Go to content Go to navigation Go to search
Incrible, mais certo

9 de setembro 3514 días atrás

Unha muller asegura que capturou o ‘chupacabras’
Phylis Canion viviu en África durante catro anos. Toda a súa vida dedicouse á cazaría e na súa casa ten cabezas de cebra e doutros animais exóticos para demostralo. Pero o cadáver do animal que atopou o mes pasado na súa finca era novo incluso para ela, así que o agochou no conxelador. Canion cre que ten a cabeza dun mítico chupacabras. «É unha criatura horrible», asegurou a muller, sostendo a cabeza do mamífero con grandes orellas, grandes dentes e pel de cor gris azulada. Canion e algúns dos seus veicños atoparon os corpos no mes de xullo, en Cuerno, Texas. Cada exemplar pesaba 18 quilos. A muller dixo que gardou unha cabeza para poder analizar o seu ADN. Sospeita que o chupacabras puido matar 26 galiñas da súa casa nos últimos dous anos. A diferenza dos coiotes, o chupacabras non come as vítimas, senón que lles chucha o sangue. Pero, segundo un veterinario, podería non ser un chupacabras, senón unha raza estraña de can. Pero Phylis Canion xa vende camisolas co lema «2007, o verán do chupacabras, Cuerno, Texas». Custan cinco dólares.

Maniféstanse co cu ao aire contra George Bush
O presidente dos Estados Unidos, George W. Bush, que viaxou a Sydney (Australia) para participar no Foro de Cooperación Económica Asia-Pacífico (APEC), atopouse o venres cunha rechamante manifestación contra el. Os manifestantes baixaron os pantalóns e amosáronlles o cu en protesta pola invasión de Iraq. A iniciativa, denominada «Traseiros para Bush», ten ademais un toque lúdico, pois pretende bater o récord mundial de persoas amosando as nádegas. Despois do recibimento, Bush meteu a pata en varias ocasións, como é habitual nel. Nun discurso perante líderes empresariais da APEC, agradeceulle ao primeiro ministro australiano ser «un anfitrión tan excelente do cumio da OPEP». Minutos despois, lembru a visita ás tropas «austríacas» en Iraq, cando en realidade se refería aos soldados australianos. Ao rematar o seu discurso, trabucouse de saída.

Os Mossos d’esquadra deteñen un ciclista que ía facendo eses pola autovía
A policía catalá detivo esta semana un ciclista que ía facendo eses pola autovía A2, á altura de Bell-lloc d’Urgell, en sentido Barcelona. Eran as catro e media da madrugada, hora en que circulaban moitos camións pola vía. O detido era un home de nacionalidade romanesa, Pauil Aline, que deu unha taxa de alcol de 0,78 gramos por litro de aire expirado, moi por riba do 0,25 permitido. Ademais, circulaba sen chaleco reflectante. O home quedou en liberdade e citado para declarar perante o xuíz por circular en bicicleta por unha vía prohibida, conducir de xeito temerario e ir bebido.

Unha muller de 65 anos queda sen mercar viño por non poder xustificar a maioría de idade
Barbara Skapa, de 65 anos, foi a un supermercado de Farmington, Estados Unidos, para mercar viño, pero non puido, porque non levaba un documento de identidade que probase a súa idade. «De agora en diante vou traer a miña licenza de conducir», dixo a octoxenaria. Despois de sufrir unha fractura nunha perna, Skapa foi levada a semana pasada ao supermercado Hannford Bros para mercar varias cousas, entre elas unhas botellas de viño. O caixeiro díxolle que a política do establecemento era comprobar a identificación de todos os compradores de bebidas alcólicas, explicou Skapa, quen engadiu «ninguén pensaría que teño 30 ou 40 anos». Segundo unha voceira da empresa, revísase a documentación de todas as persoas que queiran mercar alcol e aparenten menos de 45 anos.

Pide dous millóns de dólares de indemnización despois de atopar un condón na cervexa
Un moscovita reclama dous millóns de dólares, algo menos dun millón e medio de euros, a un fabricante de cervexa despois de descubrir no interior dunha botella o envoltorio aberto dun preservativo e un anaco dunha «materia plástica», informou a súa avogada este mércores. O seu cliente, Pavel Pavlov, redactor xefe dunha publicación militar rusa, descubriu no interior dunha botella de cervexa da marca Baltika-3 o inesperado obxecto, explicou Stalina Gurevitch. Pavlov, de 60 anos, sofre problemas psíquicos a raíz do incidente e evita mercar bebidas embotelladas. O home presentou unha demanda no tribunal Perovski de Moscova reclamando dous millóns de dólares por prexuízos morais contra a empresa fabricante da cervexa. O director adxunto de Baltika, Alexei Kedrin, declarou á AFP que descartan que un feito así puidese acontecer porque «o nivel de tecnificación dos nosos equipos é superior ao das empresas europeas».

As parellas infieis de Colombia poderían ser castigadas con multas e traballos sociais
Os homes ou as mulleres infieis e as súas parellas de aventura poderán ser sancionados en Colombia con multas de ata 2.870 euros e traballos sociais, segundo un proxecto de lei que o senador Edgar Espíndola prevén presentar no parlamento. «Estamos a propoñer que a infidelidade probada se sancione con 20 salarios mínimos e se someta a traballos sociais as fins de semana», explicou o senador o martes en radio RCN de Bogotá. Segundo Espíndola, a maioría das separacións en Colombia empezan por unha infidelidade e temas como a violencia interfamiliar son moitas veces consecuencias dela. O proxecto tamén contempla convenios con entidades de tratamento terapéutico e informativo para as persoas infieis.

2 de setembro 3520 días atrás

O sabre láser de Luke Skywalker viaxará á Estación Espacial internacional
A NASA anunciou que a arma orixinal do filme de Star Wars viaxará no transbordador espacial Discovery no mes de outubro, coincidindo co trixésimo aniversario do coñecido filme de ciencia-ficción. Ademais, a viaxe da peza de coleccionismo Jedi servirá para darlle algo máis de publicidade a unha misión sen demasiada importancia. O sabre foilles entregado aos funcionarios da NASA polo mesmísimo Chewbacca, o peludo ser que pilotaba o Falcón Milenario con Han Solo. A axencia espacial recibiuno xunto no aeroporto de Houston, xunto a outros personaxes da saga, como o cazarrecompensas Jango Fett, soldados das tropas imperiais e R2D2, coñecido en Hispanoamérica como Arturito. Ata a partida do Discovery, a espada estará gardada nunha vitrina do centro espacial de Houston, onde actualmente se amosan rochas marcianas traídas á terra polas misións espaciais da axencia estadounidense. Ademais do sabre láser, a misión STS-120, que así se chama, levará ao espazo o segundo módulo Harmony para a Estación Espacial.

