceron no barrio de Nowa Huta, onde a policía comezou a recibir as visitas de pais denunciando que os seus fillos foran atracados.
Os pequenos delincuentes intimidaban aos outros nenos cunha navalla e unha porra. A banda estaba formada por sete cativos de entre catro e trece anos e operaba en parques e xardíns.
O neno de catro anos era o xefe da banda, dado que el era o que decidía que rapaces ían ser atracados e en que lugar.
Os habitantes do barrio están sorprendidos pola nova, pois os rapaces detidos, aparentemente, destacaban polo seu bo comportamento.

Berlusconi asusta aos veciños da Sardeña montando unha festa cun valso volcán. Foi unha mala idea.
Para celebrar o 15 de agosto, ao ex-primeiro ministro italiano Silvio Berlusconi non se lle ocorreu nada mellor que organizar unha festa chega de fogos de artificio, entre os que destacaba un pequeno volcán en erupción que expulsaba lava e muxicas.
Moitos veciños da zona próxima a Villa Certosa, no nordeste da Sardeña, asustados polo lume, chamaron aos bombeiros, a Protección Civil e ao Corpo Forestal, que acudiron rapidamente á casa de Berlusconi. O magnate da televisión privada italiana informou ás forzas antiincendios de que se trataba só de efectos especiais.
A finca de Berlusconi ten 50 hectáreas de arbustos, oliveiras centenarias e máis de 2.000 cactos e 400 clases de flores. A casa ten 27 dormitorios, cinco piscinas, un lago, un anfiteatro, un búnker e mesmo unha montaña artificial rodeada de oliveiras.

Multan por indecencia os organizadores dun concerto de The Pussycat Dolls en Malaisia
Os organizadores do concerto en Malaisia do grupo The Pussycat Dolls, coñecidas como as Spice Girls estadounidenses, foron multados con 2.725 dólares por unha actuación considerada sexualmente indecente polas autoridades, segundo informou o xornal Malay Mail.
Abdul Rhaman, do consello municipal de Subang Jaya, onde tivo lugar o concerto a finais de xullo, explicou que os motivos da sanción foron tanto a coreografía e xestos como as rechamantes prendas empregadas polo grupo, e que se caracterizan pola escaseza de material téxtil.
Pero as seis mozas non serán as que terán que pagar a multa, senón a compañía Absolute Entertainment, promotora que as contratou para o espectáculo celebrado no lago Sunway. Se non aboan a sanción, os responsables enfróntanse a unha pena de ata cinco anos de cadea.
Aínda que Malaisia é un estado islámico moderado, mantén unha censura moi estrita sobre o cinema, a televisión e os espectáculos en vivo.

Chamáns siberianos forman un sindicato contra os charlatáns
Os chamáns de Siberia crearon un centro para agrupar os bruxos e meigas auténticos e combater así os charlatáns, segundo explicou o seu presidente, Alexander Amagzáyev, da república rusa de Buriatia.
No centro participan chamáns, é dicir, persoas que teñen o poder de falar cos espíritos que habitan nos animais, plantas, seres inertes e astros, das repúblicas de Tuva, Yakutia, Buriatia e a rexión de Irkutsk, todas elas na Siberia.
Amagzáyev explicou que o chamanismo está ameazado polos impostores, polo que é preciso que os auténticos se unan para poder levar a cabo o seu labor. Prevese que este ano os chamáns de cada zona creen cadansúa organiación e, a partir delas, se cree un centro no que se agrupen todos os de Rusia e das veciñas Mongolia e China.
Ataviados cos seus traxes tradicionais, os bruxos ofician, no medio de fogueiras e bailes, a Kamlanie, rito tradicional para invocar os espíritos da Terra e do Universo para recuperar o equilibro entre o home e a natureza.

Un arxentino pide a vasectomía. Ten 44 anos e 37 fillos
Cleto Ruiz Díaz pediulle á xustiza que lle deixe someterse a unha vasectomía, operación que está prohibida na provincia na que vive, Corrientes, no nordeste da Arxentina. Cleto non quere procrear máis. O home traballa facendo obras temporais e asegura que se iniciou sexualmente aos nove anos, chegou a ter sete mozas ao mesmo tempo e viviu durante 14 anos con tres mulleres baixo o mesmo tempo.
Agora vive só con unha, Isabel, de 29 anos, coa que tivo oito fillos, dos que dous morreron. O nacemento do máis pequeno, Cletito, que ten labio leporino, levou ao seu pai a tomar a decisión de non ter máis fillos. Ruiz Díaz afirma que non se pode controlar cando se namora dunha muller e que non se pode permitir o luxo de mercar preservativos.
Grazas a esta petición, o parlamento arxentino aprobou esta semana unha lei que financiará as operacións de ligaduras de trompas e vasectomías, a pesar da oposición da Igrexa católica. A norma contempla que a cirurxía sexa gratuíta a petición do afectado, sen que sexa necesario o consentimento da súa parella, a autorización xudicial nin razóns médicas. Ata agora, estas intervencións só eran legais en oito provincias ademais da capital, Buenos Aires.

