Rouban cinco millóns de euros para gastalos en lotaría… e non lles toca
Dous empregados de banco chineses, que durante un ano levaron da oficina uns 4,85 millóns de euros, gastaron practicamente todo o diñeiro en lotaría, pero apenas levaron ningún premio, informou o Beijing Times. Ren Xiaogeng e Ma Xiangjing, que se atopaban entre os máis buscados da China, resultaron ser dous ludópatas que non podían deixar de marcar boletos da lotaría deportiva estatal, xogo no que se demostrou que é difícil gañar premios.
Ren e Ma comezaron a subtraer cartos do banco hai un ano, confiando en que lles tocara a lotaría e así poderen devolver o roubado. Pero o premio non chegou. O banco non sospeitou nada ata o principio desta semana, cando os dous empregados non acudiron ao traballo e os seus compañeiros chamaron á policía, sospeitando o peor.
Os dous ladróns foron detidos este xoves. Ren, ao ser interrogado, queixouse de que a lotaría china é unha estafa e nunca dá premios. Só lles chegaron a tocar 8.820 euros, cando o gordo ten un importe de 460.000.
Aínda que tanto o banco como a lotaría son estatais, é o Goberno o que deberá decidir como o reparte e se o devolve ao seu lugar de orixe.

Case lle arrinca a lingua dun apaixonado bico
Unha muller israelí mordeu este xoves por accidente parte da lingua do seu mozo durante un apaixonado bico, segundo informou o hospital que lle tivo que reimplantar o órgano. O hospital de Nahariya dixo nun comunicado que o home, ferido durante «o apaixonado bico da súa moza», foi dado de alta despois da operación. Recomendáronlle tomar bebidas moi frías e evitar os bicos húmidos ata que lle curen os puntos.

Unha muller sálvase por saír a fumar
Brenda Comer, de Rock Hill, Carolina do Sur, acababa de fregar os pratos o luns á mañá e saíra da casa para fumar un cigarro cando viu como un carballo de 24 metros de alto caía enriba do tellado da súa casa, informou o xornal The Herald este venres. A árbore caeu sobre o fregadeiro onde segundos antes estivera a limpar a louza, confesou Comer. «Cariño, xa sei que me criticas por fumar», díxolle ao seu home, «pero hoxe salvoume a vida». O carballo, derrubado polo intenso vento, case lle dá á filla da parella, que se atopaba no outro estremo da casa. Segundo o seguro, a familia non poderá seguir vivindo alí, porque o edificio quedou partido pola metade.

Aparece en Australia un iate á valga, baleiro e coa mesa posta
Un misterioso iate pantasma aparecido en Australia ten intrigada a Policía. A embarcación, atopada polos servizos de emerxencia do estado de Queensland, estaba deserta, sen tripulación nin bote salvavidas, pero coa mesa posta e os ordenadores acesos.
O Kaz II partira o domingo de Arlie Beach, ao norte do estado, con tres homes a bordo, e apareceu á valga o mércores. Non hai rastro de ningún dos tres pasaxeiros. Segundo un voceiro do servizo de emerxencias de Queensland, todo parecía normal, co motor en marcha e en punto morto, e a radio e o GPS en funcionamento, aínda que cunha vela danada.
Helicópteros, avións e barcos seguirán buscando nos vindeiros días polos desaparecidos nun raio de 700 millas náuticas, tendo en conta tamén o itinerario rexistrado no GPS. Especúlase que a desaparición dos tripulantes se deba a que se botaran a nadar no mar sen teren despregada a escada do barco para volver subir.

Queren sedar 300 cabalos para o concerto dos Stones no hipódromo de Belgrado
Os amantes dos animais están anoxados pola pretensión de sedar os 300 cabalos do hipódromo da capital Serbia para telos calmados durante o concerto dos Rolling Stones, previsto para o 14 de xullo. Espérase que á actuación asistan máis de 100.000 espectadores, no maior recinto pechado de Belgrado. Os cabalos estarán a poucos metros do escenario. Preténdeselles subministrar diazepam, comercializado en Serbia coa marca Bensedin e na meirande parte do mundo como Valium e moi popular no país polo seu uso como tranquilizante durante a guerra dos Balcáns.
A sociedade de protección dos animais máis importante de Serbia, ORCA, dixo que organizar o concerto nesas circunstancias pode ser moi daniño para as bestas, e que sedalas non é a solución, pois o ruído e as vibracións son moi estresantes para elas. Por iso, pediron que o concerto se dea nun recinto aberto da cidade, pois tampouco resultaría positivo trasladar os animais. Se non consegue que se cambie o concerto, a ORCA pretende contactar directamente cos Rolling Stones. A banda británica nunca tocara en Serbia. O primeiro, en 2003, cancelárase polo asasinato do primeiro ministro Zoran Djindjic, e en 2006 suspendérase outro polo percance que tivera Keith Richards.

Condenado por roubar os dentes da tumba da súa nai
Un sudafricano que quería que o espírito da súa nai o visitase foi condenado o luns por ter aberto a tumba dela para sacarlle dous dentes do esqueleto. Albert Kgwatisi, de 30 anos, terá que pagar unha multa de 3.000 rands, 310 euros, ou pasar 12 meses na cadea despois de ter explicado perante o tribunal da provincia do Noroeste como sacara o esqueleto da tumba coa axuda dun sobriño de 12 anos. No momento da súa detención, Kgwatisi declarara á Policía que collera os dous dentes para que a pantasma da súa nai, morta hai cinco anos, lle fora facer unha visita para recuperalos.

Percorren 4.000 quilómetros en taxi para que os seus gatos non pasen frío no avión
Betty e Bob Matas, unha parella de xubilados neoiorquinos que se mudou a Arizona, decidiu empregar un taxi para a viaxe, de 4.000 quilómetros, por medo a que os seus gatos pasasen frío no avión. En Nova York non lles custou demasiado atopar un chofer disposto a facer unha viaxe de 38 horas. Douglas Guldeniz aceptou levalos ata Sedona cobrándolles 3.000 dólares, máis os gastos. Coas tarifas que rexen na cidade estadounidense, tocaríalle unha propina de entre 450 e 600 dólares. Á saída da viaxe, Guldeniz parecía contento de facer unha das carreiras máis longas e máis caras da historia.

David Beckham regálalle a Victoria un vibrador de dous millóns de dólares
O futbolista inglés agasallou a súa muller cun obxecto de platino e diamantes co que se sentirá menos soa. Non é un colar, nin unha pulseira, nin un anel, senón un consolador do que se di que vale dous millóns de dólares. Parece ser que os agasallos de tipo sexual están de moda en Hollywood, así que a pseudoglamurosa parella disponse a chegar a Los Angeles e asumir os seus costumes. Segundo informou o xornal Sport, os cartos que vale unha luxosa mansión poderaos ter agora Victoria Beckham entre as pernas. Tamén afirman que o substituto do seu cobizado e desexado marido ben vale o que custa.

