Xuxa retira do mercado un filme erótico que rodou hai 26 anos
A famosa Maria das Graças Meneghel ‘Xuxa’ gañou unha demanda nos tribunais contra un sitio de subastas na internet que quería vender copias dun filme erótico que protagonizara a actriz, cantante e presentadora no ano 1982, o dos mundiais de Naranjito. Xuxa quería que se prohibira a venda da película ‘Amor, estranho amor’, na que aparece espida seducindo un neno de 13 anos. O xuíz António Aurélio Abi Rama Duarte sentenciou que o sitio da rede terá que pagar unha multa diaria de 9.260 dólares no caso de que o material siga á venda. Na actualidade, é posible atopar copias do filme entre coleccionistas de vídeos e revistas do Río de Janeiro por uns 500 reais (230 dólares).
Nunha recente entrevista, a esvelta loira de 43 anos declarou que o ex-futbolista Edson Arantes do Nascimento ‘Pelé’, que foi mozo dela nos anos 80, chegou a pagar para impedir que se puxera en aluguer o vídeo, escrito e dirixido por Walter Hugo Kouri.
A ‘rainha dos baixinhos’ recoñeceu que cando fixera ese filme era virxe, e que non o inclúe no seu currículo, aínda que tampouco se arrepinte de tela feito. «Non sumou nada ao meu traballo, pero como experiencia foi boa».

Cherie Blair poderá levar un rabaño de ovellas pola ponte de Londres
Cherie Blair, muller do primeiro ministro británico, Tony Blair, recibiu o luns a distinción da liberdade da cidade de Londres, un título de orixe medieval que lle permitirá acometer tarefas moi curiosas. A honra, creada no ano 1237, élle outorgada cada ano polo Concello de Londres a personalidades recoñecidas polos seus méritos. Grazas a ela, Cherie Blair poderá, entre outras cousas, levar o seu rabaño de carneiros pola ponte de Londres, entrar no centro da cidade cun sabre, e mesmo se poderá permitir o luxo de andar bébeda pola rúa sen ningunha vergoña e sen que ninguén a poida deter por iso.
Cherie Blair estudou na London School of Economics e exerce actualmente a profesión de avogada co seu nome de solteira, Cherie Booth.

O primeiro ministro finlandés deixa a súa moza por SMS
Matti Vanhanen, primeiro ministro de Filandia e considerado o home máis sexy do país, deixou a súa moza, que coñecera pola rede, cunha mensaxe de texto ao móbil, segundo confirmou ela nunha entrevista. «Matti deixoume cunha mensaxe de texto, onde dicía ‘rematou’», recoñeceu Susan Kuronen na revista Me Naiset (nós as mulleres), nunha entrevista publicada o venres.
A súa relación con Vanhanen, de 51 anos, divorciado e pai de dous nenos, rematou hai unhas semanas, pero segue a dar que falar mentres Susan, de 36 anos, vai percorrendo os diferentes medios de comunicación para contar a súa historia.
O primeiro ministro evitou facer comentarios sobre a relación, e fora cualificado a comezos deste ano polo presidente da república frances, Jacques Chirac, como o home máis sexy de Finlandia, na época na que as portadas dos medios do país sacaban acotío detalles sobre o seu romance.

Piden a retirada dun cartel publicitario que distrae os traballadores dunha empresa
Unha empresa neozelandesa pediu a retirada dun gran cartel publicitario situado fronte ás súas fiestras no que aparece unha repoluda rapaza loira, afirmando que o anuncio distrae o seu persoal e os seus clientes. J. Everett, responsable dunha empresa de Auckland, puxo unha queixa formal perante as autoridades de regulación da publicidade. Nela, explica: «O venres tiñamos unha reunión moi importante e os clientes estaban claramente distraídos polo contido do cartel. Creo que o resultado da xuntanza non foi todo o bo que podía ter sido». As autoridades negáronse o mércores a retirar o cartel, no que aparece unha moza loira en biquini anunciando unha barriña de muesli.

Arrestan un home que quería vender pelos de Ramsés II
A policía francesa arrestou este mércores un home que tentou vender na internet cabelos do faraón exipcio Ramsés II. O individuo, que non se identificou no momento, pedía entre 2.000 e 2.400 euros por cada unha das mostras de cabelo. Tamén ofrecía pequenos fragmentos de resina e xénero embalsamado tomados da momia. O vendedor afirmou que obtivera as reliquias do seu pai, que traballara nun laboratorio francés encargado de restaurar o corpo de Ramsés II entre 1976 e 1977.
O sospeitoso está a ser investigado por posesión fraudulenta do material, dado que parece ser que os restos son auténticos. Varios arqueólogos franceses reaccionaron con horror á nova.
Ramsés II ‘O Grande’ naceu no ano 1304 antes de Cristo e gobernou Exipto durante máis de 60 anos durante a decimonovena dinastía de faraóns, hai 3.200 anos. A momia descubriuse no ano 1881 despois de Cristo e foi trasladada ao Museo Exipcio, do Cairo. Nos anos 70, á vista do deterioro que estaba a sufrir o seu corpo, mandárono a París para tratalo dunha infección de fungos.

Evo Morales lévalle a Fidel Castro unha torta de cumpreanos de coca
O presidente de Bolivia, Evo Morales, chegou o venres á Habana cunha torta de coca para Fidel Castro, que se atopa convalecente, informou Radio Rebelde. Morales asegurou que cumprira a súa promesa de levarlle a Castro un pastel de coca para celebrar o 80 aniversario do mandatario cubano. O agasallo íallo levar o 13 de agosto, pero a enfermidade de Fidel obrigou a adiar a celebración ao 2 de decembro, día das forzas armadas cubanas. Morales, que visita Cuba por quinta vez este ano, quíxolle amosar coa torta a Fidel a súa amizade e mais o seu agradecemento pola solidariedade do pobo cubano cos bolivianos.

Ofrecen por internet o teléfono roubado á filla de Bush en Arxentina
Un descoñecido ofreceu por internet o teléfono móbil que lle roubaron en Bos Aires a unha das fillas do presidente dos Estados Unidos, nun anuncio no que mesmo dicía que Bin Laden sería o encargado de facer a entrega.
«Teléfono móbil de Barbara Bush. Que mellor posibilidade! Con axenda incluída. Podes chamar a George W. e dicirlle todo o que sempre quixeches: Iraq, petróleo, economía», dicía o aviso publicado na páxina de poxas ‘Mercado Libre’, e que os encargados do portal retiraron en poucos minutos, por consideraren que carecía de seriedade, se trataba dun artigo dubidoso e non cumpría coas condicións da web.
O prezo mínimo que se pedía era de mil pesos (322 dólares), e, aínda que non se fixeron ofertas, o aviso deu para unha boa cantidade de comentarios de usuarios da páxina.
O vendedor do teléfono dicía que o aparello tiña unha extensa axenda: «Casa Branca, Pentágono, FBI, CIA, FMI e personalidades como Michael Jackson, o avó George Bush, Paris Hilton, Madonna, Ozzy Osbourne e moitos máis». Na suposta axenda tamén aparecía, como broma, o nome da vedette arxentina Nazarena Vélez. O aviso remataba: «Non perdas esta incrible oportunidade. O mesmo Bin Laden lévacho en moto!».
Barbara e Jenna, as fillas xemelgas de George Bush, estiveron a semana pasada na capital arxentina, onde supostamente foron vítimas de varios roubos, entre eles o do móbil dunha delas.

Un bebé encerra a súa nai no balcón
Unha nai alemá tivo que ser rescatada do balcón pola policía e os bombeiros, despois de que o seu fillo de oito meses a deixase pechada nel, informou o mércores a policía de Augsburgo. O meniño, que estaba a dar os seus primeiros pasos, apoiouse no peche do balcón do apartamento familiar cando súa nai, de 19 anos, se atopaba alí o martes á mañá.
O pasador da porta pechouse e a nai, que quedou atrapada no balcón, púxose a berrar para que a axudasen os veciños. Despois de que a rescataran os bombeiros, a nai reuniuse co seu bebé, san e salvo coma ela.

A prensa británica solidarízase co calvo da lotaría
O xornal inglés ‘The Guardian’ dedicoulle un artigo na edición do xoves a Clive Arrindell, actor coñecido por interpretar o calvo do anuncio da lotaría española entre os anos 1998 e 2005. O periódico conta que Arrindell afeitaba a cabeza e viaxaba a España todos os nadais para escenificar o conto de fadas no que lle desexaba sorte a todo o estado. Polo spot cobraba 48.000 euros.
O Guardian critica a decisión da empresa loteira de cambiar o anuncio, despois de ter dito hai dous anos que o calvo representaba «o espírito da lotaría de Nadal, carismática, misteriosa e chega de misterio». Segundo o medio de comunicación británico, ese espírito conseguira aumentar as vendas nun 11 por cento anual. A blogosfeira do Reino Unido, que parece estar bastante viva aínda, tamén sentiu a súa marcha, aínda que pouca xente coñece o nome de Arrindell.