Ofrécenlle a Enrique Iglesias ser modelo dunha campaña de condóns extra pequenos
Aínda que a maioría dos homes nunca estarían dispostos a admitilo, Enrique Iglesias confesou xa en varias ocasións que o seu membro é moi pequeno. En declaracións á revista ‘Esquire’, o mozo de Anna Kournikova non dubidou en contar que debido ao pequeno tamaño do seu pene “nunca podía atopar condóns extra pequenos”. Agora, a marca Lifestyles decidiu tratar de solucionar este problema que tamén lles afecta a millóns de homes. Ademais de ofrecerlle ao fillo de Julio Iglesias unha nova liña de preservativos do seu talle, están dispostos a pagarlle un millón de dólares para servir de modelo da promoción. Un representante de Lifestyles dixo: «Hai que ser todo un home para admitir os seus defectos e aínda así ter a Ana Kournikova nos seus brazos». Aínda non se coñece a resposta de Enrique.

Nicole Richie cumpre unha pena de 82 minutos de cadea
Nicole Richie, filla adoptiva de Lionel Richie e amiga de Paris Hilton, cumpriu esta semana unha condena de cárcere por conducir baixo os efectos das drogas. Aínda que en teoría tiña que pasar 90 horas pechada, ao final liberárona aos 82 minutos. Segundo a axudante do sheriff de Los Angeles, Maribel Rizo, a condena cumpre a sentenza e as directivas federais. Richie, de 26 anos, está embarazada do seu primeiro fillo co seu prometido, Joel Madden. A tamén afillada de Michael Jackson foi arrestada en decembro por conducir pola autoestrada en sentido contrario e drogada. Cumpriu a súa brevísima condena no mesmo centroonde Paris Hilton estivera tres semanas.

Un eslovaco sobrevive a unha caída de 1.200 metros despois de lle fallar o paracaídas
Un home eslovaco de 33 anos sobreviviu milagrosamente a unha caída de 1.200 metros a primeira vez que se botaba en paracaídas. Sufriu fracturas de pelve, varias costelas e unha forte contusión en todo o corpo, pero a súa vida non corre perigo. O suceso aconteceu preto da cidade de Lučenec e, ao parecer, o home non recorreu ao paracaídas de reposto, debido á súa inexperiencia. O descenso en espiral freou a súa caída, xusto diante da súa muller. A pesar da súa conmoción, o home lembraba o suceso mentres foi evacuado en helicóptero a un hospital de Banská Bystrica.

Uns sensores detectarán os terroristas nos aeroportos dos Estados Unidos
O proxecto Intento Hostil, do que se fai eco a revista New Scientist, é o último invento do departamento de Seguridade Interior estadounidense para detectar condutas terroristas entre os visitantes. A medio camiño entre Desafío total e Minority report, o proxecto pretende identificar e interpretar todas as expresións faciais, o xeito de moverse e de camiñar, a presión sanguínea, o pulso, a transpiración e a dilatación das pupilas. O sistema será capaz de funcionar en tempo real e estará baseado en sensores non invasivos. A axencia encargada do proxecto púxose en marcha o 9 de xullo, coa intención de que entre en fase de proba a comezos do 2010. Pero xa hai catro anos que a administración norteamericana para a Seguridade no Transporte emprega un programa de escaneo de pasaxeiros baseado nas microexpresións faciais. Axentes de detección do comportamento están despregados nos aeroportos para detectar expresións sospeitosas dos pasaxeiros. Se iso acontece, os axentes comezan unha charla co individuo, que pode derivar nun interrogatorio segundo sexa a súa reacción. O custo deste sistema fixo que o departamento decidise automatizalo para non ralentizar o tráfico aeroportuario.

Rematamos con moda, como os telexornais. Segunda semana da moda para animais domésticos en Nova York
Unha bulldog branca de pelo curto e ollos azuis lucía unha capa de raso cor rosa e bronce decorada con strass, especialmente confeccionada para asistir á Segunda Semana da Moda para mascotas que tivo lugar en Nova York coa presenza de compradores de todo o mundo. “Somos espectadores, pechamos a nosa tenda para cans en Baltimore tres días para vir”, explicou Thomas Berger o domingo, mentres aplaudía o paso pola pasarela dun modelo vestido só cun slip que levaba da correa un galgo cor mel con traxe de camuflaxe. Ao ritmo de música disco, o desfile dura unha hora: os cans presentan os modelos de vinte casas de moda para animais. Un gato negro cun colar dourado aparece ao final, levado por unha pequena de rizos louros vestida cun tutú de tul dourado. Os desfiles desenvolvéronse no quinto peso dun centro de exposicións de Manhattan, mentres que o primeiro e o cuarto piso estiveron dedicados aos expositores, con bolsos para levar mascotas, vitaminas, correas, mobles e revistas.
“Lola acaba de quedar durmida, estaba tan estresada polo desfile…”, dasegurou Stacy Braverman, propietaria dunha tenda en liña para animais domésticos, Bitch-on-line. “Especializámonos en obxectos únicos, como unha liña de produtos de beleza. Lola está perfumada hoxe con suflé de azucre rosa. Teño catro chihuahuas: Lola, Havana, Winston e Beckham, como o futbolista”. Ao seu lado, outra espectadora, cun Lulú de Pomerania vestido cun kilt escocés, exclamou: “Oh, tes a Beckham? O meu lulú chámase Jagger, coma Mick!”.
Segundo a Asociación de fabricantes de produtos para mascotas, o 63% dos fogares estadounidenses ten un animal doméstico. Hai 88 millóns de gatos, 74 de cans, 142 de peixes e 13 de réptiles. No ano 2007 gastaron 40.000 millóns de dólares, fronte aos 28.500 de seis anos antes. 16.000 millóns foron para alimentación, 10.000 para veterinarios, 10.000 para medicamentos e 3.900 en xoguetes, vestimenta e paseadores de cans.