Deteñen un falso cura que levaba cocaína agochada na roupa
Un falso sacerdote que pretendía viaxar a Sudáfrica con dous quilos de coca escondidos na sotana foi detido por axentes antinarcóticos no aeroporto internacional de Guarulhos, en São Paulo, informou a policía brasileira. O individuo, de 27 anos, quedou detido o martes á tarde nunha sede policial por tráfico internacional de drogas e pode recibir unha pena de entre cinco e quince anos de prisión. Vestido con prendas negras con colo branco, pretendía embarcar o luns cara a Sudáfrica, pero foi abordado por policías no control de equipaxe. Presentouse como padre Miguel, e só levaba pouca roupa e libros relixiosos na maleta. Pero cando o revisaron, atopáronlle cocaína no corpo e nos zapatos.
O comisario de Narcóticos Wupps Lander Ferreira confesou que lle resultou embarazoso parar unha persoa vestida de padre. Ao final, o suposto cura recoñeceu que actuara como ‘mula’ por se atopar desempregado.

Rexeitan financiarlle unha viaxe no tempo a un científico
Os fondos que pedía un investigador de Seattle para acometer un proxecto para explorar a posibilidades de viaxar no tempo fóronlle denegados. Ao parecer, a axencia DARPA, de proxectos avanzados de investigación da Defensa, prefire investilos en construír ‘terminators’. John Cramer, físico da universidade de Washington, quere probar unha predición controvertida da teoría cuántica que di que as partículas de luz poden ir cara atrás no tempo. Pero o seu proxecto quedou sen fondos. Reuniuse con DARPA, pero dixéronlle que non tiñan diñeiro para esta investigación porque estaban interesados en desenvolver robots camaleónicos e ciberinsectos.
Cramer ten a teoría de que o tempo non pasa nun só sentido, senón que existen sinais que poden viaxar no tempo tanto para adiante como cara atrás entre dúas partículas, pero precisa demostralo mediante experimentos con cables de fibra óptica.

Poxan unha botella da que bebeu Paris Hilton
Unha botella de bebida enerxética atopada na parte de atrás do coche de Paris Hilton poxouse en eBay, sitio da internet especializado neste tipo de transaccións. Despois de que sete persoas fixesen ofertas para conseguir tan prezado obxecto, o prezo final foi de 103 dólares con 50 centavos, informou Playfuls. O vendedor anunciaba a botella co lema «ti tamén podes dicir que estiveches con Paris Hilton e cos seus amigos». E engadiu «conseguín isto do meu xefe. O seu fillo promociona un club de Miami e estaba alí cando Hilton e os seus amigos chegaron e consumiron a bebida». Na etiqueta da botella pódese ler que é importada de Australia e que non contén azucre.

Arrestan no Xapón un mariño ruso que foi nun bote a mercar cervexa
Un mariño ruso que se atopaba de permiso viaxou ao Xapón no seu bote de goma para mercar cervexa e foi detido por entrada ilegal no país. Os feitos aconteceron fronte á costa das illas Kuriles, cuxa soberanía reclama Rusia.
Sergei Mikhailovich Vachkevich, segundo de a bordo dunha traíña, chegou navegando coa súa pequena embarcación o sábado pasado á costa leste da illa de Hokkaido, onde gastou 10.000 iens en cervexa (en realidade só son 63 euros) nunha tenda situada na área de descanso dunha autoestrada. Detivérono cando ía de volta a Rusia no seu bote, con 24 botellas de cervexa xaponesa a bordo, explicou un voceiro da policía. O mariño, de 29 anos, non estaba baixo os efectos do alcol nin se expresaba de maneira incoherente cando o arrestaron. Vive na illa rusa de Sakhalin, ao norte de Hokkaido, e foi inculpado o luns de entrada ilegal en territorio xaponés.

Unha muller cae dun sexto piso e sálvase por aterrar nunha morea de excrementos
Unha muller chinesa sobreviviu a unha caída dende un balcón situado a seis pisos de altura grazas a unha morea de excrementos que amorteceu a caída. O accidente aconteceu cando a muller estaba a tender a roupa en Nanjing, capital da provincia de Jiangsu, no leste do país, informou a edición dixital do xornal Kuaibao. Deuse a casualidade de que uns empregados estaban a baleirar o pozo negro do edificio, que non se coidara dende había moito tempo, o que provocaba que se bloqueasen as canalizacións da auga. Ao parecer, a muller estricouse de máis e acabou caendo na morea, duns vinte centímetros de grosor. Só sufriu feridas leves.

Un todoterreo roubado a Beckham acaba de coche oficial do Goberno macedonio
Un BMW X5, supostamente roubado en Madrid ao futbolista David Beckham e atopado en Macedonia, converteuse no vehículo oficial do Ministerio do Interior do país balcánico, segundo asegurou este xoves o xornal Vest, de Skopje. Na primeira páxina do periódico publicouse unha foto da ministra, Gordana Jankulovska, mentres sobe ao todoterreo, que o medio asegura que pertenceu a Beckham. A policía non confirmou nin desmentiu a información, pois antes de chegar a Macedonia o coche cambiou varias veces de propietario en España. O vehículo pasou de contrabando a través de Grecia ata o país balcánico, onde a policía o comisou a finais do 2005. Como ninguén o reclamou, pasou a ser usado polo Estado. A ministra do Interior declarou recentemente que se Beckham lle reclama a devolución do coche, ela mesma lle entregará as chaves.

A canción dunha drag queen eurovisiva enfronta a Rusia e a Ucraína
Andrei Danilko, nado en Poltava, Ucraína, en 1973, conseguiu este ano representar o seu país no festival de Eurovisión travestido como Verka Serduchka. O 12 de maio estará no Hartwall Arena de Helsinki, despois de ter tentado, sen éxito, participar no concurso dende hai anos. Ademais da súa música e da súa escenografía, a canción que presenta está a resultar moi polémica. Algúns grupos de ucraínos están a recoller sinaturas contra a súa canción, que consideran que danará a imaxe do seu pobo. Pero, no caso dos rusos, do que se queixan é de algo moi distinto: o retrouso da canción, que di «I want you to see Lasha Tumbai» (quero que vexas Lasha Tumbai) soa moi semellante a «I want you to sing Russia Goodbye» (quero que cantes adeus Rusia). Segundo Verka Serduchka, Lasha Tumbai é a denominación que ten en mongol a manteiga feita, pero os xornais rusos non comparten esta opinión, e consideran a canción rusófoba. Os 12 puntos que cada ano Rusia lle dá a Ucraína poden estar en perigo (como se ve, vótase a calidade musical dos candidatos, non ten nada que ver con xeopolítica isto das votacións de Eurovisión).
Serduchka non será a única drag queen do festival deste ano. Despois da vitoria de Dana Internacional en 1998, no 2007 tamén perticipará, en representación de Dinamarca, DQ, co tema «Drama Queen».