Seguimos na Gran Bretaña. Alí, un home engade ao seu nome todos os títulos da saga de James Bond
Un mozo británico fanático da saga cinematográfica do axente 007 decidiu engadir ao seu nome todos e cada un dos títulos dos filmes oficiais de James Bond. Agora ten un apelido composto por nada máis e nada menos que 69 palabras.
Antes coñecido como David Fearn, agora chámase James Dr No From Russia With Love Goldfinger Thunderball You Only Live Twice On Her Majesty’s Secret Service Diamonds Are Forever Live And Let Die The Man With The Golden Gun The Spy Who Loved Me Moonraker For Your Eyes Only Octopussy A View To A Kill The Living Daylights Licence To Kill Golden Eye Tomorrow Never Dies The World Is Not Enough Die Another Day Casino Royale Bond.
Con este mérito, converteuse na persoa co apelido máis longo da historia do Reino Unido, ata que a alguén se lle ocorra superalo.

Fuman o porro máis grande do mundo
Xa imaxinan onde foi. En Ámsterdam, na discoteca Melkweg, que en neerlandés significa Vía Láctea. Alí, varias persoas puxéronse a fumar o que é considerado o porro máis grande xamais feito. O evento foi na noite de entrega dos premios á decimonovena edición do Festival Copa Cannabis, que se celebrou do 19 ao 23 de novembro. Expertos en drogas brandas, cultivadores e comercializadores de todo tipo de produtos relacionados coa marihuana danse cita cada ano na capital dos Países Baixos para ese festival, no que se premia a mellor variedade.
O plan para lear e fumar o porro máis grande do mundo estívose a punto de cancelar por medo dos organizadores a vulnerar a lei, pero, ao final, fíxose. O cigarro, dun metro e medio de longo, contiña 500 gramos de marihuana. O récord anterior fora de cen gramos.

Convocan un orgasmo colectivo a prol da paz mundial
Unha organización estadounidense fai un chamamento á humanidade para que o 22 de decembro experimente un orgasmo colectivo pola paz. Donna Sheehan e Paul Reffel pídenlle a todo o mundo, especialmente os que habitan en países con armas de destrución masiva, que o día do solsticio de inverno, á hora que queiran e no sitio que queiran, contribúan a efectuar un cambio no campo enerxético da Terra mediante un orgasmo mundial sincronizado. Os organizadores aseguran que este é o momento axeitado, pois dúas frotas estadounidenses se están a dirixir cada ao golfo pérsico para atacar Irán.
Sheehan e Reffel baséanse no proxecto da conciencia global, un programa da universidade de Princeton que mide o efecto que pode ter o pensamento humano no devir dos feitos. Tentan que os participantes concentren todos os seus pensamentos na paz durante e despois do orgasmo. A parella promotora da iniciativa ten a esperanza de que o enorme influxo da enerxía física, mental e espiritual cunha intención consciente pacífica teña efectos positivos profundos que cambien o estado de violencia da humanidade. Segundo eles, a inxección desa forza no campo enerxético da Terra contribuirá a ese cambio positivo. Este será o primeiro orgasmo mundial sincronizado pola paz, cara ao solsticio de decembro do 2012, data na que remata o calendario maia.

Un neno xeorxiano de oito anos arrastra un autobús de máis de dúas toneladas
Guiorgui Bibilauri, un neno xeorxiano de oito anos arrastrou o xoves un autobús de máis de dúas toneladas de peso. Varios centos de persoas foron testemuñas destes feitos na cidade de Tiflis, capital de Xeorxia. O rapaz, xa coñecido coma o sansón xeorxiano, mide 1 metro 55 de altura e pesa 93 quilos. Conseguiu mover o autocar 43 metros diante do abraio dos espectadores. Por se fora pouco, dentro do bus ían cinco pasaxeiros, co que o peso total do vehículo era de 2.115 quilos.

Mobilización en Xapón por un can perdido
Un can que estivo acurralado seis días nunha montaña xaponesa provocou unha mobilización dos servizos de rescate, os medios de comunicación e os cidadáns. O seu espectacular salvamento foi retransmitido en directo pola televisión e estivo nas primeiras páxinas dos xornais do mércores. O cadelo, un palleiro de cor améndoa, atopábase acurralado a uns 70 metros de altura nunha estrutura de cemento deseñada para conter os desprendementos nunha montaña na illa de Shikoku.
17 bombeiros tentaron sen éxito coller o can cunha rede. O animal non se deixou coller, polo que, catro horas despois, os rescatadores tiveron que empurralo ao baleiro para que caera sobre unha rede. A audiencia reaccionou con aplausos. O can foi levado a un refuxio para que o curen. Centos de xaponeses xa telefonaron aos bombeiros coa intención de adoptar a mascota.

Piden 20 anos de cadea para unha parella que se bicou nun avión
Aínda que puidera parecelo polo titular, os feitos non aconteceron nun país onde impere a lei islámica, senón nos Estados Unidos. Unha parella a bordo dun voo das Southwestern Airlines dende Los Ángeles foi acusada de violar a Patriot Act, promulgada para previr os actos terroristas.
A acusación di que Carl Persing e Dawn Sewell estaban arrexuntados bicándose dun xeito pouco axeitado, facendo que os pasaxeiros se sentisen violentos. Cando unha azafata se lles achegou para pedirlles que parasen, segundo o informe do FBI, Persing foi visto acariñando e bicando a Sewell no pescozo e coa súa cara presionada contra a área vaxinal da muller mentres ela sorría. Despois do segundo aviso, Persing botouse para atrás ameazando a azafata con «serias consecuencias» se non os deixaba en paz. O comentario serviulles para que fosen arrestados cando o avión chegou a Raleigh, Carolina do Norte, acusados de asociación ilícita e de obstaculizar membros da tripulación. Os dous están baixo custodia legal ata o 5 de febreiro, data prevista para o xuízo. Se son declarados culpables, enfróntanse a unha condena de 20 anos de cadea.
O avogado de Persing, William Peregoy, basea a súa defensa dicindo que o seu cliente non se atopaba ben cando puxo a súa cabeza no colo da súa compañeira, e que só ameazou a azafata con informar do incidente aos seus superiores ao aterrar.

Bono, de U2, recupera uns pantalóns e un sombreiro despois dunha disputa legal
O cantante irlandés atopou este mércores o que levaba tanto tempo buscando: uns pantalóns e un sombreiro que estaban no poder dunha antiga estilista da banda. U2 demandou o ano pasado a Lola Cashman para que lles devolvera esas prendas que ela dixo que lle regalaran cando traballaba con eles nos anos 80.
Entre os obxectos en disputa había un sombreiro Stetson e uns pendentes, ademais de fotografías e decoración de Nadal.
Cashman, que publicou unha biografía non autorizada do grupo na que dicía que Bono está obsesionado co seu peso e coa súa estatura, acudiu aos tribunais o mes pasado para tentar revogar a orde de devolución dos artigos.
Pero a batalla rematou o mércores cando o Tribunal Supremo irlandés confirmou o fallo previo e dixo que Bono estaba de acordo con que os obxectos, valorados en 5.000 euros, sigan pertencendo á banda. Malia isto, durante a apelación, Bono, coñecido activista contra a pobreza, loou o traballo de Cashman e dixo que antes de coñecela el parecía a cantante grega Nana Mouskouri.
A ex-estilista, que xa tentara vender sen éxito os obxectos nunha poxa no ano 2002, dixo que Bono lle puxera o sombreiro de cowboy mentres bailaba en roupa interior nos camerinos despois dun concerto en Arizona. No lote recuperado tamén había unha sudadeira verde, rosarios, vídeos e dúas cuncas.

O Vaticano non convida á estrea dun filme a actriz que interpretaba a Virxe, porque está embarazada
A actriz neocelandesa Keisha Castle-Hugues, de 16 anos, non foi convidada polo Vaticano á estrea mundial de Natividade, filme no que interpreta a Virxe María. Segundo o xornal The New Zealand Herald, a actriz, que foi nomeada ao Óscar, non está na listaxe confeccionada polo Vaticano, na que sí aparecen a directora e malo actor que interpreta a San Xosé. Dá a casualidade de que a actriz anunciou no mes de maio a súa gravidez.
Natividade será a primeira longametraxe que se presente no Vaticano, o vindeiro domingo 26. Conta a viaxe de Xosé e María ata o nacemento de Xesús, e a recadación destinarase á construción dunha escola en Nazaret (Israel).