26 de agosto 3528 días atrás

Ordénanlle a unha muller crear unha zona para non fumadores no seu xardín
Un tribunal sueco ordenoulle a unha cidadá marcar unha zona para non fumadores no seu propio xardín, despois da queixa dun veciño avogado que aseguraba non poder soportar o fume que chegaba ata a súa casa, informou xoves o xornal Sydsvenskan. A muller decidiu acatar a decisión do tribunal: «Dáme medo ter que pagar multas, pero estou furiosa», declarou. O tribunal de asuntos medioambientais de Vaxjo tomou a súa decisión despois de que o veciño interpuxese unha queixa para rematar co seu pesadelo, que lle facía mesmo levar máscara no seu propio xardín. O veciño antitabaco pediulle á xustiza que lle prohibise fumar á muller, pero o tribunal decidiu emitir unha sentenza salomónica, delimitando unha zona prohibida e outra onde a muller poderá fumar tranquila. A amoestada afirmou que a decisión é insentata e dicícula, mentres que o veciño, satisfeito coa solución, pediu que á veciña se lle impoña unha multa de 2.000 coroas (213 euros), cada vez que fume na zona prohibida.

Unha galesa sacrifica as súas vacacións para salvar a súa galiña ferida
Vicky Mills, galesa de 24 anos, renunciou ás súas vacacións para poder pagar as 1.800 libras (case 2.700 euros) que lle pide o veterinario para salvar a súa galiña, que ten unha pata ferida. A ave, de tres anos e de nome Lily, mancouse nunha pata cun arame de espiño, informou o xoves a BBC, e só a amputación da extremidade podía salvala. Desdesperada, a súa dona pediu un préstamo bancario e sacrificou as súas vacacións para pagar as sete operacións necesarias. «Ámoa moito, e se lle pasase algo, romperíaseme o corazón. É moito máis graciosa ca un gato ou un can», explicou Vicky Mills, que recibira o animal de agasallo cando só era un pito. «Ten a sorte de poder saltar sobre unha pata, pero ás veces téntase rascar coa pata ferida e cae», conta a dona da ave. Por se fose pouco, Lily acaba de pasar unha depresión, segundo a diagnose do veterinario.

Retiran unha campaña publicitaria que empregaba a Hitler para anunciar pizza
A campaña amosaba a Hitler facendo o saúdo nazi cun cacho de pizza na man, e foi retirada o venres en Nova Celandia despois das queixas que presentou a comunidade xudía. O cartel formaba parte da campaña da cadea de tendas Hell Pizza (Pizza do Inferno), que emprega personaxes históricos na súa publicidade. No anuncio, que se colocou en catro grandes cidades do país, amosábase a Hitler dicindo: «É posible facerlle crer á xente que o inferno é o paraíso». Kirk MacGibbon, da axencia de publicidade Cinderella, lamentou que haxa temas que aínda non se poden desdramatizar. En Christchurch, ao sur de Nova Celandia, Hitler foi substituído por Bieito XVI e a mensaxe «O inferno é auténtico e eterno».

E a segunda parte das Noticias Extrarradio vai estar dedicada aos ránkings. As declaracións máis sorprendentes dos famosos
O xornal USA Today recompilou as declaracións máis sorprendentes dos últimos 25 anos. O primeiro posto ocúpao Lady Di, que dixo no ano 1995 na BBC: «Eramos tres neste matrimonio, así que estaba un pouco ateigado». Outras das frases míticas, segundo o USA Today foron:
Madonna, na revista People: «Son teimuda. Son ambiciosa. E sei exactamente o que quero. Se iso me converte nunha puta, pois de acordo».
Michael Jackson, tamén na BBC, en 2003, defendéndose por ter compartido cama con nenos: «Por que non se pode compartir a cama? A cousa máis adorable que se pode facer é compartir cama con alguén».
Nicole Kidman, despois de romper con Tom Cruise, en 2001: «Ben, agora podo levar tacóns».
Hugh Grant, en 1995, despois de ser arrestado por ‘comportamento lascivo’ cunha prostituta en Los Angeles: «Ao final, tes que confesar e dicir, ‘fixen algo deshonroso, mesquiño e estúpido’».
Woody Allen, sobre a súa relación con Soon-Yi, filla da súa anterior parella Mia Farrow: «O corazón quere o que quere. Non hai lóxica para estas cousas. Ti coñeces alguén e namoras, iso é todo».
Whitney Houston, ao saír dunha clínica de rehabilitación: «O crack é barato. Eu gaño demasiados cartos como para fumar crack. Teñamos isto claro, vale? Nós non tomamos crack. Non facemos iso. O crack é unha labazada».
Finalmente, Jack Nicholson, na revista Vanity Fair: «Só se lles minte a dúas persoas na vida, á moza e á policía. Aos demais hailles que dicir a verdade».

As leis máis absurdas do mundo, recollidas por The Times
O xornal británico publicou unha antoloxía de 25 das leis máis absurdas do mundo e que seguen vixentes, e que van dende a prohibición de chamarlle Napoleón a un porco en Francia ata a de emborrachar peixes no estado norteamericano de Ohio. Pero, no mesmo Reino Unido, tamén hai leis bastante absurdas. Así, considérase un acto de traizón colocar un selo coa imaxe da raíña boca abaixo, e os barcos da Armada Real que entren no porto da capital de Inglaterra están obrigados a entregar un bocoi de ron na Torre de Londres. Ademais, as mulleres preñadas poden facer as súas necesidades en calquera sitio, mesmo, se o piden, no casco dun policía. Mais, as persoas que teñan a peste teñen prohibido subiren aos taxis.
Nos Estados Unidos tamén hai estrañas normas nalgúns estados. En Vermont, as mulleres precisan do permiso do maarido para levaren dentadura postiza, en Kentucky non se poden levar armas agochadas de máis de seis pés (1,80 metros), en Miami non se pode montar en patinete dentro dunha comisaría e en Alabama non se permite conducir cos ollos vendados.
Ademais, en Carolina do Norte hai restricións á agricultura, porque non se poden arar campos de algodón con elefantes. Tamén perviven odios entre as nacionalidades que integran o Reino Unido. Así, en York é legal matar aos escoceses, pero só se levan arco e frecha, mentres que na tamén inglesa Chester os galeses non poden entrar antes do mencer nin ficar despois do solpor so pena de morte. Porén, un lector fixo unha corrección a esta última norma, pois xa se revogou no ano 1979.