Concédenlle unha hipoteca a 25 anos a un home de 102
Unha entidade financeira británica concedeulle unha hipoteca de máis de 295.000 euros a un pensionista de 102 anos. Cando acabe de pagar a débeda, en mensualidades de 1.400 euros, o home terá 127 anos, segundo informou The Times. Aínda que a meirande parte dos bancos británicos poñen como límite para conceder un crédito os 75 anos de idade, hai algunhas que non teñen esa restrición. Cada vez máis persoas maiores do Reino Unido se están a decidir a pedir préstamos, en algo que xa se considera un novo fenómeno social. No xornal londiniense tamén se menciona o caso de Richard Stone, profesor de matemáticas retirado de 75 anos que pediu unha hipoteca de 177.000 euros. Aínda que Stone ten dez casas, admite que o compromiso é bastante estresante para a súa idade.

Acusan un dentista de urinar nunha pía de operacións
Un dentista británico foi declarado o xoves culpable de mexar nunha pía da sala de operacións e de usar o instrumental dental para limpar as unllas e as orellas. Un tribunal médico dixo que as probas demostraban que Alan Hutchinson, de 51 anos, que de xeito habitual non usaba luvas nin lavaba as mans, puxera en perigo «a súa propia saúde, a do seu persoal e a dos pacientes» durante máis de 28 anos. Unha enfermeira que traballou para el durante 16 anos dixo que o sorprendera urinando na pía máis unha vez.
«Estaba a meter algo nos seus pantalóns antes de subir a cremalleira rapidamente. Entrei e púxenme detrás del. Botouse á esquerda e foi entón cando me chegou o olor a urina», dixo a enfermeira ao tribunal. Unha audiencia posterior decidirá se os hábitos do dentista o amosan incapaz de tratar os seus pacientes e se merece que se lle prohíba practicar a profesión.

Venden a KITT, o coche fantástico, por 110.000 euros
Un dos Pontiac TransAm de cor negra de 1982 que se empregaron na serie Knight Rider, El coche fantástico, A super máquina ou O justiceiro, púxose á venda esta semana na tenda de automóbiles Kassabian Motors de Dublín (California). O comprador poderase sentir como Michael Knight aos mandos do automóbil, que conserva todos os detalles da serie de televisión, como monitores, botóns ou a luz vermella en movemento da parte dianteira, aínda que non fala nin se conduce só. Ademais, só ten 3.851 quilómetros e dispón dun freo especial para facer trompos. A pesar de todo isto, as súas modificacións non o fan apto para circular polas estradas. Os que non teñan tantos cartos, tamén teñen ao seu dispor outro dos catro Pontiac nos estudios Universal de Los Ángeles, pero só para se sacar fotos nel.

Un ladrón devolve todo o que roubara despois de ter un soño
Bülent Karacan, ladrón turco de 30 anos que comezou a delinquir aos 15 anos, tivo un soño mentres durmía na rúa, nun banco da cidade de Bolu, ao oeste do país, conta o xornal Sabah. No soño, un home vello de barba branca díxolle que tiña que xurar que non volvería roubar nunca máis e que comezase a rezar. «Despois dese soño, decidín deixar de roubar e devolver todo o que lles subtraera aos propietarios de 22 tendas», declarou ao xornal o home, que agora vive na cidade de Ordu. Nos últimos dous anos e medio xa pagou a metade do importe dos roubos de trece anos e agora traballa nunha compañía téxtil onde pode aforrar cartos para devolver o resto. O dono da fábrica confesou que ao principio tiña medo de darlle traballo a Karacan porque tiña antecedentes penais.

Prohíbenlles levar máis tatuaxes aos marines dos EUA
A partir de hoxe mesmo os marines estadounidenses non poderán levar grandes tatuaxes, pois o comandante James Conway ordenou que se prohíban novos deseños que sexa visibles cando os militares leven manga ou pantalón curto. A nova regulación dispón que os marines teñen prohibidas tatuaxes ou imaxes na cabeza e no pescozo. Tampouco se permiten as tatuaxes estendidas, é dicir, que cubran case por completo as extremidades dunha persoa. Os debuxos non poden atentar contra a orde, a disciplina, a moral nin teren referencias sexistas, racistas, vulgares, antiestadounidenses, antisociais ou vencelladas a grupos extremistas. Pero, os marines que xa as teñen, poden conservalas.

Un cisne namora dun barco a pedais
Un cisne negro está namorado un barco a pedais situado nun lago de Münster, Alemaña. Petra, que así se chama a ave, namorou dun barco a pedais con forma de cisne xigante na primavera do ano pasado, e dende aquela non se separou do seu amor platónico. O cisne mesmo se negou a abandonar o seu compañeiro durante o inverno, e acompañouno durante a súa estancia no zoo da localidade ata a súa volta ao lago de Aasee, onde comezou o romance.

Atopan en Australia un sapo do tamaño dun can
Toadzilla, que así se chama o anfibio, pesa case un quilo e é o sapo máis grande que se atopou no norte de Australia. Estes animais velenosos foron introducidos no país dende a illa de Hawai na década dos anos 30 para controlar a poboación nativa de escaravellos xigantes, e agora os ecoloxistas están a loitar contra a súa proliferación.
O grupo FrogWatch, encargado de organizar cazarías de anfibios, dixo que o animal medía 20,5 centímetros de lonxitude. Calcúlase que dende a súa introdución no estado de Queensland, no continente australiano hai xa 200 millóns destes sapos, segundo informou a BBC.

Vai curar a miopía e volve con peitos novos e lentes de cu de vaso
Unha muller que quería operarse da vista decidiu apuntarse ao concurso ‘Cambio radical’ de Antena 3, e saíu seleccionada. Asesorada polos expertos do programa, a aspirante aceptou facerse unha liposucción, operarse do nariz e implantar silicona nos seus peitos, ademais da arelada cirurxía refractiva na clínica Teknon. Pero, cando só lle faltaba esta última operación, a paciente sufriu unha reacción á anestesia que a mantivo na UCI tres días. O marido denunciou que non o informaran da grave eventualidade, polo que aproveitou a ocasión para levar a muller de volta para a casa.
A cadea de televisión evitou facer comentarios ao respecto, amparándose nos contratos de confidencialidade asinados, aínda que a produtora Boomerang asegura que no espazo non se incitan operacións que non sexan desexadas polos participantes.