Ratos brancos probarán a comida dos atletas dos xogos olímpicos de Pequín
Para comprobar que non se producen envelenamentos nin irregularidades, a organización dos xogos olímpicos de Pequín 2008 empregará ratos brancos para que proben os alimentos destinados aos atletas. Segundo responsables sanitarios chineses, os ratos detectan os alimentos en mal estado antes ca as técnicas tradicionais de laboratorio, polo que se poderá actuar máis rapidamente no caso de problemas coa comida. Todos os alimentos e condimentos, como sal, pementa ou outras especias, serán probados polos roedores 24 horas antes de que se sirvan nos restaurantes da vila olímpica. Nalgunhas zonas da China as intoxicacións alimentarias son un problema habitual.

Deteñen un home que tentou cambiar nun banco billetes do parque Warner
A Policía Nacional detivo esta semana en Santander un cidadán romanés que tentou cambiar nun banco por euros billetes simulados de dólar que levaban o anagrama do parque de atraccións Warner de Madrid.
Nicu V, de 22 anos, presentouse pola mañá nunha sucursal do centro de Santander para cambiar trece billetes de cen dólares. A empregada bancaria decatouse axiña de que os billetes eran do parque de atraccións, polo que avisou discretamente o servizo de seguridade e finxiu seguir cos trámites do cambio de divisas. Pouco despois chegou a policía, que arrestou o mozo como presunto autor dun delito de estafa en grao de tentativa.
O detido, que se atopa en situación irregular en España, explicou que atopara os dólares falsos no lixo e que os 985 euro auténticos que levaba enriba os gañara pedindo esmola. Nico foi posto a disposición xudicial e ademais abríuselle un expediente de expulsión.

Inventan unha camiseta que permite tocar a guitarra virtualmente
Científicos do goberno australiano anunciaron o luns que inventaron unha camisola que lles permite aos seus usuarios tocar música de verdade sen necesidade de usar unha guitarra. A prenda ten sensores nos cóbados que seguen o movemento dos brazos ao tocar cordas imaxinarias, explicou Richard Helmer, da Organización para a Investigación Científica e Industrial da Commonwealth. A información é enviada a través dunha rede sen fíos a un computador que xera a música en tempo real, sen necesidade de que o usuario teña coñecementos musicais nin informáticos.
Pódese saltar mentres se toca e a calidade de son é semellante á dun mp3 orixinal. A camisola, que permite facer realidade a práctica do ‘air guitar’ sen usar música pregravada, tamén se pode empregar para tocar a pandeireta.
O invento pretende ter unha utilidade máis seria no eido da fisioterapia: capturar o movemento humano mediante sensores para reproducilo nun mundo virtual.

Devolven ao museo uns váteres que tocan o himno italiano
A xustiza italiana decidiu o venres pasado devolver ao Museo de Bolzano (Italia) uns baños que tocan o himno nacional, unha obra de arte que fora retirada en outubro por petición dun partido conservador.
O tribunal de Bolzano considerou que a obra de arte non representa unha ultraxe ao himno nacional nin ao estado italiano, segundo informou a oficina de prensa do museo. A obra, creada polas artistas romanas Eleonora Chiari e Sandra Goldschmied, reproduce unha versión electrónica do himno italiano cun ruído de caída de auga de fondo. Unha célula fotoeléctrica permite que a música soe cada vez que algún visitante se achega á obra, presentada na exposición ‘Group Therapy’, o 15 de setembro.
O partido de extrema dereita Alianza Nacional presentara a demanda que provocara nun primeiro momento a retirada da obra, por atentado respecto ao que constitúe unha referencia para toda comunidade dun país.

Xornada de récords Guinness en Australia. Un home ponse 18 calzóns nun minuto
Australia viviu este xoves unha xornada de récords Guinness do máis absurdo, diante das cámaras dunha canle de televisión e coa presenza dun xurado para homologar os logros. Entre as marcas conseguidas atópase a de Grant Denyer, home do tempo neocelandés, que foi quen de poñerse 18 calzóns nun minuto, co que superou o anterior plusmarquista, un británico que se vestira con 17 prendas interiores.
Keith Kolver converteuse no zorbonauta máis rápido da historia, cunha velocidade de 52 quilómetros por hora. Este individuo descendeu por un monte de Nova Celandia dentro dun zorb, que é como se denominan uns balóns de plástico transparente de 3,20 metros de diámetro. Este peculiar deporte consiste en manterse de pé dentro desta bóla despois de ser lanzado costa abaixo.
Ademais, Brittany Boffo, unha ximnasta australiana de nove anos, bateu o récord de saltos coas mans xuntas, que consiste en facer pasar as mans unidas dende detrás das costas á parte superior da cabeza como se os brazos fosen unha corda. A nena conseguiu dar 60 choutos en 60 segundos.
Por outra banda, no Xapón, o concello de Nishio conseguiu celebrar a cerimonia do té máis grande do mundo, con 14.718 convidados.

A actriz Denise Richards fere unha anciá ao botar un ordenador pola fiestra
A actriz estadounidense Denise Richards, que se atopa rodando un filme na Columbia Británica (Canadá), feriu involuntarimente unha octoxenaria que ía en cadeira de rodas ao botar polo balcón un ordenador portátil, segundo informou este xoves a cadea CBC.
Os feitos aconteceron cando tres ‘paparazzi’ entraron no lugar de rodaxe da película ‘Blonde and blonder’. A actir discutiu con eles, tras o que lles colleu o ordenador portátil e guindouno polo balcón no que se atopaba.
O aparello caeu enriba dunha anciá en cadeira de rodas, o que lle provocou un golpe leve nun brazo, polo que non haberá proceso xudicial. Ademais, os avogados da artista están en conversas cos fotógrafos para compensalos polos danos no ordenador.
Denise Richards, ex-moza Bond, de 35 anos, comparte cartel no novo filme coa actriz de orixe canadense Pamela Anderson.

Un príncipe italiano atopa as xoias de Salma Hayek nun taxi
Un asistente da xoiería que serve a actriz mexicana Salma Hayek, que triúnfa actualmente no seu papel na versión estadounidense de ‘Betty la fea’, deixou esquecido nun taxi neoiorquino un sobre con xoias alugadas. Tivo a sorte de que o seguinte en montar no vehículo foi Lorenzo Borghese, príncipe italiano de 34 anos e protagonista do reality show ‘The Bachelor’, que se emite tamén na canle ABC.
A actriz contou no portal contactmusic.com que o príncipe subiu ao taxi e achou un sobre que poñía ‘Salma Hayek’, así que chamou á televisión e dixo: «Creo que Salma acaba de perder 50.000 dólares en xoias».
Hayek tiña que escoller do contido do paquete algo para levar a unha gala benéfica, polo que lle devolveu o resto á asistente, que o deixou esquecido no taxi.
Descoñécese se houbo bico de agradecemento ou amor á primeira vista, xa que Borghese, descendente de Napoleón, busca compañeira nun programa no que 25 mulleres loitan por conseguir casar con el.

Venden en Suráfrica un preservativo que se pon nun segundo
Esta semana comezarase a vender en Suráfrica un modelo de preservativo de colocación ultrarrápida. Os condóns da marca Pronto pretenden vencer a incomodidade que supón abrir e colocar o profiláctico e que pode disuadir algúns potenciais usuarios.
Segundo contan na páxina web do produto, só hai que romper o paquete pola metade e desenvolver o preservativo directamente sobre o pene, sen necesidade de tocalo coas mans, como se fose unha tirita. O único atranco é que resulta imprescindible usar as dúas extremidades.
O invento foi concibido no ano 2001 polo surafricano Willem van Rensburg, ao que lle molestaba o ritual que tiña que seguir cada vez que se poñía un preservativo.

Guns ‘N’ Roses cancelan un concerto porque non lles deixaban beber alcol no escenario
O grupo de rock Guns ‘N’ Roses cancelou o venres unha actuación en Portland, Maine, EUA, porque as autoridades non lles deixaban consumir alcol sobre o escenario. Os inspectores do corpo de bombeiros comunicáronlles esa decisión cando foron revisar o espectáculo pirotécnico que tiñan previsto no concerto, anunciado para mañá luns no centro cívico do condado de Cumberland.
Segundo un voceiro dos bombeiros, o grupo quería beber cervexa, viño e licor de herbas Jagermeister, polo que, dúas horas despois de se lles comunicar a decisión, decidiron suspender o concerto.
A banda lamenta na súa páxina web a cancelación e bótalles a culpa aos inspectores, por «ter feito imposible que a banda ofreza a súa actuación ao alto nivel habitual que os seus fans merecen». Ademais, o grupo asegura que nin Clay Aiken nin Green Day sufriron as mesmas restricións.