19 de agosto 3529 días atrás

Unha parella quérelle chamar ao seu fillo «@»
Unha parella chinesa tentou poñerlle ao seu fillo «@», alegando que o carácter empregado nos enderezos de correo electrónico se corresponde co seu amor polo bebé. O estraño nome sorprende especialmente en chinés, lingua que emprega miles de ideogramas diferentes para escribir cada palabra. O símbolo da arroba representa en inglés unha abreviatura da preposición «at», que en chinés se pode transcribir dalgún xeito como «ai ta», que significa «quérote» en mandarín.
Segundo o vicerresponsable da Comisión Estatal da Linguaxe, Li Yuming, o goberno do país prohibe os nomes que usen numerais, linguas estranxeiras ou símbolos que non pertenzan ás múltiples linguas das minorías chinesas, aínda que non especificou se van aceptar o nome para o neno. Uns 60 millóns de chineses padecen o problema de que os caracteres antigos dos seus nomes non os recoñecen os ordenadores.

Un neno mexicano de 12 anos comezará a estudar Cirurxía e Psicoloxía
Andrew Almazán, un neno mexicano superdotado, comezará a vindeira semana as carreiras de Médico Cirurxán e Psicoloxía na Universidade das Américas, en Puebla, no centro do país. O rapaz acaba de rematar o bacharelato e foi admitido polo centro universitario mediante un programa especial de estudos axeitado á súa idade. Segundo a universidade, Andrew conta cunha bolsa Jenkins, que cobra o cen por cento dos seus estudos nas dúas licenciaturas, e ademais poderá vivir coa súa familia nunha casa da zona residencial do campus, que tamén terá o custo cuberto. Segundo informou Efe, os pais do pequeno universitario pedíronlle ao reitor que non teña que asistir a diseccións nin nectopsias como o resto dos alumnos. Andrew ten dúas irmás máis pequenas e practica o taekwondo e o hoquei sobre xeo.

Un motorista xaponés decátase de que perdeu unha perna despois de conducir dous quilómetros sen ela
Kazuo Nagata, de 54 anos, transitaba cun grupo de amigos moteiros pola rexión de Shizuoka cando bateu contra a barreira que divide os dous sentidos da autopista. Nagata cortou a perna, pero literalmente anestesiado polo choque e pola rapidez do corte, seguiu o seu camiño sen problemas. O motorista non se decatou do que pasara ata que tratou de facer un xiro dous quilómetros máis adiante. Segundo a edición electrónica do xornal Mainichi Shinbun, os amigos do accidentado deron a volta para recuperar a extremidade, que levaron ao hospital canda o ferido.

O ghit do verán no Brasil é ben diferente. Triunfou unha canción para insultar un veciño, titulada «Vai tomar no cu»
Cris Nicolotti, unha actriz brasileira que gravou un vídeo musical cun duro insulto dedicado a un veciño molesto foi contratado por unha discográfica e vendeu centos de tons para teléfonos móbiles despois do éxito que acadou no portal YouTube. Cada día entre 30 e 40.000 internautas buscan o vídeo, creado hai tres meses, de «Vai tomar no cu», un tema melódico, con sons edulcorados. «Non imaxinaba isto, porque a música saíu case sen querelo. En 72 horas o vídeo tomara o país, nin sei como», dixo Nicolotti, que tamén viu aumentar o público dunha peza teatral que representaba en São Paulo. A venda de tons e politons xa produciu uns beneficios de 500.000 reais, uns 182.000 euros. A actriz pensa agora gravar un álbum con 12 temas. A canción xa ten diferentes versións na internet e mesmo hai outro vídeo gravado por Eliane, unha atractiva presentadora de televisión e ex-animadora infantil.

Unha tenda chilena vende traxes de Pinochet para os seus partidarios
Uns vinte traxes do ex-ditador chileno Augusto Pinochet están á venda nunha xastraría do centro de Santiago de Chile, pero só se lles venden aos clientes identificados como partidarios do finado xeneral, informou o xornal La Tercera. Os traxes son principalmente tres pezas e chaquetas, e foron vestidos por Pinochet entre 1980 e 2006, segundo declarou o seu fillo maior, Augusto Pinochet Hiriart: «Son máis ben traxes correntes que el usaba na casa ou para saír en actividades particulares, nada de momentos emblemáticos ou especiais», explicou. Segundo a nova, todos os traxes custan máis de 2.000 dólares (1.465 euros). Agás un smoking, os traxes non están no escaparate da xastraría D’Adriany, senón que están protexidos en envoltorios especiais. Pinochet morreu o 10 de decembro do ano pasado, despois de ter encabezado unha sanguinaria ditadura, de 1973 a 1990, que deixou polo menos 3.000 vítimas entre mortos e desaparecidos. Segue a ter partidarios en Chile.

Usuarios do IPhone de Apple reciben unha factura de 300 páxinas
Algúns dos usuarios do novo teléfono móbil de Apple, o IPhone, tan desexado polos friquis dos trebellos, atopáronse este mércores cunha desagradable sorpresa ao recibiren unha factura de 300 páxinas. Todas as mensaxes e chamadas, e tamén as actividades pagadas aparecen detalladas nas facturas da compañía AT&T, que distribúe en exclusiva o aparello nos Estados Unidos. Un voceiro da empresa, Mark Siegel, asegurou en declaracións á axencia AFO, que «este caso é a excepción e existen diferentes fórmulas de facturación». «Eles poden ver unha factura súper detallada, unha versión en papel sen tantos detalles e finalmente poden consultar o saldo por internet. Son eles os que escollen, nos avisan e, se prefiren ver a factura en liña, cambiámolos», explicou. AT&T non quixo especificar cantas persoas recibiron a factura superdetallada, por ser unha listaxe confidencial. Segundo os analistas, este tipo de facturas non só lle custan diñeiro á AT&T, senón que tamén desesperan os seus clientes. É mal comercio.

12 de agosto 3542 días atrás

Hoxe imos falar bastante de televisión. Comezamos coa detención de tres brancos, que tentaban comprar un televisor co DNI dunha persoa negra.
A Garda Civil detivo en Madrid tres mozos que tentaban financiar un televisor co carné de identidade dun home negro, aínda que co mesmo documento xa abriran unha conta nun banco. JALM, de 19 anos; AGM, de 25, e RDP, de 22, foron detidos o mércores nun centro comercial de Rivas-Vaciamadrid despois de que a Garda Civil recibise un aviso dos donos do establecemento. JALM quería financiar un televisor de 40 polgadas e valorado en 1.300 euros coa documentación dunha persoa de raza negra. Os dous cómplices agardaban á saída. Nun primeiro momento o primeiro individuo tentou convencer os axentes de que estaba só, pero as evidencias fixérono admitir o plan que tiñan tramado. Resulta sorprendente que se lles permitise abrir unha conta corrente co documento intervido sen ter levantado sospeitas, debido ás notables diferenzas entre a persoa da foto e calquera dos tres detidos, acusados dun delito de estafa.