Pagan 700 euros por probar condóns
Non importa o estado civil, a raza, a orixe nin a orientación social. Calquera pode ser probador de condóns e lubricantes da empresa Durex e gañar 500 libras, 735 euros, por contar como lle foi. Iso si, hai que ser home e vivir no Reino Unido. A marca de preservativos anda a buscar 5.000 candidatos que queiran probar a súa nova liña de produtos. A idea é crear un panel de mostra de persoas que manteñan relacións sexuais usando produtos da marca. Na súa páxina web, Durex explica os pasos que hai que seguir para poder gañar esas 500 libras por pasar un bo anaco. Só hai que contestar un sinxelo cuestionario con preguntas como a idade, se tes parella e que produtos che gustaría probar. A compañía xa tivo unha idea semellante o ano pasado en Francia, onde recibiu máis de 14.000 solicitudes. De momento, a iniciativa non chegou á Península Ibérica.

A alcaldía de México cambiará armas por ordenadores e software de Microsoft
Dende a semana que vén os habitantes de México DF poderán cambiar as súas armas de fogo por un ordenador novo e un paquete de software da empresa Microsoft, no marco dun plan anunciado este venres pola alcaldía para combater a violencia. O motivo desta elección débese á reunión que mantivo a semana pasada Bill Gates co alcalde da cidade, Marcelo Ebrard. Os programas incluídos nos computadores serán o Microsoft Office e a enciclopedia Encarta. Pero para ter dereito ao ordenador a arma terá que ser dun calibre de 9 milímetros como mínimo. Para armas máis pequenas entregaranse 2.500 pesos (170 euros) e unha cesta de alimentos valorada en 500 pesos máis (34 euros).
E, non, hoxe non imos falar de software libre.

Rompen 230 vidros do Expreso de Hogwarts, dos filmes de Harry Potter
O Expreso de Hogwarts, o tren que leva a Harry Potter á escola de maxia, foi o obxecto do vandalismo dun grupo de adolescentes. A máquina, gardada nun almacén de Carnforth, no Reino Unido, é famosa por partir do andén 9 ¾ da estación londiniense de King’s Cross. Despois do ataque, 230 dos seus vidros quedaron escachados.
Pero non é o primeiro elemento dos filmes do mago, xa non tan novo e inocente, ao que le pasan cousas estrañas. O seu coche voador desapareceu en outubro de xeito misterioso dos estudios de rodaxe, aínda que se materializou outra vez no mesmo lugar pouco despois.

Un chinés gasta 23.000 euros en viño e coñac no duty free do aeroporto de París
Un pasaxeiro chinés mercou o martes nunha tenda ‘duty free’ do principal aeroporto de París viño e coñac polo valor récord de 23.000 euros, anunciou a empresa que xestiona as instalacións aeroportuarias da capital francesa. O home, debuxante, mercou unha decena de botellas, etnre elas un Mouton Rotschild de 1945 de 13.800 euros. Despois embarcou coa súa secretaria en primeira clase rumbo a Beixín. Ademais do carísimo viño, mercou un coñac de 1806 que vale 5.000 euros e un Côtes du Rhone de 1978. Parece ser que é un coleccionista de botellas moi raras que acode un par de veces ao ano. Para a próxima encargou viños de colleitas posteriores a 1960, dixo Linda Chong, a empregada chinesa que o atendeu.

Agochan cámaras dentro de latas para controlar os que botan o lixo
Os cidadáns de Ealing, ao oeste de Londres, terán que ter coidado ao deixar as bolsas de lixo no colector correcto, porque unha lata de feixóns pódeos estar a vixiar. O envase pode levar dentro unha cámara camuflada, de tamaño pequerrecho e con raios infravermellos, informou The Daily Telegraph. Os aparellos encargaranse de revelar quen botou unha botella de cristal no colector de orgánicos, ou quen deixa o lixo os días en que non hai recolleita. Este tipo de cámaras tamén se empregarán para pillar aos que pinten grafitis nas rúas, pero nese caso agocharanse en ladrillos e baldosas. As asociacións de deritos civís xa protestaron por unha medida que infrinxe o dereito á intimidade.

British Airways pide desculpas por instalar un cadáver en primeira clase
A compañía aérea británica tivo que presentarlles as súas desculpas aos pasaxeiros de primeira clase do voo Londres-Nova Delhi polos ter obrigado a viaxar cunha muller falecida na clase turista tres horas despois da partida, informou o Daily Mirror. Un pasaxeiro sentado ao outro lado da muller declarou que non o informaran de que a súa veciña acababa de morrer en pleno voo. O pasaxeiro, home de negocios de nome Paul, contou que cando se levantou para ir ao baño viu que a muller non presentaba bo aspecto.
Segundo British Airways, a tripulación optara pola solución que causase menos molestias. Cada ano morren fortuitamente nos avións da compañía unha media de dez persoas. A compañía obrou do mesmo xeito cando un pasaxeiro estadounidense faleceu nun voo entre Londres e Boston.

Unha nena de 13 anos gaña o concurso ás zapatillas máis cheirentas dos EUA
Katharine Tuck, do estado de Utah, gañou a honra de ter as zapatillas mais fedorentas dos Estados Unidos. O cheiro do calzado case lles fai perder o sentido aos xuíces da 32ª edición do Concurso Nacional das Zapatillas Putrefactas. O concurso, patrocinado por unha marca de produtos para a hixiene dos pés, disputárono outros seis adolescentes. Todos eles reuníronse en Montpelier, Vermont, despois de ter gañado nas respectivas clasificacións rexionais. Entre os encargados de avaliar o estado de descomposición do calzado estivo un membro da NASA, George Aldrich, especialista químico. Tamén estaba un dos organizadores do concurso, o doutor Joel Goodman, fundador de The Humor Project. Na edición deste ano, Katharine relevou a MacKenna Dinkel, un neno de Alaska de sete anos que gañou no 2006. A rapaza levou un premio de 2.500 dólares, un trofeo, unha viaxe a Nova York para ver un musical infantil e un lote de produtos para a hixiene dos pés. A cambio, terá que cederlle as zapatillas ao Salón dos Cheiros de Montpellier.

Namorado británico pide a man da súa moza nun trailer do cine
Cando Tina Kilford, muller de 36 anos da cidade británica de Weymouth, asistiu á proxección dun filme coas súas amigas, non imaxinaba a sorpresa que tería. Durante os trailers, o seu mozo, Tom Lane, apareceu na pantalla amosando unha serie de carteis, pedíndolle que casase con el. O último deles dicía: “Estou seguro de que prefires que cho pida persoalmente. Estou xusto detrás túa”. Entón o público aplaudiu a Tom cando se axeounllou para formalizar a petición ao xeito tradicional. Despois do “si” da noiva, a parella foi cear para celebralo e non viu o filme. Tom Lane, de 36 anos, dixo que lle levou seis semanas facer o vídeo, e que se inspirou nunha escena de ‘Simplemente amor’. A parella coñécese dende hai 18 anos e sae dende hai cinco. O casamento será o ano que vén.