Unha nena de 4 anos é a artista mellor pagada de Romanía
A cantante Cleopatra Stratan, de 4 anos, que estamos a escoitar, é a artista mellor pagada de Romanía. Cobra 300 euros o minuto, medio soldo mensual no país balcánico e tamén noutros lugares máis próximos.
A pequena cobra mil euros por cada unha das cancións incluídas nas súas funcións, polo que o xornal Libertatea fixo as contas e concluíu que é a artista mellor remunerada do país.
A precoz cantante, que acompaña a súa voz dunha elaborada escenografía, está a ser un éxito de vendas en Romanía co seu tema ‘Ghiţa’ . Tamén é candidata a entrar no libro Guinness como a solista máis nova que saca un álbum, canta e presenta un concerto de dúas horas. O seu pai, o tamén cantante Pavel Stratan, xa lle mandou unha carta ao libro dos récords.

O home máis peludo do mundo perde unha demanda contra un parque de atraccións
Yu Zhenyuan, cantante chinés de rock de 29 anos, coñecido por ter o 96 por cento do seu corpo cuberto de pelo, denunciou o parque pequinés World Carnival por usar sen autorización a súa faciana na páxina web da empresa.
Na súa demanda, Yu pediu a retirada da imaxe, unha desculpa escrita e 25.000 dólares por danos psicolóxicos. O artista, que forma parte do libro Guinness dende o ano 2002, visitou o parque en agosto do ano pasado, onde deixou que lle tirasen fotografías a cambio de pases gratuítos para as atraccións.
Un tribunal popular sentenciou que as imaxes foran empregadas por World Carnival para aumentar os seus beneficios, polo que a empresa terá que retiralas e publicar unha desculpa por escrito na súa páxina web.
Porén, rexeitou ofrecerlle a Yu unha compensación económica, pola falta de probas de que a publicación das imaxes lle producise trauma psicolóxico ningún.

Un rapaz de quince anos rouba un autobús e faise pasar polo condutor
Un adolescente de quince anos de idade foi detido a pasada fin de semana na Florida por roubar un autobús co que seguiu a ruta habitual, facendo as paradas e mesmo cobrando os billetes. A aventura rematou cando un pasaxeiro notou algo raro, segundo informaron as autoridades.
O incidente ocorreu o sábado á mañá na cidade de Orlando, no centro do país, cando Ritchie Davis supostamente roubou un autobús comisado dun aparcadoiro e o puxo en marcha. Recolleu tres pasaxeiros e cobroulles a tarifa normal, pero só un se decatou de que non levaba o uniforme e de que o autobús estaba demasiado vello e sucio como para estar en servizo, polo que chamou á policía. Cando foi detido, o rapaz preguntou que lle ía pasar e dixéronlle que estaba arrestado por roubo e que sería enviado a un reformatorio. Ritchie dixo: «por que? Conduzo o autobús mellor que a meirande parte dos condutores e non ten nin unha rabuñada». Davis estaba en liberdade condicional por ter roubado xa anteriormente un autobús turístico privado.

Deteñen dous burros por provocar un caos no tráfico en México
A policía mexicana detivo e levou a un depósito de vehículos dous burros por teren obstruído unha vía rápida e provocado un importante atasco no municipio de Atlixco, en Puebla, segundo informaron funcionarios policiais.
Juan Vicente Flores, director de tráfico, explicou que os dous burros foron detidos porque estaban a poñer en perigo os condutores. Quedaron no depósito de vehículos, amarrados na parte de fóra, aínda que ninguén os reclamou aínda. Afortunadamente, os dous animais non provocaron ningún accidente. Os axentes seguen a buscar o propietario dos burros, aínda que aseguran que non se lle aplicará ningunha multa.

Dous submarinistas rescatan no Cantábrico un rebeco
Os irmáns Juan e Miguel Ángel Álvarez Fernández, veciños da localidade asturiana de Grado, atopábanse practicando a pesca submarina a dúas millas ao norte de Cudillero, cando, ao subiren á superficie, atoparon un rebeco nadando. Os buceadores subiron o exemplar a bordo dunha lancha e levárono ata o porto de San Juan de la Arena, dende onde foi trasladado a un centro de recuperación de animais en Luarca.
O rebeco atópase nun bo estado físico, aínda que non se explica como puido chegar ata tan lonxe. Xa se deron casos, de todos os xeitos, de xabarís e corzos en circunstancias semellantes. O rebeco é un animal típico da alta montaña, mide uns 75 centímetros de alto e pesa arredor de 25 quilos.

Un xuíz dos EUA condena un home a levar unha camiseta coa mensaxe «son un depravado sexual»
Un xuíz do estado de Delaware condenou un exhibicionista que amosou en dúas ocasións o seu órgano sexual diante dunha nena de 10 anos a usar unha camisola que leve escrita a frase «son un depravado sexual». O xuíz Jan Jurden, de Wilmington, tamén sentenciou o acusado, Russell Teeter, de 69 anos, a 60 anos de cadea.
Aínda que non se especificou a cor das letras, si se di que deben destacar moito.
O castigo foi por suxestión do vicefiscal do estado, Donald Roberts, quen lembrou que Teeter tiña un longo historial de depravacións dende o ano 1976. O condenado tamén será sometido a un tratamento médico contra o seu exhibicionismo compulsivo.
Cando saia da cadea, Russell Teeter deberá mercar a camisa e levala durante 22 meses cando traballe.

Despiden unha condutora de bus por facerlle un xesto obsceno a Bush ao volver do zoo
Unha condutora de autobús de 43 anos foi despedida por facerlle un feo aceno ao presidente dos EUA, George W Bush, polo que xa presentou unha queixa formal polo seu cesamento. Segundo a empresa, o despedimento non foi por motivos políticos, senón por facer xesto diante dos nenos.
Os feitos aconteceron o 16 de xuño, cando a chofer levaba os nenos de volta á escola de Issaquah, no estado de Washington, despois de visitar o zoolóxico, cando se atoparon coa comitiva de Bush e do representante republicano Dave Reichert. Os nenos saudaron o presidente coas mans, o que foi correspondido por Bush, pero cando a limusina chegou á altura da condutora, ela amosoulle o puño pechado cun dedo teso, o do medio.
A muller, que non se identificou, foi despedida en setembro despois de que a oficina de Reichert denunciase o caso perante os seus superiores, aínda que as autoridades do distrito xa coñecían o asunto, porque ela mesma llelo contara os seus amigos.
Segundo a superintendente escolar, Jane Barry, o despedimento non foi por motivos políticos, e se llo tivese feito a calquera outra persoa diante dos nenos, terían tomado a mesma medida.

Unha fan demanda os Rolling Stones por 51 millóns de dólares por teren suspendido un concerto
Os Rolling Stones cancelaron o martes un concerto en Hawaii para que Mick Jagger descanse a súa voz, ao tempo que unha fan demandou a banda por 51 millóns de dólares porque non cumpriron cunha actuación en Nova Jersey a semana pasada
Unha voceira anunciou que o grupo cancelaría o concerto do 22 de novembro no estadio Aloha de Honolulu, o primeiro que dan no arquipélago dende hai oito anos. Así mesmo, os Stones modificaron as datas doutros tres espectáculos apra que Jagger, de 63 anos, se poida recuperar.
Mentres, unha fan de Brooklyn demandou a banda por ter cancelado outro concerto o 27 de outubro en Atlantic City, New Jersey, catro horas antes do comezo.
Rosalie Druyan presentou o martes unha demanda colectiva na Corte Suprema de Manhattan acusando a Jagger e os Stones de fraude e de ter actuado de mala fe na cancelación, da que afirmou que lle ocasionara a ela e a miles de fans a perda de cartos en reservas de hoteis que non poderán recuperar.
Druyan mercou duas entradas na internet por 575 dólares e afirmou que cando soubo da cancelación non puido anular as súas reservas no hotel Trump Taj Mahal, que custaron 300 dólares.
Non é a primeira vez que a gorxa de Jagger provoca cancelacións. En agosto suspendéronse dous concertos en España polo mesmo motivo. Ademais, a xira europea xa sufriu un atraso despois de que o guitarrista Keith Richars sufrira unha ferida na cabeza.

Billetes desfanse de xeito estraño en Alemaña
As autoridades alemás están intrigadas co misterio dos billetes que se desfán nas mans como se se queimasen. Os relatos sucédense en polo menos quince cidades, nas que desapareceron de xeito misterioso máis de mil billetes.
O Banco Central Europeo xa encargou unha investigación para que se averigüen as causas deste estraño fenómeno.
O primeiro caso rexistrouse o 21 de xuño, en Berlín. Un mes máis tarde verificouse un caso idéntico noutra institución bancaria. Ao principio, a policía pensou que se tratara de casos illados, pero logo aconteceu o mesmo a varias persoas en polo menos quince cidades alemás.
De momento, descártase que se tratase de atentados contra a moeda única. A investigación asegura que os billetes foron impregnados dun sulfato que se transforma en ácido sulfúrico en contacto coa humidade, como a suor das mans.