Nace un novo emprego na China: camareiros aos que se lles pode zoupar
Un bar do leste da China puxo en marcha un novo servizo para os seus clientes, que poden descargar a súa ira empregando os camareiros como saco de boxeo. A cafetería, situada na cidade de Nankin, chámase «O sol érguese sobre unha cólera apaciguada», e nela os clientes podenlles zoupar aos empregados, romperlles os lentes e berrarlles, todo isto pagando, claro. As tarifas tamén inclúen o dereito a escoller o vestiario dos camareiros, que pode ser mesmo feminino.
Os prezos poden ir dos 50 aos 300 yuans, (entre 5 e 30 euros). A información publicada polo xornal China Daily explica que os 20 empregados do bar son mozos con físico ben formado e idades de entre 20 e 30 anos. Todos eles están adestrados para soportar os ataques dos clientes, e levan protección durante o seu traballo. O propietario do bar, Wu Gong, de 29 anos, abriuno en abril inspirándose en negocios semellantes que xa existían no Xapón.

E a última moda nos Estados Unidos é dedicarse pola noite a ser unha estrela do rock
Millonarios executivos e políticos están a triunfar na noite estadounidense como roqueiros afeccionados. Estes emprendedores, de entre 40 e 60 anos, entre os que se atopan Paul Allen, cofundador de Microsoft e sétimo home máis rico do mundo, convértense á noite no que xa se deu en chamar roqueiros corporativos. Así, Paul Allen é guitarrista da banda Grown Men homes medrados, que xa publicou o seu primeiro disco, que se vende a prezo de ouro en Amazon.com.
A revista Forbes é a promotora da Batalla das Bandas Corporativas, un certame que se celebra anualmente no Rock and Roll Hall of Fame, e que este ano se disputará o 6 e o 7 de outubro.
É obrigatorio que os participantes sexan músicos afeccionados e que a metade de cada banda estea formada por membros da mesma compañía. En anos anteriores participaron grupos como The Off Wall Street Jam Band, composta por músicos de varias empresas da famosa rúa neoiorquina; o Parts Rock And Accessories Roll, da Harley-Davidson; Blue Truck, de American Express, e OVP, de British Petroleum.

Un mariñeiro que naufragou nun tifón chega á casa despois de tres meses
Os feitos aconteceron no Vietnam. Nguyen Van Huong, de 34 anos de idade, naufragou no mes de maio no primeiro tifón da tempada e perdeuse no alto mar. Tardou tres meses en volver coa súa familia, que xa oficiara un funeral. A súa muller, Nguyen Thi Nuong, que vive no centro do Vietnam, explicou que o regreso do seu home fora a maior sorte que puidera ter na vida. O primeiro que fixo o home ao chegar á casa foi retirar a súa foto do altar dos antepasados da familia.
O barco de Van Huong foi a pique no mar da China Meridional a causa do tifón Chanchu. O mariñeiro agarrouse a un bidón de auga potable, co que sobreviviu trece días. Un pesqueiro salvouno pero, como non tiña radio, non houbo xeito de comunicárllelo ás autoridades, polo que seguiu coa marea. O barco atracou en Danang, no centro do Vietnam, dous meses máis tarde.
Huong apareceu na casa o sábado pasado ás tres da tarde. A odisea que viviu fíxolle pensar en buscar un traballo na terra e deixar o mar.

Mick Jagger asiste a clases de voz despois de 35 anos de carreira musical
O vocalista dos Rolling Stones, Mick Jagger, de 63 anos, confesou que está a recibir leccións para adestrar a voz despois de 35 anos cantando. En declaracións á emisora Virgin Radio, Jagger afirmou que «máis vale tarde ca nunca» e que se leva sometendo a sesións de adestramento da voz dende hai dous anos. Estas leccións permítenlle quecer os músculos da gorxa, o que lle resulta moi útil, segundo afirma o propio Jagger. El mesmo asegurou que un pouquiño de adestramento vocal nunca vén mal, e aconselloulles aos novos cantantes que o practiquen: «Eu non o fixen, pero ti debes facelo».
O roqueiro dixo na entrevista: «cando cantas cada noite durante horas e horas, a voz cánsase, como se correras unha carreira», e por iso o prequecemento é unha axuda.