Máis da metade dos habitantes dese país mercan libros só para adornar
Algúns si empezan a ler os libros, pero case nunca os rematan, segundo unha enquisa publicada o luns e na que participaron 4.000 británicos. As obras que máis decote quedan sen rematar están a autobiografía de Bill Clinton, ‘A miña vida’, de 1.024 páxinas, e o cuarto libro de Harry Potter ‘O cáliz de lume’, de 734 páxinas. Case un lector de cada tres desistiu de chegar ao final destes dous best-sellers, segundo o inquérito de Teletext. Mesmo a máis breve biografía de David Beckham, ‘My side’, de 404 páxinas e que levou o premio á autobiografía vendida máis rápido, foi abandonada por un 27% dos lectores.
O récord ao libro máis mercado e menos lido téñeno as memorias do ex-ministro do Interior, David Blunkett, cun 35% de lecturas incompletas, e enficción ‘Vernon God Little’ de DBC Pierre, tamén cun 35%. Os británicos gastan unha media de 6.000 euros durante a súa vida en mercar libros, pero un 48% din estar demasiado cansos para ler todos os días, mentres que un 42% di que lle resulta imposible concentrarse nas historias longas.

Israel retira o seu embaixador no Salvador, que aparecera espido, amarrado e con obxectos sadomasoquistas
O veterano diplomático Tsuriel Raphael foi destituído do seu posto e o Ministerio de Asuntos Exteriores xa comezou a buscar un substituo, segundo dixo a voceira Zehavit Ben-Hillel. Hai dúas semanas, a policía atopara o diplomático no patio da súa residencia, amarrado, amordazado e borracho, e con xoguetes sexuais sadomasoquistas, segundo informou a prensa israelí. Despois de que o soltaron, díxolle á policía que era o embaixador de Israel. Segundo a voceira do ministerio, a noticia for a certa e que a destitución se debera a que, aínda que Tsuriel non violara ningunha lei, a súa conduta non fora a axeitada para un diplomático. O ex-embaixador levaba no cargo seis meses e xa pasara varios anos en misións diplomáticas por todo o mundo. Non é o primeiro escándalo no que se ve implicado un diplomático israelí. En 2006, un funcionario da embaixada provocou un incidente nun bar de Santiago (de Chile). No 2000, o embaixador en Francia morreu dun ataque cardíaco nun hotel de París onde supostamente se atopaba cunha amante. O ano pasado, Israel destituíu o seu representante en Australia despois de que dixera que os dous países tiñan moito en común por estaren en Asia e os seus habitantes non teren pel amarilla e ollos oblicuos. E no 2005, cancelaron designar un diplomático tamén en Australia despois de que se soubo que difundira fotos de mulleres espidas na Internet cando traballaba no Brasil.

Un brasileiro paga unha conta de 8.200 reais con 80.000 moedas
Floriano Macedo, dono dun restaurante en São Goçalo, área metropolitana da cidade de Niteroi, preto de Rio de Janeiro, decidiu saldar a conta de 8.219,70 reais que tiña cunha distribuidora de bebidas con 80.000 moedas, que colocou en tres sacos de fariña que pesaban 215 quilos. A decisión de Macedo debeuse á intransixencia da Distribuidora de Bebidas Real, que lle esixiu o pagamento das facturas en efectivo e non en cheque, como estaba a facer. Macedo dixo que era moi perigoso andar con cartos en efectivo por aí. Precisou dous vehículos para levar dende o banco as moedas de 25, 10 e 5 centavos polas que trocou os billetes. O hostaleiro ameaza con seguir pagando o resto das contas do mesmo xeito.

Atopan un diamante no sumidoiro do cárcere onde estaba o ladrón
Un diamante valorado en 25.000 dólares apareceu no sumidoiro dunha ducha da prisión en que se estaba dende había dous anos o seu presunto ladrón. Foi no OC, o condado de Orange, en California. Ao parecer, o diamante 14 meses no cárcere Theo Lacy, segundo confirmou o tenente Ted Boyne á axencia AFP. Os axentes recibiron unha orde xudicial que lles deu permiso para buscar nese lugar, non se sabe se por un acordo entre o acusado e o seu avogado. O suposto ladrón, Bret Allen Langford, de 39 anos, fora acusado de roubo comercial polo dono da xoiería. Segundo os medios locais, Langford entrou hai dous anos na xoiería de Karim Andre Ayoub interesado nun diamante e roubouno. Os funcionarios da oficina do sheriff cren que tragou e vomitou varias veces a pedra preciosa nos distintos traslados de cadea que viviu.

Uns xemelgos de oito anos atopan un diamante nun parque
Unha parella de xemelgos de oito anos atopou a pasada fin de semana un diamante de 2,50 quilates que podería valer varios miles de dólares nun parque de Arkansas. Ese lugar é coñecido por ser o único xacemento de pedras preciosas do mundo aberto ao público. O diamante foi bautizado como Duncan Twins, no nome dos seus descubridores, Grace e Garret Duncan, de Huston. Os rapaces quéreno manter en bruto, aínda que pola súa calidade podería ter un prezo de varios miles de dólares. Pero para a familia Duncan, a pedra non ten prezo, segundo dixo a voceira do parque Cráter de Diamantes, Rachel Engebrecht. É un diamante marrón claro, metálico, brillante e triangular, case en forma de corazón. Os nenos atopárono despois de seis horas de busca nunha zona de 15 hectáreas e levárono nunha bolsa pensando que era un cacho de mica.

Naomi Campbell terá que fregar un edificio durante cinco días como castigo
O próximo emprego da supermodelo británica Naomi Campbell será limpar os chans dun edificio público de Nova York como condena por ter agredido unha empregada. O fallo do tribunal obriga a modelo a cumprir cinco días de servizos comunitarios durante os que terá que limpar un edificio do departamento de Sanidade situado ao sueste de Manhattan.
Campbell declarárase culpable dun delito de agresión relacionado cunha disputa que mantivo cunha ex-empregada á que bateu cun teléfono móbil. A modelo admitiu que lle arrebolara o teléfono a Ana Scolavino durante unha pelexa no seu apartamento de Manhattan e o aparello deulle á empregada, aínda que asegurou que non tiña a intención de mancala. A causa da reacción foi que a asistente non lle atopara uns pantalóns vaqueiros que pedía Campbell. Ademais de fregar chans, a modelo pagaralle á ex-empregada 363 dólares de gastos médicos e asistirá a unhas sesións de terapia para controlar o seu temperamento.

Fans xaponeses de Michael Jackson pagan 2.600 euros por velo en persoa
Os admiradores de Michael Jackson puideron coñecelo en persoa o xoves en Tokyo… sempre e cando puidesen pagar 400.000 iens, uns 2.600 euros. Malia o prezo, os fans do rei do pop recibírono entusiasmados cando apareceu, e aínda que non cantou nin bailou, cativou coa súa presenza as persoas que foran ao acto. Carlo Riley, seguidor e imitador de Jackson, desprazouse dende os Estados Unidos só para coñecer a estrela en persoa, dixo: «Pagaría dez veces esa cantidade en calquera momento e en calquera lugar». O cantante, que estivo no Xapón esta fin de semana, aproveitou para ir de compras e visitar Disneylandia.