Dous homes decláranse culpables de roubarlle segredos á Coca-Cola
Ibrahim Dimson, de 29 anos, e Edmund Dunahey, de 43, recoñeceron nun xulgado de Atlanta a súa culpabilidade de roubarlle segredos industriais á empresa Coca-Cola e de tentarllos vender á competencia, a Pepsi Cola.
Os dous procesados enfróntanse a penas máximas de 10 anos de cadea e multas de 250.000 dólares, nunha sentenza que se ditará o 29 de xaneiro.
A investigación do caso comezou en maio, cando uns directivos da Pepsi en Nova York recibiron unha carta asinada por un tal Dirk na que lles ofrecían segredos da Coca-Cola. Os directivos da Pepsi puxéronse en contacto coa competencia, que á súa vez o denunciou perante o FBI.
Un axente desta institución fíxose pasar por un directivo da Pepsi interesado na información, pola que presuntamente lle esixiron un millón e medio de dólares. Unha terceira implicada e suposta artífice do negocio, Joya Williams, foi gravada no traballo mentres aparentemente roubaba documentos e unha botella con mostras dunha nova bebida de Coca-Cola.

A policía británica busca un home que caga nos trens
Un delincuente escatolóxico converteuse nunha das persoas máis buscadas na Gran Bretaña. Segundo informa Sky.com, o individuo xa fixo as súas necesidades en polo menos 30 trens, deixando os excrementos dentro dos vagóns, o que supuxo uns danos valorados en 60.000 libras.
O home ten sempre o mesmo modus operandi: agarda a quedar só no vagón para se poder concentrar e defecar. O efecto das súas accións provoca tanta repugnancia que varios dos trens afectados foron retirados do servizo. Segundo a policía do transporte, este hábito é un risco para a saúde pública.
O suxeito practica as súas actividades en diferentes momentos os sete días da semana.

Una galería galesa abre unha exposición na que non se expón nada
O Chapter Arts Centre, de Cardiff, propón o último en arte conceptual: unha galería baleira, coas paredes totalmente espidas. Esta mostra convida aos visitantes a lembrar as súas experiencias noutras salas de arte. A idea dos organizadores é existir en dous espazos ao tempo: o lugar no que se está e mailo que se atopa na memoria.
O promotor desta obra, titulada Galería Espazo Lembranza, é Simon Pope, de 40 anos, que asegurou no xornal The Independent que o seu proxecto é totalmente serio.
Pope, en colaboración co neuropsicólogo Vaughan Bell, pretende recrear os síntomas dun trastorno coñecido como paramnesia reduplicativa. Aínda que o convite ao recordo dese espazo pode parecer unha parvada, as respostas que se poden acadar son moi complexas. Así, mentres algúns visitantes reaccionan como se se lles gastara unha broma, outros móvense pola sala baleira coma mimos ou figuras dun ballet.
A mostra está aberta en Cardiff, país de Gales, Reino Unido, ata o 5 de novembro.

Unha muller exipcia divórciase para poder levar veo
Naama, de 63 anos, nai de 4 fillos e avoa de nove netos, decidiu deixar o seu home, de 65 anos, porque el lle recomendaba usar un pano lixeiro que só lle cubría o cabelo, en lugar do tradicional hiyab. Segundo o seu ex-marido, o veo que se considera a norma mínima para as mulleres relixiosas, podía resultar desagradable para os convidados estranxeiros. Por este motivo, ela rebelouse e pediu o divorcio.

Asaltan uns asaltantes que roubaran un coche no Río de Janeiro
Unha parella de asaltantes que viñan de roubar un coche familiar foron asaltados pouco despois por outra banda de delincuentes, segundo fontes policiais. O dobre delito aconteceu o pasado sábado á noite no barrio carioca de Tijuca, cando unha muller, seu irmán e o fillo del de cinco anos volvían dunha festa infantil. Cando pararon a recoller a súa sobriña foron sorprendidos por dous homes armados con revólveres.
Estes primeiros delincuentes subiron ao coche, pero, poucos minutos despois, os criminais e os seus catro reféns foron interceptados por outro automóbil, do que baixaron tres homes armados con pistolas. Estes sacaron o condutor do vehículo roubado, mentres que o seu cómplice fuxiu coa carteira e os bens dos auténticos propietarios do coche. Os tres criminais, os segundos, deixaron a familia marchar e fuxiron co vehículo, que apareceu á mañá seguinte con diversos danos.

Ronaldo sairá nun episodio dos Simpson
O dianteiro do Real Madrid Ronaldo aparecerá nun episodio da serie de debuxos animados Os Simpson. O xogador brasileiro actuará como profesor de fútbol da familia Simpson nun capítulo que se emitirá a comezos do ano que vén na canle estadounidense FOX, segundo informou a ‘Folha de São Paulo’.
Os Simpson xa provocaran polémica no Brasil hai uns anos cun episodio no que a familia viaxaba ao país sudamericano e sufría todo tipo de penalidades: Homer era secuestrado nada máis desembarcar nun Río de Janeiro cheo de monos, Bart era devorado por unha boa e Lisa asaltada. A alcaldía da cidade presentara unha protesta perante os produtores da serie.

Animan a Fernando Alonso a correr espido contra os sanfermíns
A modelo brasileira Fernanda Tavares, no nome da organización Peta convidou ao recente bicampión mundial da Fórmula 1, Fernando Alonso, a participar nunha carreira nudista en repulsa á festa taurina do San Fermín en Pamplona.
Segundo informou a web deportiva Lance, Alonso recibiu unha carta da modelo na que o convida a tal evento, que se vai desenvolver de xeito paralelo ás festas pamplonesas, do 6 ao 14 de xullo.
Na carta, Tavares expón: «gustaríame moito que vostede correse canda nós no 2007. Faga saber que vostede apoia a carreira de coches, non a tortura aos touros. A Peta creou unha alternativa marabillosa: a corrida humana ou carreira dos espidos, na que miles de persoas corren polas rúas vestidas soamente con pequenos pantalóns ou menos ca iso».

Unha empresa vende o número de Lotaría de Nadal 22106, que conmemora o triúnfo de Alonso
O sitio de internet Ventura24.es comezou a vender números da lotaría de Nadal relacionados con Fernando Alonso, entre eles o 22106, que conmemora a data na que o asturiano gañou o seu segundo mundial. O número, que xa se puxera á venda antes da carreira, converteuse no máis demandado ata agora.
O ano pasado, os que máis éxito tiveron foran o 25905, data na que Alonso se proclamou por primeira vez campión do mundo, e o 31105, data do nacemento da infanta Leonor.
A empresa de venda de lotaría pola internet tamén comercializa outros números relacionados con Alonso, como o 29781, data de nacemento do deportista.

Un multimillonario racha por accidente un Picasso de 110 millóns de euros

O magnate de Las Vegas Steve Wynn está a vivir un pesadelo despois de que, por accidente, lle dera un golpe co cóbado ao cadro El sueño, de Pablo Picasso, que acababa de vender por 110 millóns de euros, e que agora loce un burato.
O contratempo produciuse a semana pasada cando o potentado lles amosaba por última vez o cadro a uns amigos, entre eles a directora e guionista de cine Nora Ephron, quen contou como ocorreron os feitos. Wynn, de 64 anos, estáballes a explicar detalles da pintura, como o pene que forma parte da cabeza da amante do pintor, Marie-Thérèse Walter, cando fixo o movemento que provocou os danos. Nese momento, o seu cóbado chocou contra o lenzo. A enfermidade que afecta ao millonario, a retinite pigmentosa, que reduce á visión periférica, tamén foi decisiva no accidente. Ephron contou: «Deulle no medio. Era un burato negro do tamaño dun dólar de prata. El dixo ‘Ou, merda, miren o que fixen. Grazas a Deus fun eu’». O cadro danado foi pintado no ano 1932. En 1997, Steve Wynn mercárao por 40 millóns de euros. Agora tivo que anular a venda para poder reparar a obra de arte.

Vladimir Putin asegura que ten envexa dun violador e considérao un machote
O presidente ruso felicitou o seu homólogo israelí por ser un presunto violador, dixo sentir ‘envexa’ del e considérao ‘un machote’ por violar varias mulleres, segundo informou o periódico ruso Kommersant. «Transmítanlle os meus saúdos ao seu presidente. Que machote! Violar unha decena de mulleres! Non o esperaba del. Sorprendeunos a todos e témoslle envexa». Esta foi a frase que Vladimir Putin dixo diante de Ehud Olmert, primeiro ministro israelí, pensando que os micrófonos estaban pechados. Deste xeito referíase ao presidente de Israel, Moshé Katzav, sospeitoso de delitos como violacións, abusos e acoso sexual. O xornal Kommersant foi o único do país que se fixo eco desta información.