Un campesiño colombiano garda un Stradivarius que cambiou por café
Idiorne Agudelo, agricultor de 71 anos é dono dun violín Stradivarius fabricado no ano 1713 e valorado nun millón e medio de euros. O instrumento conseguiuno hai máis de 45 anos a cambio de café, pero agora non o quere vender porque, asegura, ten para el un gran valor sentimental.
Agudelo declarou no xornal colombiano «El Tiempo» que xa rexeitou varias ofertas para vendelo ou cambialo por unha casa e un coche, pois o violín, que toca ás veces, lémbralle súa nai. Nunha ocasión estivo a punto de desprenderse del pero, chegado o momento, rompeu a chorar e non puido facelo.
A muller de Agudelo, Nelly Molina, tentou convencer varias veces ao seu home para que vendera o Stradivarius e así cambiar a súa humilde casa, na que viven no poboado de Montenegro, ao oeste de Bogotá.

Escándalo nunha convención de árbitros no Perú. Rematou en borracheira o encontro no que participaron, entre outros, Julio Álvarez, Pedro Chamorro e Carlos Blas.
Unha convención de árbitros de fútbol peruanos celebrada en Lima diante de autoridades internacionais rematou nunha enorme borracheira que pode comprometer o futuro profesional de seis dos colexiados, dos que tres son de primeira división: Julio Álvarez, Pedro Chamorro e Carlos Blas, segundo informou o xornal «El Comercio».
Os feitos aconteceron o venres, cando 455 árbitros se reuniron para unificar criterios e recibir instrucións de autoridades internacionais da arbitraxe, como o paraguaio Carlos Alarcón, o uruguaio Ernesto Filippi ou o mexicano de adopción Arturo Yamasaki.
Despois da primeira sesión, comezaron os brindes, e aí foi onde a cousa foi dexenerando ata desembocar en incidentes con varios colexiados bébedos facendo das súas.
Aínda que o castigo aféctalles nun principio a seis árbitros, podería haber ata 14 implicados na desfeita

Unha banqueira chinesa demanda aos seus profesores de baile despois de pagar 12 millóns de euros en clases
A millonaria banqueira Mimi Monica Wong, responsable do HSBC en Hong Kong, decidiu que, aos seus 61 anos, quería ser unha estrela do baile. Para iso contratou a británica Gaynor Fairweather, quince veces campiona do mundo de baile latino, e ao seu home, o italiano Mirko Saccani, para que lle desen clases en exclusiva durante oito anos por un total de 12 millóns de euros. Pero despois de seis anos e máis de 7 millóns de euros de clases, Wong decidiu demandar aos seus mestres e pediulles que lle devolvan os cartos. O motivo foi que, no restaurante Li Hua de Hong Kong, diante de 50 persoas, o profesor Saccani insultou á súa alumna chamándoa «vaca lacazana» e díxolle que movera o cu. Algunhas testemuñas mesmo aseguraron que lle dixo «se o volves facer, Mónica, vouche romper a cabeza contra a parede».
Os expertos en baile replícanlle que a banqueira aínda lles debe case a metade dos cartos. Ademais, xa gastaron parte do diñeiro nun Ferrari para el e en cirurxía plástica para ela. O veredito xudicial está previsto para finais do verán. Entre tanto, Mimi Mónica Wong contratou un novo profesor que só lle cobra 15.000 euros ao mes.

Unha muller queda pegada ao váter dun centro comercial
Unha muller de 53 anos, residente no estado norteamericano de Iowa, tivo que ser atendida no servizo de urxencias dun hospital despois de quedar pegada ao retrete dun centro comercial. Os feitos aconteceron como consecuencia dunha broma moi pesada perpetrada por uns descoñecidos que untaron a tapa do váter cun adhesivo que contiña cemento, segundo informaron os bombeiros da localidade de Council Bluffs á cadea de televisión KETV. Os servizos médicos tiveron que empregar quita esmalte de unllas para despegar a muller, que sufriu queimaduras e escoriacións polas que tivo que ser atendida en urxencias. Os causantes da desfeita, que aínda non foron localizados pola policía, poderían ser acusados de agresión con agravantes e de conduta criminal. A afectada tamén pediu que os castiguen limpando os váteres do centro comercial durante 6 meses.