Expulsan tres estudantes estadounidenses porque dixeron «vaxina»
Megan Reback, Elan Stahl e Hannah Levinson, de 16 años, decidiron interpretar a obra ‘Os monólogos da vaxina’ e, durante a súa lectura, pronunciaron esa palabra contra a opinión dos seus profesores. Segundo Reback, «non é unha palabra nin fea nin inapropiada e era real e pura». A autora da obra, Eve Ensler, aplaudiu a afouteza das rapazas o martes, e afirmou que o colexio tíñao que estar a celebrar, en vez de castigar as tres mozas.
O extracto da obra leuse o venres 2 de marzo á noite, durante un evento patrocinado pola revista literaria do John Jay High School de Cross River, Nova York. As rapazas roldáronse na lectura do texto ata que chegou a palabra «vaxina», que as tres leron xuntas. A obra dicía: «A miña minisaia é unha bandeira de liberación no exército das mulleres. Declaro estas rúas, calquera rúa, país da miña vaxina».
Os pais das rapazas amosáronse molestas pola expulsión, que acusan de «censura», e algúns compañeiros fixeron carteis e camisetas en apoio ás alumnas con mensaxes como «Apoiámosvos, admiramos o voso valor. Orgullo de vaxina!» Pero o director, Richard Leprine, escúsase dicindo que as rapazas están castigadas por desobedeceren unha orde e non polo que dixeron. As estudantes negan que se comprometeran a omitir esa palabra. Megan Reback dixo: «Non estamos a falar de plutonio, nin de chuvia ácida, nin dunha palabra que destroza vidas… É unha parte do corpo».

O Capitán América morre asasinado aos 66 anos por se opoñer á lei antiterrorista
O superheroe enmascarado dos cómics da Marvel morreu en Nova York aos 66 anos. A morte coñeceuse cando se puxo á venda o derradeiro exemplar da banda deseñada. A nova causou conmoción entre os miles de seguidores do personaxe.
O Capitán América, sentinela da loita pola liberdade e polos dereitos, foi asasinado por se negar a aceptar unha lei antiterrorista promulgada polo Goberno que ordena que os superheroes se adestren dun xeito semellante aos militares e aos policías. Steve Rogers, que era o seu verdadeiro nome, morreu a consecuencia dos tiros dun francotirador diante dun xulgado. Pero, que non se alarme ninguén, que é probable que o capitán resucite e regrese, como xa pasara con outros personaxes de banda deseñada. Ademais, moitos pensan que esta morte non é máis ca unha campaña de marketing para recuperar a popularidade perdida fronte a outros superheroes.

Unha anciá chinesa move un camión cunha corda entre os dentes
Unha muller de 73 anos da cidade de Jinan, ao leste da China, conseguiu mover dez metros un camión de 4,2 toneladas turrando del cunha corta entre os seus dentes, informou a prensa estatal. A muller, de cuxa identidade só se coñece o apelido, Wang, leva 33 anos practicando as artes marciais. Os seus prodixios foron gravados pola televisión central chinesa, CCTV, que a fixo famosa en todo o país. Wang xa fora noticia canto tiña 66 anos e conseguiu cachar un ladrón que lle roubara o bolso. Daquela, perseguira o delincuente correndo durante un quilómetro detrás del. O ladrón ía en bicicleta.

Poñen en circulación por erro moedas ateas de dólar
Un número sen determinar de novas moedas coa imaxe de George Washington acuñáronse por erro sen as gravacións no bordo inferior coa inscrición «In God we trust» en Deus confiamos. No entanto, si que teñen os textos «E Pluribus Unum», o ano e a marca da Casa da Moeda. Estas moedas defectuosas pasaron o control de calidade e saíron ao mercado o 15 de febreiro. Agora véndense a 50 dólares a unidade na internet.
Acuñáronse 300 millóns de novas moedas, que son de cor dourada e algo máis grandes e máis grosas ca os populares cuartos de dólar. Case a metade das pezas defectuosas fabricáronse en Filadelfia e o resto en Denver. A primeira vendeuse a 600 dólares, antes de que se soubese que eran máis correntes do que parecía. Agora andan polos 50 en eBay.

Unha marca arxentina deseña unhas bragas antirroubo
A empresa Alicia Furh deseñou roupa interior cun sistema antirroubo. Antirroubo para os cartos, porque inclúen un peto de seguridade pechado por un velcro ou cunha cremalleira para gardar nel o diñeiro e as tarxetas. Polo tanto, baséase nos modelos tradicionais pero con algo máis de seguranza. A marca arxentina investiu 2.000 dólares no proxecto, que verá a luz o 10 de marzo. Ademais, en abril venderase tamén a versión masculina da colección. Nun principio só sairán ao mercado deseños en algodón branco, venderanse en tendas da marca e custarán entre 3 e 5 euros. Alicia Furh asegurou que máis adiante estas novidosas prendas tamén se venderán noutras tendas, e non descartou que se cheguen a exportar. Os modelos, dos que se fabricaron 5.000 unidades, estarán dispoñibles en talles pequeno, mediano e grande. Segundo Furh, pretende que o novo produto sexa funcional e que non se note que se leva o diñeiro agochado cando se vista un vaqueiro nin un pantalón de liño. A liña está pensada para todas as idades, aínda que hai modelos como os tangas que a xente maior non adoita usar. O que non especificou a deseñadora é onde levarán os cartos neste tipo de prendas.

Unha muller italiana atopa unha granada no medio das patacas
Unha ama de casa napolitana de 74 anos non se decatou de que na bolsa de patacas que comprara no mercado tamén había unha granada da Segunda Guerra Mundial. A muller fora mercar, como facía decote, ao mercado napolitano de San Giorgio a Cremano e, no medio das patacas, levou a granada. Chegou á casa e meteu os tubérculos en auga, sen saber que tamén ía no medio unha granada das que os soldados estadounidenses usaran na guerra. Cando foi mondar as patacas, viu que unha delas se lle resistía. Entón foi cando se decatou de que non era unha hortaliza, senón unha bomba de man, así que chamou a policía. Os axentes recomendáronlle que non a volvese tocar, porque, aínda que a granada non tiña fusible seguía a ser potencialmente explosiva.