Un presentador inglés vomita durante un programa en directo
Kenny Toal, locutor de informativos da cadea privada Tyne Tees de Newcastle upon Tyne, ao nordeste de Inglaterra, non puido aguantar e vomitou en directo, durante a emisión do programa local North East Tonight. Segundo informou o xornal The Sun, o presentador colleu unha papeleira para vomitar e non manchar o chan. Fíxoo na metade do programa, perante a mirada abraiada do equipo. Porén, a súa compañeira, Pam Royle, seguiu co informativo. Parece ser que a culpa do incidente non a tiveron as desagradables imaxes do informativo, senón unha torta de queixo que lle fixera a nai do presentador e que comera pouco antes de comezar o programa.

E un par de miles de quilómetros ao sur, en Marbella, unha vidente pediu auxilio en directo ao se incendiar a cadea de televisión local en que traballaba.
O lume, que prendeu de madrugada e por causas que aínda se descoñecen, colleuna no seu lugar de traballo, facendo ese labor de servizo público que é botarlle as cartas en directo a un telespectador. Toñi, a vidente da cadea local de televisión privada M-95, de Marbella, alertada por outra traballadora que lle pasaba as chamadas dende o exterior, pediulle auxilio á audiencia das dúas da mañá do xoves: «Por favor, axúdennos. Chamen aos bombeiros, porque M-95 estase a queimar». Nuns minutos chegaron efectivos da policía local e dos bombeiros aos estudios da emisora, situada xusto en fronte da xefatura. O lume quedou extinguido nunha hora. Ao final só houbo que lamentar danos materiais. O lume comezou no despacho do director, José Pernía.

Inventan uns videoxogos que se instalan nos urinarios
Trátase dun xogo de carreiras de automóbiles, e xa poden supoñer como se controla, pois só se instala en baños masculinos. Para mover o vehículo á dereita ou á esquerda hai que apuntar o chorro cara a uns sensores. O invento, que fai máis divertida a actividade da micción, non ten extras como cambio de marcha, turbo, pero de seguro vai revolucionar os aseos de moitos establecementos. O único problema serán as colas que se poden formar co aumento da demanda.

E non deixamos os coches, aínda que agora reais. Detiveron un ladrón durmido dentro do vehículo que ía roubar.
Foi en Noruega. O xoves á mañá a policía detivo un ladrón que quedou durmido dentro do coche que quería roubar, quizais esgotado por ter que traballar de noite. O detido, de 42 anos de idade, apareceu dentro dun vehículo na cidade de Haugesund, ao suroeste do país, rodeado de obxectos que supostamente roubara antes, segundo a policía. En declaracións a Radio Haugaland, Torgeir Stoedle xefe da policía local, explicou: «parece que quedou durmido cando tentaa roubar o coche». O home xa estaba fichado e non opuxo resistencia.

E outra policía, a mexicana, cambiará os chifres por guitarras e trompetas
Non serán todos os axentes. Policías de tráfico mexicanos montarán unha banda de mariachi durante unha xira cultural que farán polo Magreb, é dicir, o norte de África, informou o xoves a secretaría de Seguridade Pública mexicana. O mariachi ‘Nueva guardia nacional’ representará o país nunha xira que se desenvolve con motivo do día da Independencia de México. O grupo está composto por 15 elementos da corporación que ademais de música realizan labores de vixilancia na vía pública, explica o comunicado. No servizo de Seguridade Pública, ademais de mariachis hai unha ducia de grupos de diferentes xéneros musicais. A xira por Alxeria, Tunicia, Libia e Mauritania, durará do 14 de agosto ao 11 de setembro.

5 de agosto 3543 días atrás

Deteñen un mozo bébedo nunha autoestrada… montado nunha bicicleta
A policía alemá detivo este luns á tarde un mozo de 19 anos que circulaba completamente borracho por unha autoestrada do sur do país, pero non ía en coche, senón en bicicleta. O infractor, que ía sen luces pola A3 preto de Nürnberg, foi visto polo condutor dun vehículo pesado. O ciclista, que levaba máis de dous gramos de alcol por litro de sangue, parecía completamente perdido, segundo dixo o martes a policía, polo que o levaron a unha cela de desintoxicación e será acusado de conducir en estado de ebriedade.

Denuncian un costarricense que devora animais vivos
A Sociedade Mundial para a Protección Animal interpuxo o venres pasado unha denuncia perante o Ministerio Público nunha localidade do Pacífico de Costa Rica contra un home que se alimenta de animais vivos. Douglas Barahona come cans, gatos ou pombas, que devora en vivo, segundo unha reportaxe e fotografías que publicou o 20 de xullo o xornal local Extra.
«Eu érgome e o que almorzo é calquera cousa que ande por aí, unha pomba, un polo, un paxaro, o que sexa. Cólloos, arríncolles a cabeza, bebo o sangue e logo cómoos», asegurou Barahona ao periódico. A sociedade protectora tomou accións legais por considerar que a conduta do costarricense é inaceptable e polo respecto que merecen os animais. A denuncia baséase en artigos do Código Penal do país que condenan a crueldade contra os animais ou a bestialidade, aínda que só se consideran faltas e castíganse con multas.

Un tricampión mundial da Fórmula 1 perde o carnet por puntos
O brasileiro Nelson Piquet, tricampión mundial da Fórmula 1, perdeu a súa licenza de conducir despois de superar o máximo de puntos permitidos por infraccións, e ten que asistir dende este luns coa súa muller a clases de condución e normas de tráfico en Brasilia. Piquet, que entre outros vehículos ten un BMW convertible e automóbiles adaptados con motor Porsche, ten o carnet suspendido dende hai tres meses despois de acadar os 29 puntos, nove máis do límite no Brasil. Agora está obrigado a ir oito días a clases no departamento de tráfico municipal. Piquet, de 54 anos e campión en 1981, 1983 e 1987, ten que ir ás clases coa súa muller, Viviane, que tamén perdeu a licenza por infraccións como exceso de velocidade, mal aparcamento e non lles facer caso aos sinais.