E tamén os bombeiros tiveron que intervir nun suceso que aconteceu en Madrid. Tiveron que quitarlle o anel a un mozo que pasou todo o día con el atascado
Os bombeiros de Madrid conseguiron soltar o dedo dun mozo duns vinte anos que pasou todo o día tentando librarse dun anel de aceiro. O rapaz decidiu, ás seis da tarde, desprazarse a un hospital privado da localidade de Boadilla del Monte, ao ver que o dedo estaba cada vez máis inchado. Alí os médicos tentaron de todos os xeitos tentar extraerlle a alfaia, feita de aceiro cirúrxico. Polo tanto, chamaron aos bombeiros, que empregaron primeiro un cortador profesional de arames que non deu resultado. A solución chegou cando un dos profesionais recorreu a unha ferramenta persoal multifunción que contaba cunha pequena serra eléctrica, coa que logrou cortar o anel sen danar o dedo, que foi recuberto con soro fisiolóxico. O mozo recuperou a tranquilidade en apenas cinco minutos, ao comprobar que o sangue volvía circular pola extremidade.

Un chinés rexistra como marca comercial a cabezada de Zidane
Un publicista chinés, Zhao Xiaokai, rexistrou como a súa marca comercial a imaxe de Zinedine Zidane golpeando coa cabeza ao italiano Marco Materazzi na final do Mundial, segundo informa o Beijing Daily. O espelido home está a pensar en revender os dereitos da silueta en branco e negro do futbolista francés. O rexistro da marca para roupa, zapatos, sombreiros e produtos da cervexa custoulle 2.000 iens (196 euros), pero agora pide un millón de iens, 98.000 euros, polos dereitos. Xiaokai tivo a idea de rexistrar a marca dous días despois de rematar o mundial. A imaxe non infrinxe os dereitos de imaxe do futbolista, dado que é só unha silueta, pero é altamente recoñecible. Como xa informamos en semanas anteriores e estamos a escoitar agora mesmo, a acción de Zizou deu pé a unha canción que está a ser un grande éxito en Francia e tamén a parodias e xogos na internet.

Multiplícanse os nacementos en Cancún nove meses despois do Wilma
Hai nove meses, o furacán Wilma pasou pola zona de Cancún, ao leste de México, e a poboación tívose que refuxiar durante tres días. Estes feitos provocaron que se disparase o índice de natalidade na cidade, segundo informaron as autoridades sanitarias mexicanas. O director do Hospital Xeral de Cancún, Narciso Pérez, destacou que este récord de nacementos coincide con períodos de xestación que comezaron os días do furacán. Se o habitual é atender entre 10 e 15 partos diarios, esta fin de semana pasouse a 75. A culpa foi da falta de enerxía eléctrica aqueles días de novembro.

Budapest terá unha ponte co nome de Chuck Norris
O ministerio de Economía húngaro organizou unha votación pola internet para decidir o nome que se lle dará a unha nova ponte sobre o Danubio. Pero ninguén esperaba que a denominación do célebre actor de películas de acción de serie B Chuck Norris sería o que levaría a dianteira nas preferencias dos maxiares. Norris é o primeiro da lista, seguido do humorista local Geza Hofi. O actor estadounidense triplica en votos ao fundador de Hungría, Szent Istvan. Os húngaros tomaron bastante de brincadeira a proposta, polo que entre os nominados están o tamén actor, pero neste caso italiano Bud Spencer, e o cantante Bob Marley. Outra proposta é chamarlle A Ponte de Nunca Acabar, en referencia aos atrasos na súa construción. O comité de goberno terá que ter en conta os tres nomes gañadores, ademais das propostas da administración local, cartógrafos e lingüistas. Terán tempo ata o ano 2008, para cando está prevista a inauguración.

As patacas fritas recuperan o seu nome tradicional no Congreso dos EUA
As cinco cafetarías da cámara de representantes norteamericana volven a ter no seu menú as French Fries fritas francesas, que hai tres anos foran rebautizadas como Freedom Fries fritas da liberdade, como rexeitamento á negativa de Francia a apoiar a invasión do Iraq. Xa hai dúas semanas que os dous establecementos que aínda conservaban a patriótica denominación recuperaron o nome tradicional das patacas fritas en inglés. De todos os xeitos, o voceiro do deputado Vernon Ehlers, republicano a cargo da comisión de administración da cámara que controla as cafetarías do corpo, non quixo facer comentarios sobre a volta á denominación clásica diante da axencia AFP.