Seguimos en Rusia. Aló investigan se o rei Juan Carlos cazou en agosto un oso borracho
O gobernador da rexión rusa de Vólogda, Viacheslav Pozgaliov, ordenou investigar a cazaría que tivo lugar no mes de agosto durante unha visita privada do rei de España. Un grupo especial terá que comprobar como morreu un oso amestrado durante a caza organizada para Don Juan Carlos, informou a axencia Interfax.
A investigación pretende sair ao paso das informacións publicadas na prensa sobre que nesa cazaría se abateu un oso criado nunha aldea veciña e totalmente manso que foi ademais, emborrachado con abundantes cantidades de vodka con mel.
A Casa Real confirmou que o monarca estivo cazando a finais de agosto en Vólogda, pero cualificou de «ridículas» as versións que se están a difundir sobre o asunto.
A polémica estalou cando o subxefe do departamento de protección e fomento dos recursos naturais de Vólogda, Serguei Stárostin, lle mandou unha carta ao gobernador asegurando que a caza fora todo un espectáculo. A súa protesta supúxolle, supostamente, ameazas de despedimento. Stárostin denunciou que, para satisfacer o monarca español, sacrificouse un oso manso chamado Mitrofán, que dende cachorro se criara na aldea veciña de Novlenski. Supostamente, o animal foi metido nunha gaiola e transportado ata o lugar da cazaría, onde o emborracharon con vodka con mel e o abandonaron no campo. Segundo Stárostin, farsas como esta son comúns no mesmo couto, e son organizadas polo vicegobernador da rexión e mailo xefe do servizo de protección dos recursos naturais da zona.

Un burro case mata unha muller a mordeduras
Joaquina de la Casa Garrido, de 86 anos, salvou a vida de milagre despois de que un burro a atacara a dentadas no medio do campo, a carón da vía Madrid-Lisboa ao seu paso por Montearagón, Toledo. O ataque rematou con cinco costelas rotas, numerosas magoaduras, lesións e cicatrices. Pero as secuelas psicolóxicas son aínda máis graves, con continuos pesadelos que está a sufrir aínda a muller. Os feitos aconteceron o 5 de outubro, cando Joaquina saíu a pasear ás aforas da vila despois da misa das seis e media. Acompañábana outras tres octoxenarias. Pasadas as sete, sentiron un ruído seco detrás súa. Un burro ceibe seguíaas. Era un animal moi agresivo, porque non estaba capado. Aínda que as catro mulleres tentaron agacharse, o burro agarrouse a Joaquina e comezou a darlle couces e a mordela. O feroz ataque durou varios interminables minutos, ata que uns mozos que se atopaban nun parque próximo oíron os orneos e foron acudir pola muller. Só puideron reducir o animal cando lle deron unha pedrada entre as orellas.
Joaquina, despois de varios días no hospital, afirma que se salvou de milagre. A súa filla di que foi decisiva a súa fortaleza física.

Presentan en Madrid o puro máis caro do mundo, a 15.000 euros a caixa
O cigarro máis caro do mundo, o Cohiba Behike, presentouse este xoves na Casa de América de Madrid. Só se fabricaron 4.000 unidades para celebrar o 40 aniversario da marca cubana. Estes xarutos, que se distribuirán en 100 estoxos de 40 unidades a un prezo de 15.000 euros, foron elaborados por Norma Fernández, unha das torcedoras máis veteranas da fábrica El Laguito.
O tabaco sométese a un proceso de secado de entre cinco e seis anos, e os cigarros, numerados do 1 ao 4.000, teñen unha lonxitude de 192 milímetros.
A caixa está fabricada en ébano negro, nácar, sicómoro, cedro e óso de boi, cunha placa na que estarán gravados o nome do propietario, o número do humidor ou estoxo (do 1 ao 100) e a serie que contén, para evitar as falsificacións.

Os personaxes de Walt Disney póñense a dieta
O rato Mickey e os seus amigos da compañía Walt Disney están dende agora a réxime, con alimentos máis sans na súa dieta e na dos seus parques temáticos. Deste xeito, xa non seguirán a filosofía de Mary Poppins, que dicía que todo se amañaba cunha cullerada de azucre.
Agora, a prioridade da Disney é combater a obesidade infantil. Así, fixaranse límites de calorías, graxas e azucres e suprimiranse os ácidos graxos trans.
As directivas ditadas pola empresa afectarán tanto á alimentación nos seus parques como aos produtos con licenzas de Disney. Entrarán en vigor inmediatamente nos Estados Unidos e máis adiante no resto do mundo.
Así, as facianas redondas de Mickey e Buzz Lightyear nos produtos de McDonald’s, Kellogg’s ou Coca-Cola deixarán paso a Nemo contento de vender auga ou a Os Incribles felices comendo froita.
Nos parques de atraccións de Disney nos EUA pasan cada ano 63 millóns de persoas, que xa poden consumir leite desnatado ou zume de froita no menú infantil, ademais de ravioli orgánicos coa forma de Mickey.

Presentan un aparello que fai os obxectos invisibles
Científicos estadounidenses e británicos xa deron o primeiro paso cara á invisibilidade. Este xoves anunciaron que atoparon un xeito de ocultar un obxecto mediante unha radiación de microondas. Segundo un dos inventores, David Smith, non é como Harry Potter, que pode empregar unha capa máxica para se facer invisible. O prototipo aínda é imperfecto. En vez de ser unha esfera que recubra totalmente os obxectos, só funciona en dúas dimensións e nunha marxe estreita de microondas. Polo tanto, a invisibilidade non é total.
Este escudo baséase en metamateriais que poden reducir a reflexión do obxecto e a súa sombra, co que se fai transparente á radiación.
A teoría publicouse no mes de maio, e só tardaron cinco meses en demostrala. O aparello é pequeno e ten un diámetro de 30 centímetros. Xa están a traballar nunha versión tridimensional que bloquee o espectro visible.

Esperta e atopa un león dentro da casa
A chilena Olga Bustamante espertou o venres de madrugada cun súpeto presentimento de que algo estraño acontecía. Baixou nerviosa da cama, foi ao cuarto de baño e entón oíu un forte ruxido que a acabou de espertar.
Na súa casa, na localidade de Rancagua, 80 quilómetros ao sur de Santiago de Chile, había un león.
Segundo informou a emisora Radio Digital FM, a muller chamou á policía, que despois duns minutos conseguiu capturar o animal.
O felino, chamado ‘Xiango’ fuxira da súa gaiola do circo ‘Las águilas humanas’, xunto a outros dous animais, que tamén foron felizmente recuperados.

Dimiten os líderes dunha igrexa que adoraba a marihuana
Dan e Mary Quaintance, parella de Pima, Arizona, renunciaron a seguir dirixindo unha congregación que considera que a marihuana é un sacramento e unha divinidade. O motivo da dimisión foi que os cargos federais aos que se enfrontan impídelles dirixir a igrexa. No mes de febreiro foron arrestados por levar no coche 78 quilos de marihuana, e enfróntanse a unha posible condena de 40 anos de cadea nun xuízo que se celebrará o vindeiro día 30.
Dan Quaintance, de 53 anos, está preocupado porque a súa igrexa está fracturada, sen líderes espirituais. A congregación fundouna no ano 1991 e consta de 45 membros.
A defensa baséase na liberdade de credo para que se lles permita empregar unha droga ilegal, aínda que o fiscal asegura que a igrexa é só unha tapadeira para o tráfico de estupefacientes.
Pero hai precedentes ao seu favor. No mes de febreiro o Tribunal Supremo decidiu que o goberno non tiña dereito de requisarlles un té alucinóxeno aos membros dunha igrexa de Novo México, denominada O Centro Espirita Beneficiente União Do Vegetal.

Pagan case medio millón de euros pola maqueta da nave Enterprise de Star Trek
Unha maqueta da nave Enterprise que se empregou no episodio piloto e posteriores da serie Star Trek A Nova Xeración vendeuse o sábado nunha poxa por 576.000 dólares, 454.800 euros.
Tamén se sacaron a poxa traxes e ferramentas que se usaron ao longo dos 40 anos de historia da serie de ciencia-ficción.
A miniatura, construída pola empresa Industrial Light and Magic, estreouse nas pantallas de televisión no ano 1987, e converteuse nunha das estrelas tanto da serie como das versións cinematográficas.
A casa Christie’s calculou que a maqueta se vendería por entre 25.000 e 25.000 dólares, pero as previsións quedaron moi curtas. Os máis de mil obxectos relacionados coa serie vendéronse durante tres días en Manhattan e, por eles, os estudos CBS Paramount recadaron 4,9 millóns de dólares, 3,87 millóns de euros.