Abre na China un restaurante feminino, que non lles serve comida aos homes
Na cidade de Changchun, ao nordeste da China, abriu un restaurante en que só as mulleres poden comer, e que se volveu moi popular entre as traballadoras da contorna, segundo informou a axencia China News. O establecemento, que se chama Nushi Canting (restaurante para mulleres), pode recibir visitas de homes que sintan curiosidade, pero aos que non se lles vai servir ningún prato. O dono é un home, Cai ChunChang, e asegura que, nos poucos días que leva aberto o establecemento, xa ten moitas clientes, sobre todo oficinistas de entre 25 e 35 anos. O local está decorado con detalles supostamente femininos, como cortinas rosas e violetas, bordados con bolboretas e mobles en tons pastel. A comida ten toques internacionais, pensando no gusto das mulleres de Changchun polo europeo, e ofrece dende pasta italiana ata sushi xaponés, acompañados por viño tinto e café, non moi habituais na China. Unha clienta, a señora Bai, explicou que lle gustaba o novo restaurante porque «aquí non hai ruído nin cheira a tabaco, é tranquilo e elegante».

Confunden uns ourizos cachos con ladróns en Alemaña
Dous ourizos namorados alertaron unha veciña que creu, polos ruídos, que se estaba a producir un roubo. Isto provocou a intervención dunha patrulla da policía na pequena cidade de Rühen, ao norte de Alemaña, o sábado á noite. A muller chamou asustada ao número de emerxencias para dicir que oíra «ruídos de serra» na casa dos veciños, explicou o luns seguinte un voceiro da policía local. Pero a patrulla, que chegou axiña ao lugar, comprobou que o suposto ladrón era en realidade unha parella de ourizos cachos tratando de aparearse. A pesar da chegada das forzas da orde os dous animais seguiron copulando no céspede.

E rematamos cun invento moi útil para o verán galego: un paraugas que predice a chuvia
Unha compañía estadounidense desenvolveu un paraugas que fai algo máis que tapar da chuvia: di cando vai chover. A empresa Ambient Devices, especializada na integración da internet en produtos da vida diaria, inventou un paraugas cun receptor de radio incorporado no seu mango que recibe os datos do tempo de 150 lugares dos Estados Unidos a través dunha conexión á web de Accuweather.com. Se o prognóstico é de chuvia nas seguintes 12 horas, o mango do paraugas ilumínase. Se a frecuencia é feble e intermitente significa que a chuvia será leve, mentres que se as luces son rápidas e intensas, indica que se achega unha treboada. Un voceiro da compañía, Mark Prince, dixo que o paraugas Ambient amosa a habilidade de unir a intelixencia da rede cos obxectos cotiáns. «Podes ter este paraugas a carón da porta, e cando vaias saír saberás se o vas precisar durante o día», explicoulle á axencia Reuters. O paraugas usa pilas e require a activación mediante unha liña de teléfono do usuario, e sairá á venda nos Estados Unidos esta semana por 140 dólares, uns 100 euros.

29 de xullo 3555 días atrás

Un gato anuncia a morte dos anciáns dun xeriátrico
Óscar é un gato que vive no xeriátrico do estado unido de Rhode Island e que anuncia a morte dos seus inquilinos. O animal visita os anciáns poucas horas antes do seu pasamento. Segundo revelou outro Óscar, o xeriatra Óscar Sosa na revista The New England Journal of Medicine, o gato xa visitou 25 residentes da clínica. O felino, de dous anos, parece non cometer moitos erros e semella comprender que os pacientes están a pouco de morrer. A doutora Joan Teno dubida de que Óscar teña facultades paranormais, pero recoñece que sempre aparece nas dúas últimas horas da vida dos residentes. «Pode que haxa unha explicación química», explica Teno. O gato, de cor gris e branca, vive principalmente no terceiro piso, onde residen os pacientes con demencia.

E de xeriátrico en xeriátrico. Unha muller pode ser expulsada dun asilo por malfalada.
Unha anciá corre o risco de que a expulsen dunha residencia para pensionistas en Halifax, na costa atlántica canadense, debido á súa linguaxe soez e á súa propensión ao lercheo, segundo informaron o martes medios de comunicación locais. Mary Vaughan, de 73 anos, explicou no xornal The Globe and Mail que non sempre empregou esas expresións, pero que aprendera a facelo hai moito tempo cando vivira no territorio do Yukón, ao norte do país, onde, segundo ela, é costume insultar e dicir tacos. «Sentaba diante dun espello e practicaba ata que podía dicilo sen ter vergoña», afirmou. Grazas a ese adestramento, púidolle dicir a un membro do persoal do asilo «Brian, fuck off», que se pode traducir como esta canción de Amparanoia. A dirección do centro tamén a acusa de lerchear demasiado na sala común do asilo, e outros residentes e familiares tamén se queixaron das súas expresións. Enferma de cancro, a muller ten ata finais de agosto para abandonar a residencia.

Xa falamos varias veces dos cambios que se están a producir en Beixín de cara aos xogos olímpicos. Agora bicarse poderase considerar delito.
As parellas que se biquen diante dunha cámara de vixilancia durante os Xogos Olímpicos da capital chinesa, o ano que vén, poderase ver sorprendida pola Policía, pois a actividade poderase considerar ‘secuestro’ ou ‘roubo’ por parte dos ordenadores que controlan as cámaras. Segundo informou a axencia oficial Xinhua, os dispositivos están programados para detectar violacións do espazo privado e informar o centro de mando. Os efectivos de garda decidirán que medidas tomar segundo o sinal enviado pola cámara. As zonas vixiadas estarán identificadas cun sinal bilingüe que representa un ‘ollo negro’. Os avisos lembraranlle ao público que se debe comportar ben nos lugares públicos e que protexa a súa intimidade. Segundo unha enquisa recente, aos chineses parécelles de peor gusto bicarse en público ca cuspir, costume este último que máis lles molesta aos turistas.

E bicar tamén pode ter consecuencias xudiciais en Francia, sobre todo se se fai nun cadro valorado en dous millóns de euros.
A muller, de 30 anos, foi encausada por marcar cun bico unha tea do pintor estadounidense Cy Twombly exposta na colección Lambert de Aviñón. O lenzo, sen título, de tres por dous metros era completamente branco. Agora ten uns beizos marcados nel. O xoves, a moza, que vive en Martigues, nas bocas do Ródano, visitou cun amigo a exposición, aberta ata o 30 de setembro, pola gran admiración que lle ten ao pintor. Durante a visita, emocionada polas obras de arte, achegouse ao cadro e bicouno. «Atopei o cadro aínda máis fermoso», confesou a muller, tamén pintora. «O artista deixou este branco para min». O persoal da galería chamou a Policía, que detivo a muller cando se dispoñia a marchar. O vindeiro 16 de agosto será xulgada por degradación dunha obra de arte.