A Terra pesa cada ano 40.000 toneladas máis
Segundo un estudo publicado pola revista Science, a masa da Terra aumenta constantemente debido á materia extraterrestre que cae nela, como po cósmico e outros materiais. Científicos alemáns e estadounidenses calcularon que cada ano son 40.000 toneladas as que caen sobre o noso planeta, e que iso vén ocorrendo dende hai polo menos 30.000 anos. O descubrimento fixérono analizando o xeo antártico, e a presenza nel de helio 3. A análise deste elemento tamén poderá servir para coñecer a historia climática da Terra.

Dous de cada tres homes españois depiláronse algunha vez
Segundo unha enquisa de Philips, o 66 por cento dos homes españois afeitou ou depilou algunha parte do pelo corporal algunha vez. Ademais, só o 2,3 por cento das mulleres que responderon a este estudo están conformes co dito de «o home e o oso, canto máis peludo máis fermoso». Segundo este mesmo inquérito, o 85,3 por cento das mulleres son partidarias de que a súa parella elimine ese pelo, sobre todo o das costas e os ombros, pero só o 65 por cento conseguiu convencelos. O resto pensa que a depilación é algo propio exclusivamente das mulleres ou dunha moda pasaxeira. Os resultados da enquisa son sorprendentes e acaban co mito do macho ibérico, pois os españois son os que máis se depilan do mundo, seguidos de ingleses e estadounidenses. As zonas máis frecuentemente afeitadas son o pube, co 33,6 por cento, seguido do peito, 28,8, e axilas, 27,1, aínda que nas clínicas de estética aseguran que o máis demandado é o pescozo, as costas e o entrecello. Por comunidades autónomas, os máis partidarios da depilación son os andaluces e valencianos, con máis do 70%. No outro estremo están os vascos.

Un sacerdote italiano predica e confesa nas praias. É un dos «salvavidas de Xesús»
O cura italiano Vito Cantó, de 33 anos, acompañado doutros membros do movemento «os salvavidas de Xesús» está a percorrer durante este verán as praias do país mediterráneo predicando o evanxeo e ofrecéndolles aos bañistas o sacramento da confesión, segundo unha información que publicou o xornal La Repubblica.
Os salvavidas de Xesús están a percorrer a costa de Pescara, no sur de Italia, levando camisetas vermellas, co nome da súa organización e o debuxo dun salvavidas. Os voluntarios reparten follas co lema «hai un corazón que reza por ti pola noite».
O grupo leva consigo unha cruz de madeira na que aparece escrito «Xesús, o noso salvador», e unha pequena barca cun altar para a eucaristía.
Os turistas están a responder de xeitos moi diferentes. Hainos que se deciden a confesar os seus pecados, mentres que outros teñen unha reacción máis violenta.

Problemas coa obesidade nos Estados Unidos. Moitos pacientes non entran nas máquinas de raios X
Cada vez máis estadounidenses están a sufrir o sobrepeso, o que está a dificultarlles o sometérense a probas médicas como os raios X. Agora non só hai cidadáns demasiado altos para estos aparellos, senón tamén os hai que, ademais de superaren o volume físico para a máquina, teñen unha gordura corporal que impide que os raios penetren no seu interior.
Investigadores do Hospital Xeral de Massachusetts descubriron que nos últimos quince anos se duplicaron as probas de radioloxía inconclusas debido á obesidade do paciente, segundo informa a revista Radiology.
Nalgúns casos, o usuario non cabía na máquina, pero noutros os ultrasons e os raios X non obtiveron unhas imaxes demasiado claras dos órganos internos.
Así, a obesidade non é só un problema de saúde en si mesmo, senón que tamén pode prexudicar a realización de diagnoses correctas.
As estatísticas din que dous terzos dos habitantes dos Estados Unidos son obesos ou padecen sobrepeso.