Condenada a catro anos de cadea por prenderlle lume ao pene do seu mozo
Unha muller foi condenada a catro anos de prisión en Montreal por queimar o pene do seu mozo con combustible para fondue queixo fundido. Os feitos aconteceron en abril de 2001, cando Guillaume Pungu, mozo da muller, marchou á cama despois de discutir coa agresora. Entón, Andrée Réné, de 44 anos, agardou a que o home quedara durmido para mollarlle os xenitais co líquido inflamable e logo prenderlle lume. Pungu, que daquela tiña 52 anos, sufriu queimaduras de terceiro grao no torso e nos xenitais, e tivo que pasar unha semana no hospital e un mes máis a tratamento. Despois sufriu insomnio, pesadelos, medo ao lume e problemas nas súas relacións coas mulleres. A muller xa cumpriu parte da condena en liberdade baixo fianza, polo que só lle quedan 30 meses para saír da cadea, segundo estableceu o Tribunal de Québec. Logo non poderá dispoñer de fusís nin material combustible en dez anos, por risco a reincidir.

Manolo Escobar e El Koala cantarán xuntos unha nova versión de Mi carro
Manolo Escobar e o músico malagueño El Koala cantarán xuntos unha nova versión de Mi carro, segundo anunciou o propio cantante de El Ejido, que recibiu o premio Familia pola súa traxectoria cinematográfica. Escobar dixo que mantivera unha conversa co Koala e que lle dera a súa aprobación para que poida traballar con Mi Carro e preparar unha versión nova. «Díxenlle que si», dixo Manolo Escobar, «porque teño curiosidade para ver que fai con ela este tipo». O Koala, abandeirado do rock rústico, fíxose moi famoso o verán pasado coa súa canción ‘Opá, yo viazé un corrá’.

Deteñen un home que quixo cobrar un cheque asinado por Deus
Kevin Russell, de 21 anos, foi acusado o luns de fraude con cheques e intimidación, ambos os dous considerados delitos penais. Tamén o acusaron de resistencia á autoridade. O mozo foi detido na cidade estadounidense de Hobart despois de tentar cobrar nun banco un cheque asinado polo «Salvador, rei de reis». A policía recibiu unha chamada da sucursal do Chase Bank despois de que Russell xa tentara cobrar o cheque, que era doutro banco e carecía de valor legal. O rapaz levaba varios cheques de distintas cantidades en dólares, todos asinados por Deus. Un tiña un valor de 100.000 dólares. Russell loitou cos policías que o tentaron deter e logo ameazounos, cando o levaron á xefatura policial.

Un xogador de baloncesto deixa o deporte para entrar no seminario
O aleiro americano Michael Watson, que fora xogador do Jesi e Castelletto Ticino da Legadue italiana, deixou a práctica profesional do baloncesto pola súa vocación relixiosa, para entrar no seminario. «Sentino claramente, debía ser pola forza de Deus, porque eu nunca pensara en algo así. Cando Deus te chama tes que obedecelo e seguilo. Aquela noite foi todo divino», explicou o ex-deportista. A chamada veulle unha tarde en Estambul, segundo informou La Gazzetta dello Sport. Este non é o primeiro caso dun adeus ao basquet pola vocación relixiosa, pois xa hai varios precedentes: Luca Blasetti, Angela Aycock e Simone Strozzi.

Ameazan con multar en Hong Kong os que non coman os pratos enteiros
Os restaurantes da cidade chinesa de Hong Kong están a colocar carteis nos que advirten os clientes de que os multarán con dous euros se non comen todo o que pediron. A práctica pretende evitar que se desaproveite a comida. O xornal ‘South China Morning Post’ asegura que esta tendencia xa está moi estendida nos restaurantes especializados en sushi e hot pot. Xa hai anos que nos restaurantes de buffet libre de Pequín se impoñen multas de ata 20 euros ás persoas que collan máis comida da que poden comer, co que o custo da sanción chega a superar o do xantar.
Malia isto, os hostaleiros de Hong Kong non desexan perder a súa clientela con este tipo de multas. Algúns dos usuarios de casas de comida xaponesa chegan a agochar o sushi que lles sobra debaixo dos pratos para que non os sancionen.
Como desfacerse dos restos de comida é un dos problemas que máis lle afectan á superpoboada cidade chinesa, polo que están a deseñar unha especie de estómago artificial xigante que descompón a comida en auga e dióxido de carbono.

Fan en Serbia a salchicha máis longa do mundo
Un embutido de 2.023 metros de longo, fabricado para entrar no libro Guinness dos récords, é a principal atracción do festival da salchicha de Turija, ao norte de Serbia. A salchicha pesaba máis de dúas toneladas, e un equipo de carniceiros da vila tardou catro días en fabricala, para o que precisou carne de 24 porcos, informaron medios de comunicación do país balcánico. Á vixésimo terceira edición do festival de Turija acudiron a fin de semana pasada máis de 15.000 visitantes, que supoñemos darían boa conta do embutido.

Detidos en Bos Aires dous homes que querían cambiar un billete dun millón de dólares
Dous indixentes foron detidos na Arxentina cando tentaban trocar nun banco un billete dun millón de dólares con data de 1934, informou a prensa local. A policía está a investigar a autenticidade da nota bancaria. O Banco da Nación de Corrientes revolucionouse o xoves coa chegada dos dous cartoneros, como se lles chama no país sudamericano aos que viven da revenda de papeis e cartóns que recollen nas rúas. Os homes, de apelido Lezcano, presentáronse no banco para que lles cambiasen o billete polo seu equivalente en pesos, pero os empregados rexeitárono por crelo falso. Os indixentes foron detidos, a pesar de que xuraron ter atopado o billete nunha bolsa de plástico no medio do lixo. O billete ten data de 1934, época en que se chegaron a imprimir billetes de 100.000, pero non dun millón de dólares.

Tratan a adicción á internet con descargas eléctricas
Unha suposta técnica de medicina tradicional chinesa baseada en impulsos eléctricos de baixa voltaxe é empregada en clínicas militares para combater a adicción á rede, unha suposta doenza que padece un 14% dos adolescentes do país asiático. A técnica deuse a coñecer despois de que o Washington Post publicase unha reportaxe sobre a Base de crecemento psicolóxico para adolescentes chineses, hospital militar do distrito pequinés de Da Xing. O seu director non para de recibir chamadas de axencias estranxeirase dende entón. Tao Ran explica que é unha técnica relaxante e que non ten nada que ver co electroshock.
«Lin a reportaxe, pero non usamos electroshocks. Viron que os nenos tiñan electrodos na cabeza e nos pés e pensaron que era iso. Pero os da cabeza son para controlar as ondas cerebrais e os dos pés son para reaxustar o reloxo biolóxico», explicou Ran, quen engadiu: «Os nenos viven conforme ao horario americano, xogan na rede toda a madrugada, por iso durante o día obrigámolos a facer exercicios militares e antes de durmir empregamos esta máquina durante media hora para reaxustar os seus horarios».