Un sueco cultiva a cabaza máis grande de Europa. Pesa 534,1 quilos.
O domingo pasado presentouse en Ludwigsbourg, suroeste de Alemaña, a cabaza máis grande de Europa, nun campionato anual. A deste ano pesa 534,1 quilos, o que supera amplamente os 475 da presentada na edición anterior por un cidadán belga.
O dono da enorme cabaza é un sueco de 32 anos, vendedor de mobles, e que tardou 28 horas en levar a hortaliza dende Alem ata Ludwigsbourg. O gañador asegurou que para conseguir unha cabaza deste tamaño fai falla boa terra e moita auga.
No certame participaron catorce persoas de oito países que competían por un premio de 3.000 euros. Os organizadores aseguran que, aínda que estas cabazas son comestibles, o seu sabor non é moi bo.

En Irán, ter o número de móbil 123456789 costa 76.000 dólares
O ministerio de Telecomunicacións do Irán puxo á venda un total de 500 números de móbil de doada memorización a prezos que oscilan entre os 800 e os 76.000 dólares, do 123456789. No estado islámico, os números celulares comezan polo prefixo 09. Dos preto de 11 millóns de liñas que existen no Irán, os 400.000 números máis doados de lembrar fóronlles dados a responsables do ministerio ou ben están á espera de seren repartidos.
Os sobres coas ofertas polos primeiros 500 números que sairán á venda abriranse o día 30 de outubro perante un representante da xustiza. O diñeiro recadado servirá para mellorar a rede de telefonía.
Actualmente, o titular do 0912-3456789 é un responsable do ministerio, que recibe cada día máis de 30 mensaxes de xente que quere mercar a liña. Algúns mesmo propuxeron 1.000 millóns de riais (algo menos de 100.000 euros) ou cambiar o número por un apartamento.

O goberno británico financia un robot contra a calvicie
O goberno do Reino Unido financiará con 1,85 millóns de libras esterlinas (2,75 millóns de euros) unha empresa de Cambridge que está a construír un robot para axudar a tratar a calvez.
Con este diñeiro, a empresa Intercytex espera mellorar un tratamento que consiste en coller folículos da caluga, multiplicalos e implantalos na cabeza. Por merio dun sistema robótico pretende acelerar o proceso de multiplicación das células capilares.
Segundo explicou o conselleiro delegado de Intercytex, Nick Higgins, a tecnoloxía é un desafío, pois ninguén fixera antes algo así.
A investigación da compañía británica atópase na fase de análise, despois de ter ensaiado nun pequeno grupo de voluntarios. O cabelo extráese nunha operación de 30 minutos con anestesia e reimplántase tres semanas despois.

O príncipe Carlos de Inglaterra afirma que a súa familia é como unha telenovela
O presentador da BBC Jeremy Paxman, no seu libro ‘On Royalty’, sobre a familia real británica, conseguiu unhas interesantes declaracións de varios dos seus membros.
Así, o príncipe Carlos, reflexionando sobre o papel da súa familia no Reino Unido actual, asegurou: “Creo que somos unha telenovela”.
Tamén se conta que o príncipe pide que os cociñeiros lle fagan sete ovos cocidos para poder escoller o que teña unha consistencia perfecta, aínda que os propios empregados da casa real negaron oficialmente esta historia.
Pola súa parte, o pai de Carlos, o príncipe Filipe, coñecido polos seus comentarios politicamente incorrectos, afirmou que se retirou voluntariamente da exposición aos medios para evitar provocar máis situacións vergoñentas.
O home da monarca británica dixo: “Cada vez que falo cunha muller din que me deitei con ela, como se ela non tivese poder de decisión no tema”. Con 85 anos, Filipe concluíu: “Á miña idade, síntome afagado por que algunha moza estea interesada por min, pero é absolutamente absurdo”.

As mulleres que leven pantalóns nunha rexión angolesa deberán pagar dúas cabras de multa
O rei angolés Bingo-Bingo ditou a semana pasada unha serie de normas que pretenden preservar unha determinada moral pública. Así, na rexión de Cuito Cuanavale, provincia de Kuando-Kubando, as mulleres que vistan pantalón terán que pagar unha multa de dúas cabras.
Os homes que manteñan relacións sexuais cunha muller casada que non sexa a súa, terán que aboar catro bois, e se deixan preñada unha muller antes da voda, pagarán dous bois.
Outro dos castigos impostos por Bingo-Bingo consiste en vinte lategazos aos que fagan as súas necesidades na rúa.
A pesar do empeño deste rei, o uso do pantalón está moi estendido entre as mulleres da zona, non tanto no norte de Angola, onde o costume tradicional obriga as habitantes de sexo feminino a levar saia.

Unha muller fea demanda un programa de televisión pola morte da súa irmá
Unha muller de Texas demandou o reality show da cadea estadounidese ABC ‘Extreme Makeover’ (remodelación extrema) por máis dun millón de dólares. A demandante afirma que a cancelación da súa aparición no programa levou á morte á súa irmá.
Deleese Williams, de Conroe, Texas, asegura que foi aos Ánxeles a concursar no programa despois de facer probas médicas para saber se os seus dentes tortos e ollos saltóns se podían amañar, e se o seu peito se podía realzar. Na descrición asegúrase: “Deleese Williams é fea, e un médico prometeulle un sorriso de Hollywood coma o de Cindy Crawford”.
Previamente ao programa, os produtores mandaron varias persoas á casa de Williams para facerlle unha entrevista á familia, na que, segundo a demanda, o programa manipulou a irmá da concursante, Kellie, para facer declaracións crueis sobre a aparencia de Deleese.
A noite antes do cambio de imaxe, os produtores aseguraron que lle levaría demasiado tempo cicatrizar a queixada, polo que cancelaron a súa participación no programa. Kellie, moi afectada polo que dixera da súa irmá, presuntamente suicidouse. A cadea ABC, propiedade da compañía Walt Disney, non quixo facer comentarios ao respecto.

Un xaponés recita de memoria 100.000 decimais do número pi
Un psiquiatra xaponés, Akira Haraguchi, de 60 anos, pasou dezaseis horas recitando de memoria 100.000 cifra decimais do número pi, co que afirma que superou un récord do mundo. A experiencia tivo lugar nun auditorio de Kirasazu, ao leste de Toquio.
O xaponés comezou a recitar as cifras o martes ás nove da mañá e rematou á unha e 28 minutos da madrugada do mércores.
Haraguchi fixo pausas de arredor de cinco minutos cada unha ou dúas horas, indo a unha sala de descanso e comendo bólas de arroz. Todas as súas actividades, mesmo cando ía ao baño, foron gravadas para que o libro Guinness comprobe a súa veracidade.
O número pi (π) é a relación entre a lonxitude da circunferencia e o diámetro da mesma (nunha xeometría euclídea), e represéntase normalmente reducíndoo aos seus dous primeiros decimais: 3,14.
Como número irracional que é, non hai límite teórico ao número de decimais que o forman. Akira Haraguchi asegurou que non só pretende memorizar as cifras, senón tamén procurar unha historia en pi.
No ano 2002, matemáticos da universidade de Toquio, coa axuda dun supercomputador, acadaron o récord do mundo de cálculo de cifras do número pi, cun total de 1,24 billóns de decimais.

Gañan os premios Ig Nobel 2006 un estudo para curar o impo e outro sobre o cheiro dos pés
A Universidade de Harvard entregou esta semana os premios Ig Nobel, nos que se honran os traballos científicos máis absurdos do ano, coincidindo coa entrega dos Nobel en Suecia.
Os gañadores foron anunciados pola revista de humor ‘Annals of Improbable Research’, que resaltou o traballo feito por científicos estadounidenses e israelís para curar o impo. Segundo eles, a introdución dun dedo no ano é un remedio infalible. O Ig Nobel de Bioloxía levouno Bart Knols, da Universidadr Wageningen de Agricultura en Holanda, o Instituto Nacional de Investigación Médica de Tanzania, e o Organismo Internacional de Enerxía Atómica, por demostrar que o mosquito ‘Anopheles gambiae’ que transmite a malaria, se sente atraído polo cheiro do queixo limburgo e dos pés humanos.
En Matemáticas, os gañadores foron dous australianos que calcularon o número de disparos fotográficos necesario para que todas as persoas dun grupo saian cos ollos abertos.
Outros estudos premiados foron un sobre por que é tan molesto o ruído que fan as unllas sobre unha pizarra e o invento dun dispositivo repelente para adolescentes, que só eles poden oír.