200 persoas participarán no campionato do mundo de strip poker
Un corredor de apostas irlandés, Paddy Power, é o organizador do torneo de póquer de prendas ou strip póker máis grande do mundo, e que se vai celebrar o vindeiro 19 de agosto en Londres.
Aínda que a idea xurdiu nun principio como unha broma do 1 de abril, día dos inocentes en boa parte do mundo, converteuse nunha realidade despois de recibir as primeiras 50 inscricións.
Agora xa son máis de dúascentas as persoas que aspiran a gañar o primeiro título de campión do mundo de strip poker no Café Royal, no londiniense Picadilly Circus.
Nun principio a idea era contar con cen homes e cen mulleres, aínda que esta cifra ao final vaise superar. Os aspirantes proceden de países como Irlanda, Reino Unido, Brasil, Australia e Alemaña.
A entrada ao torneo será libre. Cada participante recibirá unha bolsa con seis prendas de roupa coa que participarán na competición. Cando queden espidos serán eliminados. O gañador ou gañadora recibirá 10.000 libras esterlinas de premio (14.500 euros), e será a última persoa que teña algunha prenda posta. O trofeo será unha folla de figueira de ouro.
O propio organizador do evento, Paddy Power, confesou que o strip poker é un xogo que todos practicamos dalgun xeito, aínda que a última vez que o practicou era máis novo e estaba en mellor forma.
Os participantes formarán parte, asemade, dun novo récord Guinness. O campionato será gravado por unha cadea de televisión.

Presentan en México as botellas de tequila máis caras do mundo
Na capital mexicana presentáronse tres tipos diferentes de botellas de tequila, coa peculiaridade de que costan entre 3.500 e 225.000 dólares.
O motivo polo que se fabricaron estes envases, de ouro, prata e platino, foi entrar no sempre desexado libro Guinness dos récords, como explicou o dono da empresa Ley 925, Fernando Altamirano.
O tequila que conteñen está feito a base de ágave puro repousado en barrica durante seis anos. Pero é improbable que chegue a beberse, porque o valor está nas botellas. A máis cara, de 225.000 dólares, ten dous gramos de ouro puro. Hai outros dous modelos de 150.000 dólares cada un e un máis económico, de tan só 3.500.
Os envases íanse vender nun centro comercial exclusivo, pero xa non poderá ser así, pois os encargos xa superaron o número de unidades fabricadas. Nun futuro espérase sacar á venda unha botella aínda máis cara con adornos de ouro e brillantes.

Multan un home con 200 euros por taparlle os ollos ao chofer dun autobús
Un viaxeiro foi sancionado con 200 euros por taparlle os ollos ao condutor dun autobús de liña cando circulaba pola localidade alavesa de Ribeira Baja cara a Bilbao.
O individuo, de 46 anos, orixe turca e residencia en Alemaña, obrigou ao chofer a parar o vehículo na antiga peaxe da A-1 ata que chegou a Ertzaintza, que se fixo cargo do alborotador.
Os feitos producíronse ás catro e cuarto da tarde, cando o condutor do autobús Madrid-Bilbao avisou á policía autonómica de que un pasaxeiro se lle estaba a achegar por detrás e lle tapaba os ollos mentres conducía. Os viaxeiros negáronse a continuar a viaxe ata que o individuo baixara do autobús.
O pesado cidadán turco foi trasladado a Vitoria, dado que non tiña no momento os cartos para pagar a multa, tal e como lles obriga a lei aos estranxeiros.

Un preso escapa da cadea facéndose pasar por outro que remataba a condena
Un detido escapou o mércores do cárcere de Forest, en Bruxelas, facéndose pasar polo seu compañeiro de cela, que ía saír libre ese mesmo día.
O convito, condenado por atracos a man armada, puxo a roupa do seu veciño e presentouse no control de seguridade da prisión para marchar, cousa que fixo sen ningún problema. O engano descubriuse media hora máis tarde, cando o auténtico preso se presentou diante dos policías.
A fuxida produciuse grazas a que non se tomou a precaución de comprobar as pegadas dixitais do preso. Esta medida é obrigatoria en Bélxica dende que hai dous anos se produciran uns feitos semellantes aos desta semana.

Unha adiviña afirma que Juanes cambiará a súa carreira aos 40 anos
A adiviña xaponesa Kazuko Hosoki afirmou esta semana que o cantante Juanes terá un cambio radical na súa carreira profesional cando cumpra os 40 anos. Este anuncio fíxoo nun programa de televisión ao que asistiu o artista colombiano. Juanes, de 33 anos, foi recibido por unha multitude de admiradoras e pola vidente.
A señora Hosoki non quixo dar máis detalles sobre a súa predición, que só está disposta a revelar se Juanes volve un día ao seu programa.