Nace un pato con catro patas nunha granxa inglesa
Por unha estraña mutación xenética, un pato de oito días de vida ten duas extremidades de lonxitude case normal detrás das habituais, segundo informaron varios medios de comunicación británicos. Nicky Janaway, criador de patos en New Forest, condado de Hampshire, amosoulle o parrulo, chamado Stumpy, á prensa. «Foi algo incrible. Pensei ‘ten demasiadas patas’ e conteinas unha e outra vez. ‘unha, dúas, tres, catro’».
De ter nacido en estado salvaxe, Stumpy non tería sobrevivido, pero no criadeiro de patos Warrawee poderá alongar a súa existencia. «Está a comer, sobrevive e ao correr esas outras patas sérvenlle para se estabilizar», explicou Janaway.

Venden na rede presuntos cabelos de Britney Spears
Dende o luns, ducias de sitios de subastas na internet ofrecían as «auténticas» mechas dos cabelos da cantante estadounidense Britney Spears, que decidiuse rapar ao cero a semana pasada. No entanto, a persoa que ten o pelo auténtico aínda non se desfixo del, e estuda sacalo a poxa con fins benéficos. Mentres se poden ver por todo o mundo as fotos da cantante de 25 anos completamente calva, os internautas están tentados de mercar o que prometen ser os auténticos cabelos de Britney.
Un habitante de Manchester puxo á venda en eBay un «mechón de cabelo de Britney que recibín hoxe dende os Estados Unidos, enviado polo meu pai que traballa en California». Pero o rapaz non puido confirmar a súa autenticidade. Ademais dos supostos pelos da cantante de «Oops! I did it again», tamén se poden mercar artigos de perrucaría que estiveron relacionados co cambio de ‘look’. Por 9,99 dólares, prezo de saída, os fans da Spears poden mercar «a verdadeira vasoira coa que se varreron os cabelos da cantante». Pero este obxecto tamén é sospeitoso, pois o que pon a poxa o obxecto vive en Carolina do Norte, a 4.000 quilómetros de California.

Un porco mata a dentadas o seu dono por non lle deixar copular
Os feitos aconteceron esta semana, un día despois de que o propietario do animal lle impedira aparearse cunha porca, segundo informou a policía ca vila dominicana de Dajabón. Segundo o informe, Romito Rivas, de 75 anos, morreu dun forte golpe no estómago e de feridas na cara e noutras partes do corpo.
O porco era un dos animais preferidos de Rivas, que o empregaba de semental para a reprodución na súa finca. O domingo pasado, o animal escapou da granxa e entrou nunha finca lindeira onde copulou cunha porca, o que causou o enfado do seu dono, que interrompeu o acto sexual.
A policía informou de que o luns, cando o ancián lle daba de comer ao cocho, o animal atacouno e trabouno ata lle causar a morte. As autoridades de Sanidade separaron o animal dos demais porcos para analizar se ten a rabia.

Unha muller inventa que unha boa devorou o seu home para conseguir cartos
Unha muller paraguaia que denunciou que o seu home fora devorado por unha enorme boa constríctor nunha remota rexión do país confesou que inventou a historia para conseguir cartos. María Teresa Lima dixo o mércores nunha emisora de radio da Concepción que unha enorme serpe comera o seu esposo, o que levou a nova ás primeiras páxinas dos xornais do país.
Ao final, recoñeceu que inventara todo por razóns de necesidade e problemas co seu home. Segundo o fiscal do caso, Pedro Palacios, a muller nunca estivera no lugar no que segundo ela acontecera a traxedia, a facenda Karajá Vuelta, e xa non era a primeira vez que argallaba historias.
A muller, unha indíxena paraguaia que ademais asegurou ter nado no Perú, está detida á espera de que a examine un psicólogo. Segundo a súa hisotira, o seu home, Juan Carlos Guitiérrez, foi o xantar dunha enorme serpe e o seu corpo rescatado por outros dous peóns da facenda que mataran a tiros o réptil, que os atacara cando abandonaban o lugar pola enchente do río Paraguai. Pero ninguén atopou os restos da presunta vítima nin os dous peóns.

Devólvenlle 28 millóns de iens a unha muller que os mandara a reciclar
Unha empresa de reciclaxe de papel atopou 28 millóns de iens en billetes no medio de xornais vellos, e que resultaron pertenceerlle a unha muller de 80 anos, informou a Policía. A conclusión foi que os cartos son desa señora que vive en Takasaki porque a data que figura no papel con que envolveu os billetes coincide co momento en que ela sacara os cartos do banco.
«Estou moi leda por que me devolveran o meu diñeiro, sinto ter causado problemas», dixo a muller. En total eran 28 paquetes dun millón de iens, que apareceron no medio de xornais vellos que recolleu a compañía de reciclaxe o pasado 29 de xaneiro. A muller declarou á Policía que esquecera que gardaba os paquetes no medio de xornais vellos, e botounos ao lixo.

Veciños do Prioriño apadriñarán fochancas
Veciños das zonas do Pieiro, O Confurco e Prioriño, en Doniños, Ferrol, puxeron en marcha a campaña «Apadriña unha fochanca». Con esta medida, pretenden denunciar o mal estado no que se atopan as vías de acceso a estes núcleos. A asociación veciñal tiña previsto levar a cabo o acto de apadriñamento hoxe domingo, cunha reunión no Pieiro onde todos os participantes, armados de area e pas, se poñeranse a apadriñar unha fochanca. O que farán será, en realidade, encher os buracos con area para que queden á vista, debido á desidia das administracións da que se queixan.

Esparexidos pola estrada 6 millóns e medio de dólares en lingotes de ouro e de prata
Un camión que transportaba lingotes de ouro e de prata viuse implicado nun accidente de tráfico no centro de Chile, o que provocou que toda a mercancía, duns seis millóns e medio de dólares, quedara ciscada pola estrada. O accidente produciuse polo escorregadizo pavimento da Ruta 5 Norte, á altura de Lampa, onde houbo fortes chuvias durante estes días. Na colisión quedaron afectados catro vehículos, no quilómetro 33 da estrada. O camión cargaba o ouro dende Copiapó ata a central da empresa de valores, no municipio de Independencia. As caixas dos lingotes pesan entre 200 e 250 quilos cada unha e están a ser protexidas por persoal da empresa.

Un australiano bébedo caza un tiburón coas mans
O albanel Phillip Kerkhof estaba a pescar luras o luns á noite na costa de Louth Bay, na península de Eyre, ao sur de Australia, cando avistou o tiburón en augas pouco profundas, segundo informou a cadea ABC. Sen pensalo, botouse detrás del ata que o pillou. O animal, de 1,3 metros de longo, mordeu e esgazou parte dos pantalóns de Kerkhof cando o subía ao bote, pero o home só sufriu unhas rascaduras. El levaba bebido moito vodka. Cando lle pasou a borracheira, meditou e recoñeceu que fora un parvo polo que fixera. Malia isto, Phillip xantou xa dous días a carne do peixe e pensaba usar o resto nunha barbacoa que ía facer esta fin de semana para os seus amigos. Nas augas australianas viven moitas clases de tiburóns, e cada ano hai unha media de quince ataques a persoas, co resultado dunha morte.