Lesmas españolas invaden Suecia
As lesmas españolas convertéronse nunha praga no país escandinavo, onde atacan pola noite, favorecidas pola humidade, e causan enormes estragos. Este verán, inusualmente chuvioso en Suecia, como en Galicia, levou ata o norte os gasterópodos ibéricos, tamén coñecidos como «lesmas asasinas», pois devoran literalmente os xardíns. Ted von Proschwitz, especialista do museo de Historia Natural de Gotemburgo, declarou á axencia AFP: «Nunca vin tal cantidade de limachas, e problema séguese a estender». Habitualmente, estes animais morren durante os meses secos, pero como choveu dende maio, multiplicáronse. O gasterópodo foi bautizado como «lesma española» porque chegou a Suecia en 1975 entre plantas procedentes de España. O becho, de cor escura e duns dez centímetros de tamaño, estendeuse polo sur do país e mesmo chegou a Estocolmo. Unha muller de Hjärnap, Anne Sjöberg contou 36.674 lesmas no seu xardín dende maio, segundo o xornal Helsingborgs Dagblad. As limachas son hermafroditas e poden poñer 400 ovos dunha vez.

E rematamos a viaxe desta semana ao oeste de Suecia, en Noruega. A princesa Marta Luísa di que ten poderes psíquicos e que fala cos anxos.
A filla dos reis Harald e Sonia de Noruega, de 35 anos, fixo o anuncio nunha páxina web onde anuncia que vai poñer en marcha un novo centro de terapias alternativas. Asegura que cando era nena decatouse de que podía ler os sentimentos interiores da xente, mentres que as súas experiencias cos cabalos permitíronlle contactar cos anxos. A princesa Marta Luísa, cuarta na línea sucesoria ao trono noruegués, aprendeu terapias psíquicas e anuncia que o seu centro de educación Astarté permitiralles aos alumnos aprender a crear milagres nas súas vidas e fortalecer os poderes dos seus anxos, que ela describe como «as forzas que nos rodean e que nos serven de axuda en todos os aspectos das nosas vidas». Tamén dixo: «Foi cando coidaba dos cabalos cando entrei en contacto cos anxos. Ultimamente comprendín o valor deste importante don que quero compartir coa xente, quizais contigo». Un programa de tres anos no seu centro custa 24.000 coroas norueguesas, 4.150 dólares, 3.000 euros ou 2.000 libras esterlinas, anuais.

22 de xullo 3556 días atrás

A nai do membro dunha banda xuvenil leva no coche o seu fillo de 14 anos para matar un rival
Eva Daley, nai dun pandilleiro xuvenil, levou en automóbil o seu fillo e outros seis membros da súa banda a un parque de patinaxe para que asasinasen un rapaz de 13 anos ao que lle tiñan rancor, segundo informaron investigadores da policía. Daley, de 30 anos, desprazou no seu vehículo varios membros da banda Latin Marijuana Smokers ao parque, onde mataron a puñaladas a José Bobby Cano, dixo a policía.
Daley e os sete rapaces foron acusados de asasinar a Cano o 26 de xuño preto do parque de patinaxe de Long Beach, cidade californiana de 462.000 habitantes situada a 40 quilómetros ao sur de Los Angeles. A nai foi encarcerada e impúxoselle unha fianza dun millón de dólares, aínda que ela declarou a súa inocencia perante o xuíz.

Merca unha Playstation en eBay e atopa 65.000 euros no paquete
Un adolescente británico atopou a cantidade de diñeiro en efectivo agachada no paquete da Playstation 2 que acababa de comprar nunha poxa a través da rede. O rapaz, de 16 anos, pagou 95 libras (140 euros) pola consola de segunda man, e cal foi a súa sorpresa cando descubriu os 65.000 euros, en moeda europea, no interior da caixa. A pesar da evidente tentación, o rapaz non quedou cos cartos. Os seus pais puxéronse en contacto coa policía local da súa cidade, Aylsham, en Norfolk, e os axentes fixéronse cargo do diñeiro. Un voceiro da policía confirmou que se lle devolverán os billetes ao propietario, sempre que a súa orixe sexa legal. Se non se atopa o dono legal dos cartos, un tribunal decidirá o seu destino. O sitio eBay comprometeuse a colaborar na pescuda.

Un xogador de rugby sufría dores de cabeza por un dente dun rival chantado na fronte
Ben Czislowski, xogador australiano de rubgy, acudiu ao médico afectado por fortes dores de cabeza. Alí, sorprendeuse cando na consultra lle sacaron da fronte o dente dun rival, que era a causa da súa migraña, informaron este martes medios locais. O xogador chocara violentamente contra un contrario nun partido da copa Queensland a comezos de abril. O lance rematou coa súa fronte aberta e a mandíbula e varios dentes rotos do rival. Czislowski contou no Brisbane’s Courier Mail que despois do partido coséronlle a ferida e dende entón sufría agudas dores de cabeza, somnolencia e mesmo unha infección nun ollo. O deportista, de 24 anos, foi ao médico ao se ver incapaz de recuperar a súa forma. O diagnóstico foi que un dente estaba chantado na súa fronte, xusto enriba do ollo esquerdo. O xogador dixo que lle devolvería o dente ao seu dono se llo pide.

E seguimos con dentes. Un biscaíño denuncia a aparición dun dente de ouro dentro dun caramelo.
Un veciño de Santurtzi de 76 anos denunciou que atopou un dente de ouro no interior dun caramelo de café con leite. Segundo comentou un familiar, o señor mercou unha bolsa de lambetadas nunha pastelaría do centro da localidade. O domingo 8 de xullo atopou a funda do dente nun dos caramelos mentres o estaba a chuchar. O home dixo ter sentido «noxo e sorpresa» co achado, e o pasado 13 de xullo presentou unha denuncia perante a Subdirección de Saúde Pública de Biscaia.