Unha empresa canadense lanza un biquini detector de raios ultravioletas
En agosto sairá á venda no Canadá un novo biquini da casa Solestrom. Esta prenda de vestir ten a peculiaridade de que ten un medidor de raios UVA integrado.
O lanzamento farase por dous motivos: celebrar o sexaxésimo aniversario da creación da prenda de baño feminina e mais previr o cancro de pel.
As usuarias do biquini Solestrom poderán coñecer instantáneamente a intensidade dos raios solares, nunha escala de 1 a 20, mentres están na praia. Ademais, o aparello dispón dunha alarma que se activa cando a exposición ao sol sobrepasa os límites aconsellables. Este dispositivo está situado nun pequeno cinto do biquini.
A empresa prevé que a prenda sexa un éxito de vendas en Australia e Sudáfrica, onde se producen as meirandes taxas de cancro de pel.

Comentarios [1]

Vietnam pon en marcha a pornografía institucional
O Vietnam é un estado no que está censurada por completo a pornografía a través de internet. Pero as cousas parece que están a comezar a cambiar. As autoridades do país do sueste asiático consideran que non todo o porno é malo e que pode ter unha finalidade educativa para amosarlles ás parellas casadas como practicar sexo saudable.
Así, segundo o xornal Vietnam News, o subdirector do instituto para o desenvolvemento social vietnamita, Khuat Thu Hong, declarou que unha páxina web ortodoxa sobre sexo podería ser beneficiosa, con películas pornográficas educativas descargables.
Con esta medida, evitaríanse casos como os de parellas que non mantiveron relacións durante anos, e reduciríanse as altas taxas de divorcio e prostitución.
De todos os xeitos, a finalidade deste servizo sería estrictamente educacional.
Pero estas declaracións chocan cunha orde do ministerio de cultura e información vietnamira, no que obriga aos cibercafés a instalar programas informáticos que bloqueen a navegación por sitios pornográficos.

Miles de chilenos estafados nun negocio de «queixiños máxicos»
Miles de persoas foron enganadas en Chile mediante un estraño procedemento que lles prometía facérense millonarios en pouco tempo.
O negocio comezou hai algo máis dun ano, cando a empresa Fermex-Chile convidou a participar na iniciativa a quen quixera, cun investimento de 460 dólares. Os estafados recibían na súa casa un sobre con bacterias cristalizadas que debían cultivar en leite durante dúas semanas e logo devolver á empresa na forma de dez pequenos queixos que supostamente se ían exportar a Francia para fabricar cosméticos.
Os sobres entregábanse cada semana e en dous meses recuperábase o investimento inicial, para logo obter só beneficios. O negocio foi florecendo lentamente, sen que se fixese público para evitar a saturación da venda, ata que a ambición estoupou na poboación de Coltauco, ao sur de capital chilena. Alí, moita xente deixou de traballar, investiu os aforros de toda a súa vida e mesmo solicitou créditos.
A fraude calcúlase en máis de catro millóns de dólares. Os seus presuntos autores, Víctor Mella e Fernando Jara, foron ingresados en prisión preventiva acusados de estafar a unhas 5.500 persoas. Unha terceira suposta implicada, a francesa Gilberte Van Erpe, está en busca e captura internacional.
O fiscal pensa que a empresa nunca fixo envíos ao estranxeiro, aínda que os imputados din que foi só un malentendido e unha mala administración dun negocio verdadeiro. No ano 2004, no Perú, a empresa Labomax foi acusada dun calote similar. Daquela, a fraude fora de 27 millóns de dólares. A misteriosa cidadá francesa tamén aparece vencellada a aquel caso.

Un can atropela unha muller no estado de Utah
Ranger, un can policía da localidade de Odgen, en Utah, Estados Unidos, atropelou este martes unha muller, que resultou ferida grave. Mary Stone atopábase no seu xardín, recollendo o correo, cando foi alcanzada polo vehículo policial. A tenente Marcy Korgenski atopábase cubrindo un caso de violencia doméstica e deixou o can dentro do coche co motor aceso para que tivera aire acondicionado.
Non se sabe exactamente como, o can tocou a panca de cambio automático do vehículo, e arrancou a toda velocidade costa abaixo, o que provocou o atropelo.
Mary Stone atópase hospitalizada. Mentres, o can non será castigado, pois a oficial ao seu cargo considera que o animal non foi consciente do que fixo.

Estudantes xaponeses conseguen facer voar un avión alimentado por pilas
Un grupo de estudantes do instituto de tecnoloxía de Toquio conseguiu facer voar un avión durante 391 metros no que supuxo o primeiro voo alimentado coa enerxía de pilas, segundo anunciou a compañía Matsushita Electric, patrocinadora do experimento.
O aparello, cunhas alas de 31 metros e 44 quilos de peso, estivo pilotado por un estudante de 63 quilos durante un minuto. A enerxía procedía de 160 pilas de tipo AA.
Un dos estudantes afirmou entusiasmado: «non pensaba que voar fora tan bonito».
O equipo tentará que o voo sexa recoñecido pola asociación aeronáutica do Xapón.