Un anglo-canadense busca muller a través dun blogue
Hai un par de semanas falabámoslles dunha italiana que ofrecía no seu blogue unha noite de sexo a cambio dun contrato fixo. Pois ben, agora un anglo-canadense de 29 anos, Allan Wills, está a empregar o seu diario persoal para atopar a muller da súa vida.
Na súa páxina, areyoumywife.blogspot.com, asegura que irá a calquera parte do mundo para obter a cita perfecta. El mesmo paga as viaxes, aínda que non rexeita que llos agasallen, pero ao final sempre comparte os gastos. Recibiu propostas dunha muller cun veo, á que só se lle vían os ollos, a dunha web matrimonial vietnamita e mesmo a dunha australiana casada que asegurou estar a pensar seriamente en divorciarse.
Este home, residente en Londres, non está interesado en propostas masculinas, fala inglés, francés, español e italiano, non fuma e non ten pelos nas orellas. Ata o momento, ten once firmes candidatas, das que dúas xa eran amigas súas. A que ten todas as papeletas é unha norteamericana, de Utah, que xa ten dereito a unha segunda cita e que xa lle presentou a súa nai a Wills.

Un ucraíno inventa un condón musical
En Ucraína vai saír á venda un preservativo musical que sobe automaticamente o volume e o ritmo da canción segundo a intensidade do acto sexual.
O seu intentor é Grigoriu Chausovsky, da cidade de Zaporozhye, quen afirma que o condón está dotado dun sensor que rexistra cando é introducido. Ese sensor transmítelle un sinal a un microaltofalante, instalado na base do profiláctico, e que interpreta a canción.
Segundo Chausovsky, como o sexo se volve máis apaixonado, o aparello percibe a velocidade crecente dos movementos e toca a melodía máis rapida e ruidosamente.

Unha canadense gaña a lotaría despois de ter un soño
Mary Wollens, canadense de 85 anos, gañou 16 millóns de dólares (11,2 millóns de euros) á lotaría grazas a un soño. A muller, que vive en Toronto, mercara un billete e, días antes do sorteo, soñou que o boleto estaba acompañado dun gran cheque. Grazas a isto, mercou un segundo billete coa mesma numeración, polo que levou o dobre de premio do que lle tería correspondido nun principio. Mary Wollens gañou os dous terzos do premio de 24 millóns de dólares canadenses, que terá que compartir con outro acertante.
A señora espera ir ás Vegas a probar a súa sorte nos casinos e mercar unha casa nova, segundo declarou ao Toronto Star. Mary Wollens está xubilada, ten un fillo e un neto e perdera o seu home e a súa filla hai varios anos.

Denuncian un profesor de universidade chinés que se espiu nunha clase de arte
Mo Xiaoxin, profesor asociado de 56 anos na universidade de Changzhou, ao leste da China, deixou aparvados aos seus alumnos ao se espir durante unha clase de arte corporal para enfatizar o poder do corpo e desafiar tabús, segundo informou Beijing News.
Un voceiro do ministerio de Cultura afirmou que aínda que non existen tabús no eido da investigación, facer isto durante unha clase non é o axeitado.
A sesión formaba parte dun curso do recén creado instituto de investigación sobre a arte e cultura corporal humana.
Mo contou co apoio de catro modelos: unha parella de 70 ou 80 anos e outra máis nova, que se espiron diante do público mentres el daba clase.
Durante a aula, que durou case unha hora, o profesor tamén convidou aos estudantes a se espiren. Un alumno afirmou: «o profesor Mo parecía moi excitado emocionalmente nese momento. Mentres falaba, afrouxou o cinto e sacou os pantalóns, e permaneceu espido sobre a tarima».
A sesión núa fixo que moitos dos 30 estudantes se sentisen incómodos. Algúns miraron ao teito e outros ao chan.
Segundo o voceiro do ministerio de Cultura, o curso aínda está en fase de estudo, e non se sabe se produciu efectos positivos ou negativos.

Pagan 4.300 euros por unha Barbie
A sala Christie’s, de Londres, sacou a poxa a que se cre maior colección privada de Barbies, composta por case 4.000 bonecas de 29 centímetros. As propietarias, as holandesas Ietje Raebel e Marina Kochen, fóronas reunindo durante corenta anos. Na colección inclúense tamén varios Kens e outros membros da familia da Barbie, e ocupaban tres cuartos enteiros da casa da propietaria.
O lote que acadou o prezo máis alto foi a morena Barbie numero 1, do ano 1959, en traxe de baño, pola que se pagaron 2.880 libras, que ao cambio veñen sendo 4.300 euros.
En total, recadáronse 145.000 euros pola colección completa, que se vendeu integramente. As donas non quedaron nin sequera coa súa preferida, a Gala Evening Barbie, vestida con traxe de noite e abrigo azul satén. As propietarias chegaron a pensar en abrir un museo, pero ao final non souberon que facer con tantas bonecas.

Un rapaz de 14 anos escapa de Miami a Cuba por amor
Un adolescente de 14 anos fixo unha viaxe oposta á habitual nestes casos, dende Miami ata Cuba, supostamente por amor. Todo isto fíxoo despois de lle roubar a tarxeta de crédito ao seu pai e pasar polos controis do aeroporto sen que ninguén se decatase da súa idade, segundo informou El Nuevo Herald.
O neno, Alfredo Díaz, colleu un voo de Miami ás Bahamas e de alí a Cuba. Seu pai, co mesmo nome, recibiu unha chamada da illa na que lle dixeron que o menor estaba aló. Nese momento, soubo que o seu fillo mercara o billete por internet coa súa tarxeta de crédito.
«Non podo crer que o meu fillo puidera pasar todos os controis de seguridade e que non o detivesen nin lle preguntaran por que viaxaba só», explicou.
O rapaz viaxara hai uns meses a Cuba, onde coñeceu á rapaza dos seus amores.

Un preso foxe da cadea agochado no lixo
Un recluso de 22 anos conseguiu escapar do cárcere despois de pasar máis de dez horas agochado nun colector de lixo do penal de San Francisco, na provincia arxentina de Córdoba.
Leandro Stessen, que cumpría unha condena por roubo, conseguiu despistar dous gardas e meterse dentro dun dos colectores que logo se verteron nun camión do lixo sen que ninguén se decatara da súa presenza.
Cando o vehículo parou diante da saída do cárcere, o mozo saíu de entre os refugallos, saltou o arame de seguridade e fuxiu nunha bicicleta que agardaba por el á saída.
As autoridades abriron unha investigación para coñecer a responsabilidade dos gardas que presenciaron a fuxida.

Deteñen un home que manipulou o teléfono dun ascensor para chamar ao estranxeiro
Os mossos d’esquadra detiveron o martes un cidadán francés veciño de Roses (Girona), acusado de manipular o intercomunicador de emerxencias do ascensor do edificio no que vivía para facer chamadas a Francia e a Rusia.
O custo destas comunicacións foi de aproximadamente 500 euros.
Ese foi o importe da factura que recibiu a comunidade de veciños, titular da liña, que decidiu denunciar a situación o 18 de setembro.
Os investigadores descubriron que alguén manipulara o teléfono do ascensor, para facer chamadas a Francia, Rusia e varios puntos de España.
As sospeitas recaeron nun cidadán francés que vive en Roses e que ten unha muller rusa. Richard P, de 42 anos e veciño do bloque, foi detido o martes como presunto autor dun delito de defraudación de fluído eléctrico e análogos.
Ademais, o home estaba reclamado pola xustiza francesa por un delito contra a liberdade sexual. Xa tiña antecedentes por feitos semellantes e fora acusado de violación, chantaxe e roubos con arma de fogo en Francia.

Abre na China un hotel con lingotes de ouro na entrada
Na cidade chinesa de Harbin, no nordeste do país, abriu un hotel que ten no chan da planta baixa 270 quilos en lingotes de ouro. Estes, colocados como lastros, atópanse debaixo dunha cuberta de vidro no recibidor do hotel e forman dous corazóns de ouro.
O hotel chámase Paradise Island e é propiedade da inmobiliaria chinesa Wanda. Aínda que non se fixo público o custo do chan de ouro, calcúlase que o seu prezo oficial máis os gastos do transporte poderían acadar os cinco millóns e medio de euros.
O obxectivo do adorno é atraer clientes. O director de vendas do hotel, Yin Yingchuan asegurou que xa moitas persoas se achegaron a velo e que algúns quedaron a cear.

Un neno inglés de 3 anos merca un coche convertible rosa por 13.400 euros
Jack Neal ten só tres anos, pero converteuse, por pouco tempo, no dono dun coche convertible de cor rosa despois de mercalo por 9.000 libras, 13.400 euros, a través do portal de internet eBay.
A súa nai declarou á BBC que deixara o ordenador conectado co contrasinal para acceder á páxina de poxas virtuais, e que o seu fillo usou a opción de «mercar agora» para facer efectiva a compra.
Jack é moi esperto para usar o computador e ademais premeu todos os botóns correctos, afirmou, orgullosa, Rachel Neal.
O home que ofrecía o automóbil, un revendedor de Worcestershire, quedou sorprendido pola tentativa de compra e acordou non forzar a venda.
Por sorte, segundo a señora Neal, viu o asunto con humor e vai publicar de novo o anuncio.