Noite de vodas na libraría para mercar o libro de Harry Potter
A noite de vodas dunha parella do estado de Oregón tivo unha maxia especial. Courtney Lanahan, de 23 anos, e Shawn Gordon, de 24, dirixíronse directamente o venres dende a recepción da súa voda a unha libraría para mercar o último e derradeiro libro de Harry Potter. A data oficial do lanzamento do libro foi o sábado, pero moitas tentas abriron á medianoite para celebrara o debut de Harry Potter and the Deathly Hallows. A voda comezou ás sete do serán e logo houbo unha recepción. Ás once e media, unha limusina recolleu os recén casados e levounos a un centro comercial. «É o mellor agasallo de vodas», expresou a noiva. A parella perdeu as actividades previas e tampouco puido participar no concurso de disfraces, pero a libraría Barnes and Noble reservoulle o primeiro lugar da fileira.

Unha empresa india lanzará uns preservativos con sabor a tabaco
Unha empresa india sacará ao mercado preservativos con gusto a tabaco, logrado cunha mestura de follas e noces de betel, informou este martes a prensa do país. Segundo Sanjeev Gaikwad, responsable dunha organización de loita contra a sida que contribúe no lanzamento do novo produto, trátase do sabor que prefiren as prostitutas, antes ca a banana ou o chocolate. «A maioría dos traballadores do mercado do sexo mastican paan», explica, un produto tónico e astrinxente composto por follas de tabaco e de betel, planta que contén unha semente semellante á pementa. Os condóns venderaos a empresa pública Hindustan Latex antes de fin de ano.

15 de xullo 3556 días atrás

Encontro entre o home máis alto e a muller máis baixa do mundo.
A reunión produciuse na cidade de Batou, ao norte da China. Alí, Bao Xishu, o home máis alto do mundo, que mide 2 metros 36, coñeceu a He Pingping, unha rapaza de 19 anos que mide 73 centímetros e aspira a figurar no libro Guinness como o ser humano de menor estatura da Terra. Bao Xishun casou recentemente cunha muller non tan baixa, aínda que tampouco demasiado alta, pois chégalle polo cóbado. Xishun, de 56 anos, xa é o marido de Xia Shujuan, de 28 anos e 1,68 metros de estatura. A cerimonia tradicional celebrouse en Erdos, Mongolia Interior, de onde son naturais os dous membros do matrimonio. Bao declarou á prensa que espera ter un fillo que non sexa demasiado alto, porque trae moitos problemas. Unha web chinesa fixo unha enquisa para coñecer a estatura da descendencia de Bao e de Xia. O 30% dos participantes cre que medirá máis de dous metros e que xogará ao baloncesto.

Queren prohibir en Beixín os taxistas coa cabeza rapada
As autoridades da capital chinesa queren prohibirlles aos condutores de taxi que leven a cabeza rapada para mellorar a imaxe da cidade de cada aos Xogos Olímpicos de 2008. Dous meses despois de que prohibisen que as condutoras leven cortes de pelo «demasiado extravagantes», agora son os choferes os que non poderán levar a cabeza rapada, e tampouco barba. A medida entra en vigor agora mesmo, a mediados de xullo. En Beixín hai actualmente case 70.000 taxis. Con este tipo de campañas, o goberno chinés pretende aumentar o civismo no comportamento da poboación e mellorar a súa imaxe internacional. Outra das medidas é suprimir os carteis escritos en chinglish, especie de inglés macarrónico xurdido da tradución directa do chinés e con erros ortográficos.

O Partido Comunista da China expulsa un alto cargo… un mes despois do seu suicidio.
Song Pingshun foi expulsado do PCC por «levar unha vida disoluta e por unha grave violación das disciplinas do partido». Song, alto cargo da cidade de Tianjin, supostamente abusou da súa posición para beneficiar a súa amante. Esta última acusación, a de ter amantes, repítese habitualmente contra os altos cargos públicos corrutos. Aínda que a expulsión se fixo efectiva o pasado martes, Song, de 61 anos, aparecera morto o pasado 3 de xuño despois de que, aparentemente, se tirase dende unha fiestra ao se coñecer o escándalo. Ata o momento, o PCC rehabilitou con carácter póstumo vítimas das diversas purgas do partido, pero non é tan frecuente que se expulse alguén nesas circunstancias.

Agora viaxamos ata o Xapón. Nos baños públicos de Toquio seguen a aparecer sobres cheos de cartos.
Sobres cheos de billetes de iens cunha frase convidando a realizar boas accións seguen a aparecer no Xapón. O caso xa é primeira páxina dos medios, que avalían en dous millóns de iens (equivalentes a 12.000 euros) a fortuna esparexida por un benefactor misterioso nos baños públicos do país. Os achados, tanto no norte como no sur do arquipélago, seguen o mesmo esquema: sobres cun billete de 10.000 iens (60 euros) en baños masculinos de edificios públicos. Todos van acompañados dunha carta anónima, escritos en ideogramas caligrafiados cun pincel, que poñen: «saiban sacar froito da herdanza de 10.000 iens aquí contidos, para instruíren o seu crecemento persoal. Por favor, comprométanse cun corazón xeneroso en calquera tipo de boa acción. Que teñan serenidade». As autoridades, que non se decataron da extensión nacional dos descubrimentos ata esta semana, descoñecen se apareceron máis sobres noutros lugares e se os seus descubridores decidiron mantelos en secreto. Malia isto, seguindo a tradicional educación xaponesa, moitos devolveron os sobres ás comisarías, un total de 1.600 euros. Ninguén reclamou o diñeiro ata agora.

E rematamos un pouco bastante máis ao sur. Indonesia acepta a marihuana como condimento alimenticio.
A posesión de marihuana seguirá a ser delito en Indonesia, pero os cociñeiros que empreguen a herba nos seus pratos non deben ser arrestados, anunciou o vicepresidente do goberno, Yusuf Kalla. Nalgunhas partes do país, onde o narcotráfico está penado coa morte, os cociñeiros usan pequenas cantidades de follas ou sementes de marihuana como condimento. Kalla afirmou perante a prensa que isto non vai supoñer de ningunha maneira que se legalice a droga, como acontece nalgúns países de Europa. «Está ben usala como condimento, pero non debería ser legalizada completamente», declarou ao Jakarta Post. O vicepresidente e o xefe da policía reiteraron o seu apoio á pena de morte aos narcotraficantes, como tamén acontece nas veciñas Malaisia e Singapur.

8 de xullo 3556 días atrás

Desta vez foi un podcast, que se pode descargar aquí.

Previous