O presidente da cervexeira Coors, detido por conducir borracho
Pete Coors, herdeiro da dinastía de mestres cervexeiros estadounidenses e ex-candidato republicano ao senado por Colorado, foi detido nese mesmo estado por conducir cunha taxa de alcol en sangue por riba do permitido. Nun comunicado publicado no xornal Denver Post, Coors, de 59 anos, asegura que sempre fixo un chamamento aos seus consumidores a seren responsables e que lamenta non ter respectado o seu propio consello. Coors foi fundada polo tataravó de Pete Coors no ano 1873 e hoxe ten 8.500 traballadores. Na campaña electoral do 2004, o detido defendeu diminuír a idade mínima legal para consumir alcol nos Estados Unidos ata os 18 anos. De momento, ese límite segue a ser de 21 anos.

As ameazas do xuíz Garzón obrigan a un grupo musical a cambiar de nome. Agora chámase Grande-Marlaska
O ata hai pouco case descoñecido grupo de pop denominado Garzón tivo que cambiar de nome despois de recibir un burofax dos representantes legais do xuíz Baltasar Garzón. Nel esixíalles que deixasen de cometer os actos que constitúen unha intromisión na súa imaxe, baixo a ameaza dunha querela. Agora o grupo cambiou de nome e chámase Grande-Marlaska. O xuíz Fernando Grande-Marlaska, moi ao contrario que Garzón, anunciou que non vai emprender accións xudiciais contra os músicos e que todo o asunto lle fai moita graza. O cambio de nome fíxose efectivo este mesmo venres durante a súa presenza no festival de Benicàssim. O grupo está formado por Eugenia Malela Durán, Roberto Herreros e Pepo Márquez. Os tres músicos aseguraron que con «Garzón» só pretendían renderlle homenaxe a un prohome que revalorizou conceptos desprezados hoxe en día como ecuanimidade, progresismo e modestia. Tamén manifestaron a súa confianza total na xustiza española. O grupo eliminou as fotografías de Baltasar Garzón da páxina web, pero négase a abandonar o dominio superjuez.com
A formación agora coñecida como Grande-Marlaska creouse hai dous anos e sacou dous discos ao mercado: «Ésta es la demo de Garzón» e «Otra fuerza».

O país máis feliz do mundo é Vanuatu
A illa de Vanuatu, situada en Oceanía, ocupa o primeiro lugar do índice do planeta feliz, da fundación británica da nova economía, no que se mide o crecemento económico sostible. Por iso, os países industrializados son os que ocupan os peores postos.
Así, todos os membros do G-8 están por debaixo do posto 50. O director de política da fundación, Andrew Simms, afirmou que isto se debe a que os políticos se deixaron desviar por modelos económicos abstractos que teñen pouco que ver co mundo real.
O índice do planeta feliz calcúlase multiplicando benestar por esperanza de vida, e dividíndoo entre impacto ecolóxico. Así, Vanuatu é o primeiro da lista, seguido de Colombia e Costa Rica. Os tres últimos son Zimbabue, Suazilandia e Burundi.
Dos estados occidentais, o primeiro é Malta, seguida de Austria e Islandia. España ocupa o posto 87, Francia, o 129, Portugal, o 136 e os Estados Unidos, o 150.
O índice completo atópase na web www.happyplanetindex.org

No segundo país máis feliz do mundo, Colombia, naceu un bebé de 66 centímetros e 6 quilos de peso
Unha muller deu a luz un bebé que pesou 6 quilos e mediu 66 centímetros nunha clínica privada de Bucaramanga, Colombia. O neno, que se vai chamar Johan Sebastián Jiménez Rueda (non Bach), naceu por cesárea o martes. A nai e o neno atópanse en perfecto estado, segundo informou a pediatra Claudia Arciniegas.
Os pais son Jesús Jiménez, garda xurado, e Claudia Rueda, non se especifica a profesión, os dous de 25 anos e residentes nunha casa arrendada na localidade de Floridablanca.
Segundo o pai da criatura, o talle do bebé debeuse posiblemente a que as familias dos proxenitores son de alta estatura. Por desgraza, a roupa que tiñan preparada para o bebé xa non lle vale e tiveron que mercar prendas novas. Xa no mes de febreiro unha parella de inmigrantes colombianos tivera unha nena de 7 quilos no hospital La Paz, de Madrid.